ஐ.தே.க - ஐ.ம.ச இணைவு காலத்தின் தேவை; வலுவான எதிர்க்கட்சி உருவாக வேண்டும் – நவீன் திஸாநாயக்க
ஐக்கிய தேசியக் கட்சி (UNP) மற்றும் ஐக்கிய மக்கள் சக்தி (SJB) இணைந்து வலுவான எதிர்க்கட்சியை உருவாக்க வேண்டியது தற்போதைய அரசியல் சூழ்நிலையின் முக்கிய தேவையாக இருப்பதாக ஐக்கிய தேசியக் கட்சியின் தேசிய அமைப்பாளர் நவீன் திஸாநாயக்க தெரிவித்துள்ளார்.
நுவரெலியாவில் இன்று (15) நடைபெற்ற ஊடக சந்திப்பில் கருத்து தெரிவித்த அவர், இரு கட்சிகளின் ஒற்றுமை குறித்து முன்னாள் ஜனாதிபதி ரணில் விக்ரமசிங்க மற்றும் எதிர்க்கட்சித் தலைவர் சஜித் பிரேமதாச ஆகியோருக்கிடையில் கலந்துரையாடல்கள் இடம்பெற்றுள்ளதாக கூறினார்.
இந்த பேச்சுவார்த்தைகள் எதிர்கால அரசியல் ஒத்துழைப்புக்கான அடித்தளமாக அமையும் என்றும், அதனைத் தொடர்ந்து தேவையான அடுத்தகட்ட நடவடிக்கைகள் மேற்கொள்ளப்படலாம் என்றும் அவர் நம்பிக்கை வெளியிட்டார்.
நாட்டின் தற்போதைய அரசியல் சூழலில், ஐக்கிய தேசியக் கட்சியும் ஐக்கிய மக்கள் சக்தியும் ஒன்றிணைந்து செயல்பட்டாலே வலுவான மற்றும் மாற்று அரசியல் சக்தியாக உருவெடுக்க முடியும் என்பது பொதுமக்களின் எதிர்பார்ப்பாக இருப்பதாகவும் நவீன் திஸாநாயக்க குறிப்பிட்டார்.
மேலும், இலங்கை தொழிலாளர் காங்கிரஸ் பாரம்பரியமாக ஐக்கிய தேசியக் கட்சி மற்றும் ஐக்கிய மக்கள் சக்தியுடன் இணைந்து செயல்பட்டு வருவதாகவும், அந்தக் கட்சி வேறு அரசியல் கூட்டணிகளில் இணைய வாய்ப்பு இல்லை என்றும் அவர் தெரிவித்தார்.
இரு முக்கிய எதிர்க்கட்சிகளும் ஒன்றிணையும் சாத்தியம் குறித்து அரசியல் வட்டாரங்களில் தொடர்ந்து பேசப்பட்டு வரும் நிலையில், நவீன் திஸாநாயக்கவின் இந்தக் கருத்து அரசியல் முக்கியத்துவம் வாய்ந்ததாக பார்க்கப்படுகிறது.
கூகுளில் நியூஸ்21ஐ பின்தொடரவும்
கூகுள் செய்திகளில் எங்களின் முக்கியச் செய்திகளை உடனுக்குடன் பெற கிளிக் செய்யவும்.
→
