ஒப்பந்தம் இல்லையெனில் தாக்குதல் தீவிரம்: ஈரான் குறித்து டிரம்ப் எச்சரிக்கை
ஈரான் மீது அமெரிக்கா கடந்த ஒரு மாதத்திற்கும் மேலாக நடத்தி வரும் தாக்குதல்கள் உலக அரசியலில் பெரும் அதிர்வை ஏற்படுத்தியுள்ளன. இந்த நிலையில், வெள்ளை மாளிகையில் செய்தியாளர்களை சந்தித்த அமெரிக்க அதிபர் டிரம்ப் முக்கியமான எச்சரிக்கையை வெளியிட்டார்.
ஈரானில் அமெரிக்கா “மகத்தான வெற்றிகளை” பெற்றுள்ளதாக அவர் கூறியதுடன், அந்த நாட்டின் கடற்படை மற்றும் வான்படை பெரிதும் பாதிக்கப்பட்டுள்ளதாகவும் தெரிவித்தார். அமெரிக்க ஆயுதப்படைகள் திறம்பட செயல்பட்டு வருவதாகவும் அவர் வலியுறுத்தினார்.
இந்த மோதலின் அடுத்த கட்டத்தை சுட்டிக்காட்டிய டிரம்ப், ஈரான் உடனடியாக ஒப்பந்தத்திற்கு வராவிட்டால் அந்நாட்டின் எரிசக்தி நிலையங்களை குறிவைத்து தாக்குதல் தொடரும் என எச்சரித்தார்.
ஹார்மூஸ் ஜலசந்தி வழியாக அமெரிக்கா எண்ணெய் இறக்குமதி செய்ய வேண்டிய அவசியம் இல்லை என்றும், தன்னிறைவு பெற்ற ஆற்றல் வளங்கள் அமெரிக்காவுக்கு இருப்பதாகவும் அவர் குறிப்பிட்டார். இதன் மூலம், உலக சந்தையில் உருவாகியுள்ள எண்ணெய் மற்றும் எரிவாயு பதற்றத்திற்கு அமெரிக்கா நேரடி பாதிப்பை எதிர்கொள்ளாது என்ற செய்தியையும் அவர் வெளிப்படுத்தியுள்ளார்.
அதே நேரத்தில், இந்த போரிலிருந்து அமெரிக்கா தன்னிச்சையாக விலகும் சாத்தியம் குறித்த சைகைகளையும் டிரம்ப் வழங்கியதாக சர்வதேச ஊடகங்கள் தெரிவிக்கின்றன. “கடினமான கட்டத்தை கடந்து விட்டோம்” என்ற அவரது கருத்து, போரின் தீவிரம் குறையக்கூடும் என்ற நம்பிக்கையை உருவாக்கியிருக்கிறது. இருப்பினும், ஈரானின் நிலைப்பாடு இன்னும் கடுமையாகவே உள்ளது.
ஈரான் வெளியுறவு அமைச்சர் Abbas Araghchi, எந்த காலக்கெடுவையும் ஏற்க முடியாது என்று தெளிவுபடுத்தியதுடன், தேவையெனில் இந்த மோதலை குறைந்தது ஆறு மாதங்கள் வரை நீட்டிக்கத் தயார் என கூறியுள்ளார்.
இதனால், இரு தரப்புகளும் சமரசத்திற்கு வராத சூழலில், உலகளாவிய அரசியல் மற்றும் பொருளாதார நிலைமை மேலும் பதற்றமடையும் அபாயம் உருவாகியுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
