லிந்துலையில் மின்னல் தாக்கி வீடு பலத்த சேதம்: சிறு காயங்களுடன் உயிர் தப்பிய குடும்பத்தினர்!

நுவரெலியா மாவட்டத்தின் லிந்துலை, ஹோல்றூட் கொனன் தோட்டப் பகுதியில் ஏற்பட்ட கடுமையான இடி, மின்னல் தாக்கத்தால் குடியிருப்பு வீடொன்று பலத்த சேதமடைந்துள்ளது.

இந்தச் சம்பவம், நேற்று திங்கட்கிழமை (09) மாலை சுமார் 5.40 மணியளவில் இடம்பெற்றுள்ளது. சம்பவத்தின்போது வீட்டில் இருந்த குடும்பத்தினர் சிறு காயங்களுடன் உயிர் தப்பியுள்ளனர்.

மின்னல் தாக்கியதைத் தொடர்ந்து வீட்டின் முன்பகுதியில் பொருத்தப்பட்டிருந்த மின் இணைப்புப் பெட்டி தீப்பிடித்து எரிந்துள்ளது. இதனால் வீட்டின் மின்சார இணைப்புகளும் உபகரணங்களும் கடுமையாகப் பாதிக்கப்பட்டுள்ளது.

மேலும், வீட்டின் கூரை பலத்த காற்று மற்றும் மின்னல் தாக்கத்தின் போது சேதமடைந்து, அதன் சில பகுதிகள் தூக்கி வீசப்பட்டுள்ளன. அவ்வாறு சேதமடைந்த கூரைப் பகுதிகள் வீட்டுக்குள் படுக்கையில் இருந்தவர்கள் மீதும் விழுந்துள்ளது. 

மின்னல் தாக்கத்தால் வீட்டிலிருந்த பல்வேறு மின்சார உபகரணங்கள் செயலிழந்துள்ளன. அத்துடன், வீட்டிலிருந்த ஆடைகள் மற்றும் ஏனைய அத்தியாவசியப் பொருட்களும் சிதறியுள்ளன.

சில வீட்டுப் பொருட்கள் தீப்பிடித்துச் சேதமடைந்துள்ளதாகவும் தகவல்கள் தெரிவிக்கின்றன. இதனால் குறித்த குடும்பத்தினர் குறிப்பிடத்தக்க பொருளாதார இழப்பை எதிர்கொண்டுள்ளனர். 

மின்னல் தாக்கம் ஏற்பட்ட நேரத்தில் வீட்டுக்குளேயே குடும்பத்தினர் இருந்துள்ளனர். கூரைப் பகுதிகள் சேதமடைந்து வீட்டுக்குள் விழுந்தபோதிலும், அங்கிருந்தவர்கள் சிறு காயங்களுடன் உயிர் தப்பியுள்ளனர்.

சம்பவம் தொடர்பில் தகவல் அறிந்ததும் அந்தப் பகுதிக்குப் பொறுப்பான கிராம உத்தியோகத்தர் பாதிக்கப்பட்ட வீட்டிற்கு நேரில் சென்றுள்ளார். அங்கு ஏற்பட்ட சேதங்களைப் பார்வையிட்ட அவர், வீடு மற்றும் உடைமைகளுக்கு ஏற்பட்ட பாதிப்புகள் தொடர்பான தகவல்களைச் சேகரித்துள்ளார். இந்தச் சம்பவம் தொடர்பான மேலதிக விசாரணைகளை லிந்துலை பொலிஸார் முன்னெடுத்து வருகின்றனர்.

இடி, மின்னல் நேரங்களில் பாதுகாப்பு அவசியம்

இடி, மின்னலுடன் கூடிய காலநிலை நிலவும் சந்தர்ப்பங்களில் மின்சார உபகரணங்களைப் பயன்படுத்தும்போது பொதுமக்கள் கூடுதல் அவதானத்துடன் செயற்படுவது அவசியமாகும். மின்னல் தாக்கத்தினால் மின்சார இணைப்புகள் சேதமடைந்திருக்கலாம் எனச் சந்தேகிக்கப்படும் நிலையில், தகுதிவாய்ந்த மின்சார நிபுணர் பரிசோதிக்கும் வரை அவற்றைப் பயன்படுத்துவதைத் தவிர்க்க வேண்டும். குறிப்பாக சேதமடைந்த மின் இணைப்புப் பெட்டிகள் மற்றும் வெளிப்பட்ட மின்கம்பிகளைத் தொடாமல் பாதுகாப்பான தூரத்தில் இருப்பது முக்கியமாகும்.