அரச நிறைவேற்று அதிகாரிகள் இன்று நாடளாவிய ரீதியில் ஒருநாள் அடையாள வேலைநிறுத்தம்
இம்முறை வரவு செலவுத் திட்டத்தில் தமது கோரிக்கைகளுக்குத் தீர்வு வழங்கப்படாதமைக்கு எதிர்ப்புத் தெரிவித்து, இன்று (20) நாடளாவிய ரீதியில் ஒருநாள் அடையாள வேலைநிறுத்தத்தில் ஈடுபடுவதற்கு அரச நிறைவேற்று அதிகாரிகளின் ஒன்றிணைந்த குழு தீர்மானித்துள்ளது.
இதற்கமைய, 20 நிறைவேற்றுச் சேவைகளைச் சேர்ந்த தொழில்வல்லுநர்கள் இந்த வேலைநிறுத்தப் போராட்டத்தில் இணையவுள்ளதாக அக்குழுவின் தலைவர் எச்.ஏ.எல். உதயசிறி தெரிவித்துள்ளார்.
அரசாங்கம் தெரிவு செய்யப்பட்ட சில துறைகளுக்கு மாத்திரம் கொடுப்பனவுகளை அதிகரித்துள்ளதாகவும், அதற்குச் சமமான 20-க்கும் மேற்பட்ட சமாந்தரச் சேவைகளை முற்றாகப் புறக்கணித்துள்ளதாகவும் அவர் குற்றம் சாட்டியுள்ளார்.
பொறியியல் சேவை, ஆயுர்வேத வைத்திய சேவை, மத்திய நிர்வாக சேவை, விஞ்ஞான சேவை, நில அளவைத் திணைக்கள சேவை, தொழில்நுட்பக் கல்விச் சேவை, புள்ளிவிபரத் திணைக்களம், தொழில் திணைக்களம் மற்றும் புகையிரதத் திணைக்களம் உள்ளிட்ட பல நிறைவேற்றுச் சேவைகள் இவ்வாறு புறக்கணிக்கப்பட்டுள்ளதாக அவர் சுட்டிக்காட்டினார்.
கடந்த காலங்களில் இந்த நிறைவேற்றுச் சேவைகளுக்குப் பாரிய சம்பள முரண்பாடு ஏற்பட்டிருந்ததாகவும், அதனை நீக்குவதாக தற்போதைய அரசாங்கம் வாக்குறுதியளித்திருந்ததாகவும் எச்.ஏ.எல். உதயசிறி நினைவுபடுத்தினார். எனினும், முன்னர் சம்பள முரண்பாடு ஏற்படுவதற்குக் காரணமாக அமைந்த சேவைகளுக்கே இம்முறை வரவு செலவுத் திட்டத்திலும் மீண்டும் பாரிய சம்பள உயர்வு வழங்கப்பட்டுள்ளதால், ஏற்கனவே இருந்த சம்பள முரண்பாடு மேலும் அதிகரித்துள்ளதாக அவர் குறிப்பிட்டார்.
வரவு செலவுத் திட்டத்தில் அரசாங்கம் இழைத்துள்ள இந்தப் பாரிய தவறை, குழுநிலை விவாதத்தின் போதே உடனடியாகத் திருத்த வேண்டும் என வலியுறுத்தியே இந்த நாடளாவிய ஒருநாள் வேலைநிறுத்தப் போராட்டம் முன்னெடுக்கப்படுவதாக அவர் மேலும் தெரிவித்தார்.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.