கலேவெல மற்றும் திருகோணமலையில் இடம்பெற்ற பஸ் விபத்துகளில் இருவர் உயிரிழப்பு

கலேவெல மற்றும் திருகோணமலை ஆகிய பகுதிகளில் இடம்பெற்ற இரு வேறு பஸ் விபத்துகளில் இருவர் உயிரிழந்துள்ளதாக பொலிஸார் தெரிவித்துள்ளனர்.

தம்புள்ளை - குருநாகல் பிரதான வீதியின் இப்பாகட்டுவ பகுதியில் நேற்று இரவு இந்த விபத்து சம்பவித்துள்ளது. குருநாகல் நோக்கி பயணித்த துவிச்சக்கர வண்டி ஒன்று வலதுபுறமாக திரும்ப முற்பட்ட வேளையில், எதிரே வந்த தனியார் பஸ்ஸுடன் மோதியதில் இந்த விபத்து நேர்ந்துள்ளது. 

விபத்தில் படுகாயமடைந்த துவிச்சக்கர வண்டி செலுத்துனர் தம்புள்ளை வைத்தியசாலையில் அனுமதிக்கப்பட்டு சிகிச்சை பெற்றுவந்த நிலையில் உயிரிழந்துள்ளார்.

இவ்வாறு உயிரிழந்தவர் தம்புள்ளை பகுதியைச் சேர்ந்த 64 வயதுடையவர் என அடையாளம் காணப்பட்டுள்ளார். சம்பவம் தொடர்பில் பஸ்ஸின் சாரதி கைது செய்யப்பட்டுள்ளதுடன், கலேவெல பொலிஸார் மேலதிக விசாரணைகளை முன்னெடுத்து வருகின்றனர்.

இதேவேளை, நேற்று பிற்பகல் திருகோணமலை பஸ் நிலையத்திற்கு முன்பாகவும் மற்றுமொரு பஸ் விபத்து இடம்பெற்றுள்ளது. கல்முனையில் இருந்து திருகோணமலை நோக்கி பயணித்த பஸ் ஒன்று, பயணிகளை இறக்கிவிட்டு பஸ்ஸை திருப்ப முற்பட்டபோது, அதன் முன்பாக வீதியைக் கடக்க முற்பட்ட பாதசாரி ஒருவர் மீது மோதியுள்ளது.

விபத்தில் படுகாயமடைந்த பாதசாரி திருகோணமலை வைத்தியசாலையில் அனுமதிக்கப்பட்ட பின்னர் உயிரிழந்துள்ளார். உயிரிழந்த நபரின் அடையாளம் இதுவரை உறுதிப்படுத்தப்படவில்லை என்பதுடன், பஸ்ஸின் சாரதியை கைது செய்து திருகோணமலை பொலிஸார் மேலதிக விசாரணைகளை மேற்கொண்டு வருகின்றனர்.