முதல் முறையாக மெகா நிலநடுக்க எச்சரிக்கை விடுத்த ஜப்பான் – 3 லட்சம் பேர் உயிரிழப்பு அபாயம்!
ஜப்பான், உலகிலேயே இயற்கை பேரிடர்களை அதிகம் எதிர்கொள்ளும் நாடுகளில் ஒன்றாக விளங்குகிறது. இந்த நாட்டில் இப்போது முதல் முறையாக "மெகா நிலநடுக்கம்" குறித்த உயர்மட்ட எச்சரிக்கை விடுக்கப்பட்டுள்ளது. இந்த எச்சரிக்கை அமைப்பு 2022ஆம் ஆண்டு அறிமுகப்படுத்தப்பட்டதிலிருந்து இதுவரை ஒருமுறைகூட பயன்படுத்தப்படாத நிலையில், தற்போது முதல் முறையாக பயன்பாட்டிற்கு வந்துள்ளது.
உள்ளூர் நேரப்படி சமீபத்தில் இரவு 11:15 மணியளவில் 7.5 ரிக்டர் அளவிலான பாரிய நிலநடுக்கம் ஜப்பானில் ஏற்பட்டது. இதில் குறைந்தது 30 பேர் பாதிக்கப்பட்டுள்ளனர் என்றும், 2,700க்கும் மேற்பட்ட வீடுகள் மின்சாரம் இன்றி தவித்து வருகின்றன என்றும் அறிவிக்கப்பட்டுள்ளது.
நிலநடுக்கத்தைத் தொடர்ந்து சுனாமி எச்சரிக்கை விடப்பட்டது. பின்னர், அபாயம் குறைந்ததாக கருதப்பட்டு அந்த எச்சரிக்கை திரும்பப் பெறப்பட்டது.
ஜப்பானின் பூகம்ப ஆராய்ச்சி மேம்பாட்டுத் தலைமையகம் (Headquarters for Earthquake Research Promotion) வெளியிட்ட அறிக்கையின்படி, 8.0 ரிக்டருக்கு மேல் சக்திவாய்ந்த "மெகா நிலநடுக்கம்" ஏற்படும் அபாயம் உள்ளதாக தெரிவிக்கப்பட்டுள்ளது. இதுபோன்ற பேரிடர் நிகழ்ந்தால், 3 லட்சம் பேர் உயிரிழக்க நேரிடும் என்றும், நாட்டின் மொத்த உள்நாட்டு உற்பத்தி (GDP) பாதியாக சரியக்கூடும் என்றும் ஜப்பான் அமைச்சரவை அலுவலகம் கணித்துள்ளது.
இந்த சூழலில், பிரதமர் ஃபுமியோ கிஷிதா (Fumio Kishida) — "தினசரி நிலநடுக்க முன்னேற்பாடுகளை மீண்டும் சரிபார்த்துக் கொள்ளுங்கள். அதிர்வுகளை உணர்ந்தவுடன் உடனடியாக வெளியேற தயாராக இருங்கள்" என மக்களை எச்சரித்துள்ளார்.
குறிப்பிடத்தக்கது என்னவென்றால், 2011ஆம் ஆண்டு டோஹோகு பகுதியில் ஏற்பட்ட 7.3 ரிக்டர் நிலநடுக்கத்தைத் தொடர்ந்து, இரண்டு நாட்களில் 9.0 ரிக்டர் மெகா நிலநடுக்கம் ஏற்பட்டது. அந்தப் பேரிடரில் சுமார் 20,000 பேர் உயிரிழந்தனர். இந்த வரலாற்று நிகழ்வு, இன்றைய எச்சரிக்கைக்கு முக்கிய காரணமாக அமைந்துள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
