வைபவ் சூர்யவன்ஷிக்கு எதிர்காலத்தில் நிச்சயம் வாய்ப்புக் கிடைக்கும்: ஷ்ரேயாஸ் ஐயர் நம்பிக்கை

இந்தியா மற்றும் மேற்கிந்தியத் தீவுகள் அணிகளுக்கு இடையிலான ஐந்து போட்டிகள் கொண்ட இருபதுக்கு 20 தொடரானது இரண்டுக்கு இரண்டு என்ற கணக்கில் சமநிலையில் நிறைவடைந்துள்ளது.

பெங்களூருவில் நடைபெறவிருந்த இறுதிப் போட்டி சீரற்ற வானிலை காரணமாக கைவிடப்பட்ட நிலையில், இந்தத் தொடர் முழுவதிலும் இளம் துடுப்பாட்ட வீரர் வைபவ் சூர்யவன்ஷிக்கு ஆடும் பதினொருவர் அணியில் வாய்ப்பு வழங்கப்படாதமை கிரிக்கெட் இரசிகர்கள் மத்தியில் பெரும் விவாதத்தை ஏற்படுத்தியிருந்தது.

இந்நிலையில், வைபவ் சூர்யவன்ஷி எதிர்காலத்தில் உறுதியாகத் தனது திறமையை வெளிப்படுத்துவதற்கான வாய்ப்புகளைப் பெறுவார் என இந்திய அணியின் மூத்த வீரரான ஷ்ரேயாஸ் ஐயர் நம்பிக்கை வெளியிட்டுள்ளார்.

இது தொடர்பில் கருத்துத் தெரிவித்த அவர், வைபவிடம் தனது பயிற்சிகளில் தொடர்ந்து கவனம் செலுத்துமாறும், வாய்ப்புகள் கிடைக்கவில்லையே என்று அளவுக்கு அதிகமாகச் சிந்தித்துக் கவலைப்படாமல் சில தருணங்களில் பொறுமையுடன் காத்திருக்க வேண்டும் என்றும் தொடர்ந்து அறிவுறுத்தி வருவதாகக் குறிப்பிட்டுள்ளார். 

மேலும், உலகக் கிண்ணத்தை வென்று கொடுத்த இரண்டு மிகச் சிறந்த ஆரம்பத் துடுப்பாட்ட வீரர்கள் தற்போது அணியில் தொடர்ந்து நிலையான ஆட்டத்தை வெளிப்படுத்தி வருவதாகவும் அவர் சுட்டிக்காட்டினார்.

முன்னதாக, வைபவ் சூர்யவன்ஷிக்கு அணியில் வாய்ப்பு வழங்கப்படாதது குறித்து எழுந்த விமர்சனங்களுக்குப் பதிலளித்த இந்திய அணியின் தலைமைப் பயிற்சியாளர் கௌதம் கம்பீரும் இதேபோன்ற கருத்தையே வெளிப்படுத்தியிருந்தார். 

வைபவின் அபாரமான திறமை மீது அணி நிர்வாகத்திற்கு முழுமையான நம்பிக்கை இருப்பதாகவும், எனினும் அணியில் ஏற்கனவே சிறப்பாகச் செயல்பட்டு வரும் முன்னணி வீரர்களுக்கு முன்னுரிமை அளிக்க வேண்டிய கட்டாயம் உள்ளதாகவும் அவர் தெரிவித்திருந்தமை குறிப்பிடத்தக்கது.