சிங்கப்பூர் சென்றிருந்த ஷிரந்தி ராஜபக்ஷ நாடு திரும்பினார்
வெளிநாட்டில் தங்கியிருந்த முன்னாள் ஜனாதிபதி மஹிந்த ராஜபக்ஷவின் பாரியாரான ஷிரந்தி ராஜபக்ஷ நாட்டை வந்தடைந்துள்ளார். மலேசியாவிலிருந்து வருகை தந்த எம்.எச். 179 ரக விமானம் மூலம் அவர் கட்டுநாயக்க சர்வதேச விமான நிலையத்தை வந்தடைந்துள்ளார் என தெரிவிக்கப்படுகின்றது.
பொலிஸ் நிதி மோசடி விசாரணைப் பிரிவினால் முன்னதாக அழைக்கப்பட்டிருந்த நிலையில், எந்தவொரு பிணை நிபந்தனையின் கீழும் தம்மைப் பிணையில் விடுவிக்குமாறு கோரி ஷிரந்தி ராஜபக்ஷ மாளிகாகந்த நீதவான் நீதிமன்றில் முற்பிணை மனுவொன்றை தாக்கல் செய்திருந்தார்.
இந்த மனு மாளிகாகந்த நீதவான் ஜனனி பெரேரா முன்னிலையில் விசாரணைக்கு எடுத்துக்கொள்ளப்பட்டதுடன், இதன் பிரதிவாதியாக குற்றப் புலனாய்வுத் திணைக்களத்தின் பணிப்பாளர் பெயரிடப்பட்டிருந்தார்.
சிகிச்சை பெற்றுக்கொள்வதற்காக வெளிநாடு சென்று மீண்டும் நாடு திரும்பும்போது விமான நிலையத்தில் வைத்து பொலிஸாரால் தாம் கைது செய்யப்படுவதற்கான சாத்தியக்கூறுகள் நிலவுவதாக அவர் தனது மனுவின் ஊடாக நீதிமன்றத்திற்கு அறிவித்திருந்தார்.
சிறிலிய சவிய நிதியத்துடன் தொடர்புடைய வங்கிக் கணக்கில் இடம்பெற்றதாகக் கூறப்படும் நிதி முறைகேடுகள் மற்றும் பணப் பரிவர்த்தனைகள் தொடர்பில் வாக்குமூலம் பெறுவதற்காக முன்னாள் ஜனாதிபதி பாரியார் ஷிரந்தி ராஜபக்ஷவிற்கு பொலிஸ் நிதி மோசடி விசாரணைப் பிரிவினால் அழைப்பு விடுக்கப்பட்டிருந்த பின்னணியிலேயே அவர் அண்மையில் சிங்கப்பூருக்குச் சென்றிருந்தார்.
அதனையடுத்து வாக்குமூலம் வழங்குவதற்கு மாற்றுத் திகதியொன்றை அவர் கோரியிருந்த போதிலும், குறித்த தினத்தில் முன்னாள் ஜனாதிபதியின் பாரியார் முன்னிலையாகாவிட்டால் கைது செய்ய நேரிடும் என பொலிஸ் நிதி மோசடி விசாரணைப் பிரிவு அறிவித்திருந்ததாக தகவல்கள் வெளியாகியிருந்தன. இவ்வாறானதொரு பின்னணியிலேயே அவர் இந்த முற்பிணை மனுவைத் தாக்கல் செய்திருந்தமை குறிப்பிடத்தக்கது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
