மண்சரிவு அபாயம்: ரம்புக்கனை – பேராதனை – கம்பளை இடையிலான ரயில் சேவைகள் தற்காலிகமாக நிறுத்தம்!
கொழும்பு, ஒக்டோபர் 25: நாட்டில் நிலவும் சீரற்ற காலநிலை மற்றும் மண்சரிவு அபாயம் காரணமாக ரம்புக்கனை – பேராதனை மற்றும் பேராதனை – கம்பளை இடையிலான அனைத்து ரயில் சேவைகளும் தற்காலிகமாக இடைநிறுத்தப்படுவதாக இலங்கை ரயில்வே திணைக்களம் அறிவித்துள்ளது.
இன்று (25) நள்ளிரவு 12 மணி முதல் மறு அறிவித்தல் வரை குறித்த ரயில் சேவைகள் இடைநிறுத்தப்படவுள்ளதாகத் தெரிவிக்கப்பட்டுள்ளது.
ரம்புக்கனை மற்றும் பேராதனை ரயில் நிலையங்களுக்கு இடையில், கடிகமுவ ரயில் நிலையத்திற்கு அருகில் மண்சரிவு ஏற்பட்டுள்ளதுடன், மண் மற்றும் சேறு ரயில் பாதைக்குள் தொடர்ந்து அடித்துவரப்படுவதாக ரயில்வே திணைக்களம் தெரிவித்துள்ளது.
தொடர்ச்சியாகப் பெய்துவரும் பலத்த மழையினால் குறித்த பகுதியில் மண்சரிவு அபாயம் மேலும் அதிகரித்துள்ள நிலையில், பயணிகளின் பாதுகாப்பைக் கருத்திற்கொண்டு இந்தத் தீர்மானம் மேற்கொள்ளப்பட்டுள்ளது.
பாதிக்கப்பட்ட ரயில் பாதையை விரைவாகச் சீரமைத்து வழமைக்குக் கொண்டுவரும் நோக்கில் நேற்று (24) மற்றும் இன்று (25) ஆகிய இரு தினங்களிலும் அவசர திருத்தப் பணிகள் முன்னெடுக்கப்பட்டுள்ளன.
எனினும், குறித்த பிரதேசத்தில் தொடர்ந்தும் பலத்த மழை பெய்துவருவதால் மண் மேடுகள் சரிந்து விழக்கூடிய அபாயம் இன்னும் நீங்கவில்லை என ரயில்வே திணைக்களம் சுட்டிக்காட்டியுள்ளது.
இதன் காரணமாக ரயில் பாதையின் திருத்தப் பணிகள் முழுமையாக நிறைவடைந்து, ரயில்களை இயக்குவதற்கான பாதுகாப்பு உறுதிப்படுத்தப்படும் வரை சேவைகளை மீள ஆரம்பிக்க முடியாத நிலை ஏற்பட்டுள்ளது.
அதன்படி, ரம்புக்கனை – பேராதனை மற்றும் பேராதனை – கம்பளை இடையிலான அனைத்து ரயில் போக்குவரத்து நடவடிக்கைகளும் மறு அறிவித்தல் வரை தற்காலிகமாக இடைநிறுத்தப்படுகின்றன.
இதற்கிடையில், குறித்த காலப்பகுதியில் பயணிப்பதற்காக முன்கூட்டியே பணம் செலுத்தி ஆசனங்களை முன்பதிவு செய்துள்ள பயணிகளுக்கு விசேட அறிவிப்பொன்றும் வெளியிடப்பட்டுள்ளது.
அதன்படி, பாதிக்கப்பட்ட ரயில் சேவைகளுக்காக முன்பதிவு செய்த பயணிகள் தாங்கள் செலுத்திய முழுத் தொகையையும் ரயில் நிலையமொன்றின் ஊடாக மீளப் பெற்றுக்கொள்வதற்கான வசதிகள் ஏற்படுத்தப்பட்டுள்ளதாக ரயில்வே திணைக்களம் தெரிவித்துள்ளது.
பயணிகள் தங்களது பயணங்களைத் திட்டமிடுவதற்கு முன்னர் ரயில் சேவைகள் தொடர்பான புதிய அறிவிப்புகளை அவதானிக்குமாறும் அறிவுறுத்தப்படுகின்றனர்.
மண்சரிவு அபாயம் முழுமையாக நீங்கி, ரயில் பாதையின் பாதுகாப்பு உறுதிப்படுத்தப்பட்ட பின்னரே குறித்த பகுதிகளில் ரயில் சேவைகள் மீண்டும் ஆரம்பிக்கப்படும் என ரயில்வே திணைக்களம் தெரிவித்துள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
