வெள்ளை மாளிகை அருகே துப்பாக்கிச் சூடு: அமெரிக்க தலைநகரில் பரபரப்பு

அமெரிக்காவின் தலைநகர் வாஷிங்டனில் உள்ள வெள்ளை மாளிகை அருகே ஏற்பட்ட துப்பாக்கிச் சூடு சம்பவம் பெரும் பரபரப்பை ஏற்படுத்தியுள்ளது. பாதுகாப்பு பணியில் இருந்த ரகசிய சேவை அதிகாரிகள் உடனடியாக பதிலடி நடவடிக்கையில் ஈடுபட்டதாகவும், அந்த நடவடிக்கையில் சந்தேக நபர் உயிரிழந்ததாகவும் ஆரம்ப தகவல்கள் தெரிவிக்கின்றன.

சம்பவம் நடைபெற்றதும் பாதுகாப்பு அமைப்புகள் முழு எச்சரிக்கையுடன் செயல்பட்டன. அமெரிக்காவின் முக்கிய பாதுகாப்பு மையமாக கருதப்படும் வெள்ளை மாளிகை சுற்றுவட்டாரப் பகுதியில் பாதுகாப்பு மேலும் பலப்படுத்தப்பட்டது. சம்பவம் குறித்து எஃப்.பி.ஐ அதிகாரிகள் தீவிர விசாரணை நடத்தி வருகின்றனர்.

இந்த விவகாரம் தொடர்பாக பேசிய எஃப்.பி.ஐ இயக்குநர் காஷ் படேல், ரகசிய சேவை அதிகாரிகள் மிக விரைவாக செயல்பட்டதாக தெரிவித்துள்ளார். துப்பாக்கிச் சூடு நடந்ததாக தகவல் கிடைத்த உடனே பாதுகாப்பு அணிகள் சம்பவ இடத்தை கட்டுப்பாட்டுக்குள் கொண்டுவந்ததாக கூறப்படுகிறது.

ரகசிய சேவை செய்தித் தொடர்பாளர் அந்தோணி குக்லியால்மி அளித்த தகவலின்படி, 17வது தெரு மற்றும் பென்சில்வேனியா அவென்யூ அருகே துப்பாக்கிச் சூடு நடந்தது உறுதிசெய்யப்பட்டுள்ளது. சம்பவம் நடந்த பகுதி உடனடியாக பாதுகாப்பு வளையத்துக்குள் கொண்டு வரப்பட்டது.

அந்த நேரத்தில் வெள்ளை மாளிகை அருகே இருந்த பத்திரிகையாளர்களும் துப்பாக்கிச் சூடு சத்தம் கேட்டதாக தெரிவித்துள்ளனர். சிலர் 20 முறை வரை துப்பாக்கி வெடித்த சத்தம் கேட்டதாக கூறியுள்ளனர். பாதுகாப்பு காரணங்களால் அங்கிருந்த ஊடகத்தினருக்கு உடனடியாக பாதுகாப்பான பகுதிக்குச் செல்ல அறிவுறுத்தப்பட்டது.

ஏபிசி நியூஸ் செய்தியாளர் செலினா வாங் நேரலையில் செய்தி வழங்கிக் கொண்டிருந்தபோது திடீரென துப்பாக்கிச் சூடு சத்தம் கேட்டதால் பாதுகாப்புக்காக பதுங்கிச் சென்ற காட்சி சமூக வலைதளங்களில் பரவி வருகிறது. பின்னர் பேசிய அவர், பல முறை துப்பாக்கிச் சத்தம் கேட்டதாகவும், உடனடியாக செய்தியாளர் சந்திப்பு அறைக்குச் செல்லுமாறு அதிகாரிகள் அறிவுறுத்தியதாகவும் தெரிவித்தார்.

இந்த சம்பவத்தால் வாஷிங்டன் நகரில் பாதுகாப்பு அமைப்புகள் உயர் எச்சரிக்கையில் வைக்கப்பட்டுள்ளன. சம்பவத்திற்கான காரணம் மற்றும் சந்தேக நபரின் பின்னணி குறித்து அதிகாரிகள் தொடர்ந்து விசாரணை மேற்கொண்டு வருகின்றனர்.