ரேகிங் மற்றும் பாலியல் தொல்லையால் கல்லூரி மாணவி உயிரிழப்பு; பேராசிரியர் மற்றும் மூன்று மாணவிகள் மீது வழக்கு

ஹிமாச்சல் பிரதேசத்தில் கல்லூரி மாணவி ஒருவர் ரேகிங் மற்றும் பாலியல் தொல்லை காரணமாக உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. கடந்த டிசம்பர் 26 அன்று சிகிச்சை பலனின்றி உயிரிழந்த அந்த மாணவியின் மரணம் தொடர்பாக, ஒரு கல்லூரி பேராசிரியர் மற்றும் மூன்று பெண் மாணவிகள் மீது காவல்துறையினர் வழக்குப்பதிவு செய்துள்ளனர்.

உயிரிழந்த மாணவி அந்தக் கல்லூரியில் இரண்டாம் ஆண்டு பட்டப்படிப்பு பயின்று வந்ததாக கூறப்படுகிறது. மாணவியின் தந்தை அளித்த புகாரின் அடிப்படையில், கடந்த செப்டம்பர் 18 அன்று மூத்த மாணவிகளான ஹர்ஷிதா, ஆக்ருதி மற்றும் கோமலிகா ஆகியோர் மாணவியை தாக்கி மிரட்டியதாகவும், இதனால் அவர் கடுமையான மனஅழுத்தத்திற்கு உள்ளானதாகவும் தெரிவிக்கப்பட்டுள்ளது.

மேலும், அந்த நாளில் கல்லூரி பேராசிரியர் அசோக் குமார் மாணவியிடம் அநாகரிகமான முறையில் நடந்து கொண்டதாகவும், அவர் எதிர்ப்பு தெரிவித்தபோது மனரீதியாக தொந்தரவு செய்து மிரட்டியதாகவும் புகாரில் கூறப்பட்டுள்ளது. இந்த தாக்குதல் மற்றும் தொல்லை காரணமாக மாணவி மருத்துவமனையில் அனுமதிக்கப்பட்டு, பின்னர் லூதியானா மருத்துவமனையில் சிகிச்சை பெற்று வந்த நிலையில் உயிரிழந்தார்.

இந்த சம்பவங்களுக்கு பின்னர் தனது மகள் கடும் பயம் மற்றும் மனஅழுத்தத்தில் சிக்கி, அவரது உடல்நிலை வேகமாக மோசமடைந்ததாக மாணவியின் தந்தை தெரிவித்துள்ளார். மகள் அதிர்ச்சியில் இருந்ததாலும் மருத்துவமனையில் சிகிச்சை பெற்று வந்ததாலும் உடனடியாக புகார் அளிக்க முடியவில்லை என்றும் அவர் கூறினார்.

இந்த வழக்கில், இந்திய புதிய குற்றச் சட்டத்தின் பிரிவு 75 (பாலியல் தொல்லை), 115(2) (தன்னிச்சையாக காயம் ஏற்படுத்துதல்), 3(5) (பொது நோக்கம்) மற்றும் ஹிமாச்சல் பிரதேச கல்வி நிறுவனங்களில் ரேகிங் தடுப்பு சட்டம், 2009 இன் பிரிவு 3 ஆகியவற்றின் கீழ் வழக்குப்பதிவு செய்யப்பட்டுள்ளதாக காவல்துறையினர் தெரிவித்துள்ளனர்.

காங்க்ரா மாவட்ட காவல் கண்காணிப்பாளர் அசோக் ரதன், குற்றச்சாட்டுகள் அனைத்தும் தீவிரமாக விசாரிக்கப்பட்டு வருவதாகவும், மருத்துவ பதிவுகள், வீடியோ ஆதாரங்கள் மற்றும் சம்பந்தப்பட்டவர்களின் வாக்குமூலங்கள் பரிசீலனை செய்யப்பட்டு வருவதாகவும் கூறினார். மாணவி மரணத்திற்கு முன்பு பதிவு செய்ததாக கூறப்படும் ஒரு வீடியோ சமூக ஊடகங்களில் வைரலானதையடுத்து இந்த வழக்கு வேகம் பெற்றுள்ளது. அந்த வீடியோவில், பேராசிரியர் மீது அநாகரிக நடத்தை, மனரீதியான தொல்லை மற்றும் மிரட்டல் குற்றச்சாட்டுகளை மாணவி முன்வைத்துள்ளார்.

முன்னதாக, முதலமைச்சரின் ‘சங்கல்ப் சேவா’ ஹெல்ப்லைன் மூலம் புகார் கிடைத்ததாகவும், ஆனால் மாணவியின் உடல்நிலை சரியில்லாததால் அவரது வாக்குமூலம் பதிவு செய்ய முடியவில்லை என்றும் காவல்துறையினர் தெரிவித்தனர். பின்னர் மாணவியின் தந்தையின் வாக்குமூலம் பதிவு செய்யப்பட்டது.

ஆரம்ப விசாரணையில், அந்த மாணவி 2024ஆம் ஆண்டு கல்லூரியில் சேர்ந்ததாகவும், முதல் ஆண்டு தேர்வில் தோல்வியடைந்ததையடுத்து ரேகிங் பிரச்சினைகளை எதிர்கொண்டதாகவும் தெரிய வந்துள்ளது. 2025 ஜூலை மாதம் முடிவுகள் வெளியான பிறகு அவர் கல்லூரிக்கு வருவதை நிறுத்தியதாகவும், ஆகஸ்ட் 21, 2025 அன்று அவரது பெயர் கல்லூரி பதிவேட்டில் இருந்து நீக்கப்பட்டதாகவும் கூறப்படுகிறது. செப்டம்பரில் மீண்டும் சேர்வதற்காக கல்லூரிக்கு வந்தபோது, மறுமதிப்பீட்டில் தேர்ச்சி பெற்றால் மட்டுமே இரண்டாம் ஆண்டில் சேர முடியும், இல்லையெனில் மீண்டும் முதல் ஆண்டில் சேர வேண்டும் என தெரிவிக்கப்பட்டதாகவும் காவல்துறையினர் கூறினர்.

இதற்கிடையில், குற்றச்சாட்டுகளை பேராசிரியர் அசோக் குமார் மறுத்துள்ளார். சில ஆசிரியர்கள் அவருக்கு ஆதரவாகக் குரல் கொடுத்துள்ளனர். மாணவி தன் கீழ் முன்பு படித்திருந்தாலும், தற்போதைய கல்வியாண்டில் அவர் தனது மாணவி அல்ல என பேராசிரியர் விளக்கம் அளித்துள்ளார்.