"கோலி எங்கே, பாபர் எங்கே?" - பாகிஸ்தான் முன்னாள் கேப்டனை கடுமையாக விமர்சித்த தினேஷ் கார்த்திக்!
பாபர் அசாமின் ஃபார்ம் குறித்து பாகிஸ்தான் ரசிகர்கள் மற்றும் கிரிக்கெட் விமர்சகர்கள் மத்தியில் தொடர்ந்து அதிருப்தி நிலவி வருகிறது.
டி20 உலகக் கோப்பைத் தொடரில் இந்தியாவுக்கு எதிரான முக்கியமான போட்டியில், பாகிஸ்தான் அணியின் முன்னாள் கேப்டன் பாபர் அசாம் மிக மோசமான முறையில் ஆட்டமிழந்தது கிரிக்கெட் உலகில் பெரும் விவாதத்தை ஏற்படுத்தியுள்ளது. இது குறித்து கருத்து தெரிவித்துள்ள இந்திய அணியின் முன்னாள் வீரர் தினேஷ் கார்த்திக், பாபர் அசாமை விராட் கோலியுடன் ஒப்பிடுவதே தவறு என்று விளாசியுள்ளார்.
இந்தியா நிர்ணயித்த 176 ரன்கள் என்ற இலக்கை நோக்கி ஆடிய பாகிஸ்தான் அணி சிக்கலில் இருந்தபோது, அனுபவம் வாய்ந்த வீரராக பாபர் அசாம் அணியை மீட்டெடுப்பார் என்று எதிர்பார்க்கப்பட்டது. ஆனால், அக்சர் படேல் வீசிய பந்தில் தேவையில்லாத ஷாட் ஆடி, வெறும் 7 பந்துகளில் 5 ரன்கள் மட்டுமே எடுத்து அவர் வெளியேறினார்.
இந்த மோசமான ஆட்டத்தால், அடுத்தடுத்த போட்டிகளில் பாபர் அசாமின் பேட்டிங் வரிசை 5-வது இடத்திற்கு தள்ளப்பட்டது. இது ஒரு நட்சத்திர வீரருக்கு ஏற்பட்ட மிகப்பெரிய அவமானமாகவே பார்க்கப்படுகிறது.
தினேஷ் கார்த்திக் கூறியதாவது:
"விராட் கோலி தனது இன்னிங்ஸின் தொடக்கத்திலேயே இவ்வளவு பொறுப்பற்ற ஒரு ஷாட்டை ஆடுவதை என்னால் கற்பனை கூட செய்து பார்க்க முடியாது. அணியை வெற்றிப் பாதைக்கு அழைத்துச் செல்ல வேண்டும் என்ற தன்னம்பிக்கையோ அல்லது அதற்கான திட்டமிடலோ பாபரிடம் இல்லை. அழுத்தமான சூழல்களைக் கையாள்வதில் 'சேஸ் மாஸ்டர்' விராட் கோலி உலகத்தரம் வாய்ந்தவர். ஆனால் பாபர் அசாம் அந்த நிலையை இன்னும் எட்டவில்லை."
மேலும், கடினமான நேரங்களில் ஒரு வீரர் அழுத்தத்தை எப்படி எதிர்கொள்கிறார் என்பதே அவர் சிறந்தவரா என்பதை தீர்மானிக்கும் என்றும், உலகின் சிறந்த பேட்ஸ்மேன்களின் பட்டியலில் பாபர் அசாம் இடம்பெற தகுதியற்றவர் என்றும் கார்த்திக் நேரடியாகக் குறிப்பிட்டார்.
இந்தியா மற்றும் பாகிஸ்தான் ஆகிய இரு அணிகளும் சூப்பர் 8 சுற்றுக்கு தகுதி பெற்றுள்ளன. இருப்பினும், இந்த இரு அணிகளும் வெவ்வேறு குழுக்களில் இடம் பெற்றுள்ளதால், இப்போதைக்கு இவர்களுக்குள் மோதல் இருக்காது. ஆனால், பாபர் அசாமின் ஃபார்ம் குறித்து பாகிஸ்தான் ரசிகர்கள் மற்றும் கிரிக்கெட் விமர்சகர்கள் மத்தியில் தொடர்ந்து அதிருப்தி நிலவி வருகிறது.
GROUP 1
Listen Live
Visit Aha FM
