பொதுப் போக்குவரத்தில் புதிய அத்தியாயம்: சீனாவில் இருந்து இறக்குமதி செய்யப்பட்ட 104 புதிய 'மெட்ரோ' பஸ்கள் இலங்கையை வந்தடைந்தன

இலங்கையின் பொதுப் போக்குவரத்து சேவையை மேலும் வினைத்திறனும், பயணிகளுக்கு ஏற்ற தரமான சேவையாகவும் மாற்றும் நோக்கில், சீனாவில் இருந்து இறக்குமதி செய்யப்பட்ட 104 புதிய 'மெட்ரோ' பஸ்கள் நேற்று (29) நாட்டை வந்தடைந்துள்ளன.

பொதுப் போக்குவரத்து கட்டமைப்பை நவீனமயமாக்கும் அரசாங்கத்தின் திட்டத்தின் ஒரு பகுதியாக இந்த புதிய பஸ்கள் கொண்டுவரப்பட்டுள்ளன. சீனாவின் முன்னணி வாகன உற்பத்தி நிறுவனத்தால் தயாரிக்கப்பட்ட இந்த மெட்ரோ பஸ்கள், அதிக பயணிகளை பாதுகாப்பாகவும் வசதியாகவும் ஏற்றிச் செல்லக்கூடிய நவீன வசதிகளுடன் வடிவமைக்கப்பட்டுள்ளன.

நாட்டின் போக்குவரத்து சேவையின் தரத்தை உயர்த்துவதற்காக இந்த பஸ்களை இறக்குமதி செய்வதற்கான உத்தியோகபூர்வ ஒப்பந்தம் கடந்த மே மாதத்தில் கைச்சாத்திடப்பட்டது. அந்த ஒப்பந்தத்தின் முதல் கட்ட அமலாக்கமாகவே தற்போது 104 புதிய மெட்ரோ பஸ்கள் இலங்கைக்கு கொண்டு வரப்பட்டுள்ளன.

இதையும் படியுங்கள்

புதிதாகப் பதிவு செய்யப்படும் வாகனங்களுக்கு ஒரு வாரத்துக்குள் இலக்கத் தகடுகள்

இந்த புதிய பஸ்கள் சேவையில் இணைக்கப்படுவதன் மூலம், பயணிகளுக்கான போக்குவரத்து வசதிகள் மேம்படுவதோடு, நெரிசல் அதிகம் காணப்படும் முக்கிய வழித்தடங்களில் சேவையின் செயல்திறனும் அதிகரிக்கும் என அதிகாரிகள் நம்பிக்கை வெளியிட்டுள்ளனர்.

மேலும், பொதுப் போக்குவரத்து துறையில் தரமான மாற்றத்தை ஏற்படுத்தவும், பாதுகாப்பான மற்றும் நவீன பயண அனுபவத்தை மக்களுக்கு வழங்கவும் இந்தத் திட்டம் முக்கிய பங்காற்றும் என எதிர்பார்க்கப்படுகிறது.