வர்ஜீனியா பல்கலைக்கழக வளாகத்தில் துப்பாக்கிச்சூடு: 5 பேர் காயம்

அமெரிக்காவின் வர்ஜீனியா மாகாணத்தில் உள்ள Virginia State University பல்கலைக்கழக வளாகத்தில் சனிக்கிழமை அதிகாலை இடம்பெற்ற துப்பாக்கிச்சூட்டில் ஐந்து பேர் காயமடைந்துள்ளனர். காயமடைந்த அனைவரும் மருத்துவமனையில் அனுமதிக்கப்பட்டுள்ள நிலையில், அவர்களில் ஒருவரின் நிலை கவலைக்கிடமாக இருப்பதாக பல்கலைக்கழக நிர்வாகம் தெரிவித்துள்ளது.

பல்கலைக்கழகத்தின் Quad Annexes பகுதிக்கு அருகே இந்த துப்பாக்கிச்சூடு இடம்பெற்றுள்ளது. இந்தச் சம்பவத்தில் பல சந்தேகநபர்கள் தொடர்புபட்டுள்ளதாகவும், Virginia State University பொலிஸாரும் Chesterfield County பொலிஸாரும் இணைந்து விசாரணைகளை முன்னெடுத்து வருவதாகவும் பல்கலைக்கழகம் தெரிவித்துள்ளது.

துப்பாக்கிச்சூட்டைத் தொடர்ந்து பல்கலைக்கழக வளாகம் முழுவதும் பல மணி நேரம் முடக்கப்பட்டு, மாணவர்கள் மற்றும் பணியாளர்கள் பாதுகாப்பான இடங்களில் இருக்குமாறு அறிவுறுத்தப்பட்டனர். காலை 8:21 மணியளவில் வளாகம் முழுவதுமான முடக்கநிலை நீக்கப்பட்ட போதிலும், விசாரணைகள் தொடர்ந்து நடைபெறுவதால் வளாகத்தில் குறிப்பிடத்தக்க அளவில் சட்ட அமலாக்க அதிகாரிகள் குவிக்கப்பட்டுள்ளனர்.

இதையும் படியுங்கள்

ஹார்முஸ் ஜலசந்தியை அமெரிக்கப் பிரதேசமாக அறிவிக்கப்போவதாக டிரம்ப் அறிவிப்பு - ஈரான் கடும் எதிர்ப்பு

சம்பவம் தொடர்பாக தகவல் தெரிந்தவர்கள் Chesterfield County பொலிஸாரை தொடர்புகொள்ளுமாறு அறிவுறுத்தப்பட்டுள்ளனர். மேலும், சட்ட அமலாக்க அதிகாரிகளின் அறிவுறுத்தல்களை தொடர்ந்து பின்பற்றுமாறும் பல்கலைக்கழக நிர்வாகம் கேட்டுக்கொண்டுள்ளது.

Virginia State Universityயின் இலையுதிர் பருவ கல்வி நடவடிக்கைகள் தொடங்குவதற்கு இன்னும் இரண்டு நாட்களே உள்ள நிலையில் இந்த துப்பாக்கிச்சூடு இடம்பெற்றுள்ளது. வர்ஜீனியாவின் Ettrick பகுதியில், மாநிலத் தலைநகர் Richmond நகருக்கு தெற்கே சுமார் 24 மைல் தொலைவில் இந்தப் பல்கலைக்கழகம் அமைந்துள்ளது.

சுமார் 5,700 மாணவர்கள் கல்வி பயிலும் Virginia State University, அமெரிக்க கறுப்பின மக்களுக்காக முழுமையாக மாநில அரசின் ஆதரவுடன் செயல்பட்ட முதல் நான்கு ஆண்டு கல்லூரியாக வரலாற்றில் குறிப்பிடப்படுகிறது.

இதையும் படியுங்கள்

அமெரிக்கா அதிரடி! ‘கிரீன் கார்டு’ முதல் ‘குடியுரிமை’ வரை ஏற்பட்டுள்ள புதிய மாற்றம்

அமெரிக்காவின் கல்லூரிகள் மற்றும் பல்கலைக்கழக வளாகங்களில் துப்பாக்கிச்சூடு சம்பவங்கள் தொடர்ந்து பதிவாகி வருகின்றன. Gun Violence Archive தரவுகளின்படி, 2025ஆம் ஆண்டில் உயர்கல்வி நிறுவனங்களில் துப்பாக்கிச்சூட்டில் ஒருவர் காயமடைந்த அல்லது உயிரிழந்த 100 சம்பவங்கள் பதிவாகியிருந்தன.

வர்ஜீனியாவில் இடம்பெற்ற மிக மோசமான பல்கலைக்கழக துப்பாக்கிச்சூடுகளில் ஒன்றாக 2007ஆம் ஆண்டு Virginia Tech பல்கலைக்கழகத்தில் இடம்பெற்ற தாக்குதல் கருதப்படுகிறது. அப்போது துப்பாக்கிதாரி நடத்திய தாக்குதலில் 32 பேர் உயிரிழந்ததுடன், 17 பேர் காயமடைந்தனர்.

இதேவேளை, இந்த ஆண்டின் தொடக்கத்தில் Old Dominion Universityயில் Reserve Officers’ Training Corps (ROTC) குழுவை நோக்கி நடத்தப்பட்ட துப்பாக்கிச்சூட்டில் பயிற்றுநர் ஒருவர் உயிரிழந்ததுடன், மேலும் இருவர் காயமடைந்திருந்தனர்.

இதையும் படியுங்கள்

'தாக்குதலுக்கு தயார் ஆனால், நான் மக்களைக் கொல்ல விரும்பவில்லை' – ஈரானுடன் பேச்சுவார்த்தைக்கு திரும்பிய டிரம்ப்!