SLS முத்திரை இல்லாத ஹெல்மெட் பயன்படுத்துகிறீர்களா? நாடு முழுவதும் அதிரடி சோதனை!

இலங்கை தர நிர்ணய நிறுவனத்தின் (SLS) கட்டாயச் சான்றிதழ் முத்திரை இன்றி மோட்டார் சைக்கிள் தலைக்கவசங்களை உற்பத்தி செய்பவர்கள் மற்றும் விற்பனை செய்பவர்களுக்கு எதிராக நுகர்வோர் விவகார அதிகாரசபை (CAA) நாடு தழுவிய ரீதியில் கடுமையான அமலாக்க நடவடிக்கைகளைத் தொடங்கியுள்ளது.

2015ஆம் ஆண்டு ஜூலை 16ஆம் திகதியிடப்பட்ட 1923/65ஆம் இலக்க அதிவிசேட வர்த்தமானியின் படி, இலங்கையில் உற்பத்தி செய்யப்படும் அல்லது இறக்குமதி செய்யப்படும் அனைத்து தலைக்கவசங்களும் SLS 517 தயாரிப்பு சான்றிதழ் முத்திரையைக் கொண்டிருக்க வேண்டும். 

இந்த முத்திரை இல்லாத தலைக்கவசங்களை உற்பத்தி செய்தல், இறக்குமதி செய்தல், விநியோகித்தல், சேமித்து வைத்தல் அல்லது விற்பனை செய்தல் சட்டவிரோதமானது.

கடந்த திங்கட்கிழமை (27) மேற்கொள்ளப்பட்ட சிறப்பு அமலாக்கத் திட்டத்தின் மூலம் பல நடவடிக்கைகள் எடுக்கப்பட்டுள்ளன

அதன்படி, 98 வெற்றிகரமான சோதனைகள் நடத்தப்பட்டு, SLS முத்திரை இல்லாத 431 தலைக்கவசங்கள் பறிமுதல் செய்யப்பட்டுள்ளன.

மேலும், இரண்டு தொழிற்சாலைகளில் முறையான உரிமம் இன்றி உற்பத்தி செய்யப்பட்ட 3,520 தலைக்கவசங்கள் விற்பனை செய்ய தடை விதிக்கப்பட்டன.

2026 ஜனவரி முதல் ஜூன் வரை, அதிகாரிகள் 53 வழக்குகளைத் தாக்கல் செய்துள்ளனர் மற்றும் 87 தலைக்கவசங்களைக் கைப்பற்றியுள்ளனர். இந்த ஆண்டில் இதுவரை மொத்தம் 151 முற்றுகைகள் மற்றும் சட்ட நடவடிக்கைகள் மேற்கொள்ளப்பட்டுள்ளன. இதில் 4,038 க்கும் மேற்பட்ட தலைக்கவசங்கள் சோதனைக்கு உட்படுத்தப்பட்டுள்ளன.

உற்பத்தியாளர்கள், இறக்குமதியாளர்கள், விநியோகஸ்தர்கள் மற்றும் ஆன்லைன் விற்பனையாளர்கள் SLS முத்திரை இல்லாத தலைக்கவசங்களை விற்பனை செய்வதைத் தவிர்க்க வேண்டும் என அதிகாரசபை எச்சரித்துள்ளது.

விலை குறைவாக இருப்பதற்காக SLS முத்திரை இல்லாத தரமற்ற தலைக்கவசங்களை வாங்க வேண்டாம் என நுகர்வோர் அறிவுறுத்தப்படுகிறார்கள்.
இத்தகைய தலைக்கவசங்கள் விபத்துகளின் போது உயிருக்கு பாதுகாப்பை வழங்கத் தவறிவிடும்.

தலைக்கவசத்தை வாங்கும் போது எப்போதும் SLS முத்திரையைச் சரிபார்த்து, முறையான ரசீதைப் பெற்றுக் கொள்ளுமாறு கேட்டுக்கொள்ளப்படுகிறார்கள்.

சட்டவிரோத தலைக்கவச விற்பனை தொடர்பான தகவல்களை, நுகர்வோர் விவகார அதிகாரசபையின் 1977 என்ற துரித இலக்கத்துக்கு தொடர்புகொண்டு தெரிவிக்க முடியும்.