மூன்று நாடுகளுக்கு விசா தடை – பிரித்தானியாவின் புகலிட சட்டத்தில் அதிரடி மாற்றம்
பிரித்தானிய அரசு, அங்கோலா, நமீபியா மற்றும் காங்கோ ஆகிய மூன்று ஆப்பிரிக்க நாடுகளின் குடிமக்களுக்கு விரைவில் விசா தடை அமல்படுத்தத் திட்டமிட்டுள்ளது. பிரித்தானியாவின் புகலிட மற்றும் குடியேற்ற கொள்கையில் பெரிய மாற்றங்களை அறிவிக்க உள்ள உள்துறை செயலாளர் ஷபானா மஹ்மூத், இந்த நடவடிக்கை அவசியமானது என தெரிவித்துள்ளார்.
இந்த நாடுகள், பிரித்தானியாவுக்கு சட்டவிரோதமாக நுழைந்தவர்களையும் குற்றவாளிகளையும் திரும்பப் பெறுவதில் ஒத்துழைக்கவில்லை என்ற காரணத்தால் விசா தடை விதிக்கப்படுவதாக அவர் கூறினார். “எங்கள் விதிகளை மதிக்காத நாடுகளுக்கு முன்பு இருந்த விசா சலுகைகள் இனிமேல் வழங்கப்படாது,” என மஹ்மூத் எச்சரித்தார்.
புதிய கொள்கைகள், கடுமையான புகலிட நடைமுறைகளுக்காக விமர்சனங்களுக்குள்ளான டென்மார்க் பின்பற்றும் முறையை ஒத்ததாக உள்ளதாக கூறப்படுகிறது. இதன் மூலம், போர், கலகம் அல்லது அரசியல் அடக்குமுறையால் புகலிடம் தேடும் நபர்களுக்கு முழுமையான பாதுகாப்பு மாற்றாக தற்காலிக பாதுகாப்பு மட்டுமே வழங்கப்படும்.
இரண்டாம் உலகப்போருக்குப் பிறகு முதல் முறையாக பிரித்தானியாவின் குடியேற்ற சட்டத்தில் இவ்வளவு பெரிய மாற்றம் கொண்டு வரப்படுவதாக மதிப்பிடப்படுகிறது. இக்கொள்கை மாற்றங்களைப் பற்றிய அதிகாரப்பூர்வ அறிக்கையை மஹ்மூத் நவம்பர் 17 அன்று நாடாளுமன்றத்தில் சமர்ப்பிக்க உள்ளார்.
மேலும், இந்த புதிய நடவடிக்கை, அமெரிக்க ஜனாதிபதி டொனால்ட் ட்ரம்ப் ஆட்சிக் காலத்தில் அறிமுகமான கடுமையான குடியேற்ற கட்டுப்பாடுகளால் ஊக்குவிக்கப்பட்டதாகவும், அமெரிக்க உள்நாட்டு பாதுகாப்பு செயலாளர் Kristi Noem முன்மொழிந்த திட்டத்திலிருந்து ஈர்க்கப்பட்டதாகவும் தகவல்கள் தெரிவிக்கின்றன.
விசா தடை அமல்படுத்தப்பட்டால் சுற்றுலா, வணிகம், VIP பயணங்கள் உள்ளிட்ட அனைத்து வகை விசாக்களும் இந்த மூன்று நாடுகளின் குடிமக்களுக்கு வழங்கப்படாது எனவும் அறிவிக்கப்பட்டுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
