இலங்கை நீச்சல் தடாக விபத்துகள்: சிறுவர்கள் உயிரிழப்பு - பாதுகாப்பு குறைபாடுகள் குறித்து தீவிர கவலை

இலங்கையில் அண்மையில் நீச்சல் தடாகங்களில் சிறுவர்கள் இருவர் உயிரிழந்துள்ளமை, பொது மற்றும் தனியார் வசதிகளில் உள்ள பாதுகாப்பு தரங்கள் மற்றும் பயிற்சி பெற்ற உயிர்காப்பாளர்கள் இல்லாமை குறித்து பாரிய கவலைகளை எழுப்பியுள்ளன.

கொழும்பு நீச்சல் கழக சிறுவனின்  உயிரிழப்பு

முன்னதாக இந்த வார தொடக்கத்தில், கொழும்பு நீச்சல் கழகத்தில் 8 வயது சிறுவன் நீரில் விழுந்து உயிரிழந்தார். விபத்து நடந்தபோது சான்றளிக்கப்பட்ட உயிர்காப்பாளர் அல்லது உயிர்காப்புப் பணியாளர்கள் எவரும் கண்காணிப்பில் இருக்கவில்லை என சிறுவனின் தந்தை குற்றஞ்சாட்டி, கழகத்தின் கவனக்குறைவு குறித்து கொள்ளுப்பிட்ட பொலிஸில் முறைப்பாடு பதிவு செய்தார். 

மிரிஹானாவில் இரண்டாவது சம்பவம்

அதனையடுத்து, மிரிஹானாவில் உள்ள ஒரு தனியார் பாடசாலையில் நீச்சல் பயிற்சியின் போது 5 வயது நுகேகொடை சிறுவன் ஒருவர் நீரில் மூழ்கி உயிரிழந்தார். அவர் களுபோவில வைத்தியசாலையில் அனுமதிக்கப்பட்ட பின்னர் உயிரிழந்தார்.

கண்காணிப்பு மற்றும் பாதுகாப்பு குறைபாடுகள்

இந்தத் துயரங்களின் போது, முறையான கண்காணிப்பு மற்றும் உயிர்காப்பு நடவடிக்கைகள் நடைமுறையில் இருந்தனவா என அதிகாரிகள் விசாரித்து வருகின்றனர்.

இலங்கையில் உள்ள பெரும்பாலான நீச்சல் தடாக வசதிகள் தகுதிவாய்ந்த உயிர்காப்பாளர்கள் இன்றி இயங்குகின்றன என அதிகாரிகள் சுட்டிக்காட்டுகின்றனர். மேலும், வழக்கமான பாதுகாப்பு ஆய்வுகள் அரிதாகவே நடத்தப்படுகின்றன என்றும் அதிகாரிகள் குறிப்பிட்டுள்ளனர்.

நிபுணர்கள் மற்றும் அதிகாரிகள் இணைந்து, ஒவ்வொரு நீச்சல் தடாகமும், அதன் அளவைப் பொருட்படுத்தாமல், தொடர்ச்சியான கண்காணிப்பு மற்றும் முறையான அவசரகால பதில் உபகரணங்கள் பேணப்பட வேண்டும் என வலியுறுத்துகின்றனர்.

சிறுவனின் மரணம் தொடர்பில் 7 பேர் கைது

இதேவேளை, நுகேகொடை சிறுவனின் சடலம் தொடர்பான பிரேத பரிசோதனை நேற்று (9) இடம்பெற்றதுடன், களுபோவில வைத்தியசாலையின் சட்ட வைத்திய அதிகாரி சடலம் தொடர்பாக திறந்த தீர்ப்பை வழங்கியுள்ளார். 

அதன்படி, சம்பவம் தொடர்பாக முன்பள்ளியின் உதவி அதிபர், விளையாட்டு ஒருங்கிணைப்பு அதிகாரி, பிள்ளைகளுக்குப் பொறுப்பான இரண்டு ஆசிரியர்கள், முன்பள்ளி ஊழியர் ஒருவர் மற்றும் இரண்டு நீச்சல் பயிற்றுனர்கள் உட்பட 7 பேரை, மிரிஹான பொலிஸார் கைது செய்துள்ளனர்.