இலங்கையில் காற்று மாசுபாட்டால் ஆண்டுக்கு 7,000 பேர் உயிரிழப்பு – உங்கள் வீட்டிலேயே மறைந்திருக்கும் ஆபத்து!
காற்று மாசுபாடு, இலங்கையில் மிகப்பெரிய பொது சுகாதார அச்சுறுத்தலாக உருவெடுத்து வருவதாக சுகாதார அமைச்சு எச்சரித்துள்ளது.
நாட்டில் ஆண்டுதோறும் சுமார் 7,000 பேர் காற்று மாசுபாட்டின் தாக்கத்தால் உயிரிழப்பதாக சுகாதார அமைச்சின் சுற்றாடல் மற்றும் தொழில்சார் சுகாதாரப் பணிப்பாளர் வைத்தியர் சாந்தனி விதான தெரிவித்தார்.
சுகாதார மேம்பாட்டுப் பணியகத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்து வெளியிட்ட அவர், உலகளாவிய அளவில் ஒவ்வொரு ஆண்டும் 7 முதல் 8 மில்லியன் பேர் வரை காற்று மாசுபாட்டால் ஏற்படும் உடல்நலப் பாதிப்புகளால் உயிரிழக்கின்றனர் என்றும் கூறினார்.
அவர் மேலும் தெரிவிக்கையில், உலகம் முழுவதும் காற்று மாசுபாட்டின் அளவு தொடர்ந்து அதிகரித்து வருவதால், அதனுடன் தொடர்புடைய மரணங்களும் ஆண்டுதோறும் உயர்ந்து வருகின்றன என்றார்.
அதேபோல், இலங்கையிலும் காற்று மாசுபாட்டால் ஏற்படும் சுகாதாரப் பிரச்சினைகள் கவலைக்கிடமாக அதிகரித்துள்ளதாக அவர் சுட்டிக்காட்டினார்.
எந்த நோய்கள் ஏற்படுகின்றன?
காற்றில் கலக்கும் நுண்துகள்கள் மற்றும் நச்சுப் பொருட்கள் மனித உடல்நலத்துக்கு கடுமையான பாதிப்புகளை ஏற்படுத்துகின்றன.
காற்று மாசுபாட்டால் ஏற்படும் முக்கிய நோய்கள்:
ஆஸ்துமா
மூச்சுத்திணறல்
நாள்பட்ட நுரையீரல் நோய்கள்
மாரடைப்பு
இதய நோய்கள்
பக்கவாதம்
நுரையீரல் புற்றுநோய்
வீட்டுக்குள்ளேயே அதிக ஆபத்து
வெளிப்புற காற்று மாசுபாட்டை விட வீட்டுக்குள்ளான காற்று மாசுபாடு ஐந்து மடங்கு அதிகமாக இருக்கலாம் என்றும் வைத்தியர் சாந்தனி விதான எச்சரித்தார்.
குறிப்பாக, விறகு அடுப்பு மற்றும் மண்ணெண்ணெய் அடுப்பைப் பயன்படுத்தி போதுமான காற்றோட்டம் இல்லாத சமையலறைகளில் உணவு சமைப்பதால், தீங்கு விளைவிக்கும் புகை வீட்டுக்குள்ளேயே தேங்கி குடும்ப உறுப்பினர்கள் தொடர்ந்து அதனை சுவாசிக்க நேரிடுகிறது என்றார்.
முன்னொரு காலத்தில் புகைப்பிடித்த ஆண்களிடமே அதிகமாகக் காணப்பட்ட நுரையீரல் புற்றுநோய், தற்போது புகைப்பிடிக்காத பெண்களிடமும் அதிகரித்து வருவதற்கு வீட்டுக்குள்ளான புகை மாசுபாடும் ஒரு முக்கிய காரணமாக இருப்பதாக அவர் விளக்கமளித்தார்.
எனவே, வீடுகளில் போதுமான காற்றோட்டத்தை ஏற்படுத்துதல், புகை வெளியேறும் வசதியுடன் சமையல் மேற்கொள்ளுதல் மற்றும் சுத்தமான எரிபொருட்களைப் பயன்படுத்துதல் போன்ற நடவடிக்கைகள் மூலம் காற்று மாசுபாட்டின் தாக்கத்தை குறைக்க முடியும் என்றும் அவர் வலியுறுத்தினார்.
உட்புற காற்று மாசுபாடு
பொதுவாக காற்று மாசுபாடு என்றால் வெளியில் வாகனங்களின் புகை, தொழிற்சாலைகளின் புகை போன்றவற்றையே நாம் நினைக்கிறோம். ஆனால், வீட்டுக்குள்ளேயே ஏற்படும் காற்று மாசுபாடு (Indoor Air Pollution) பல நேரங்களில் வெளிப்புற காற்று மாசுபாட்டை விட அதிக ஆபத்தானதாக இருக்கிறது என்று சுகாதார நிபுணர்கள் எச்சரிக்கின்றனர்.
இலங்கை சுகாதார அமைச்சின் தகவலின்படி, காற்று மாசுபாட்டால் ஆண்டுதோறும் சுமார் 7,000 பேர் உயிரிழக்கின்றனர். இதில், வீட்டுக்குள் ஏற்படும் புகை மாசுபாடும் முக்கிய காரணிகளில் ஒன்றாகக் கருதப்படுகிறது.
குறிப்பாக, கிராமப்புறங்களில் இன்னும் பல குடும்பங்கள் விறகு அடுப்பு, கரி அடுப்பு மற்றும் மண்ணெண்ணெய் அடுப்புகளை பயன்படுத்தி சமையல் செய்கின்றன. போதுமான காற்றோட்டம் இல்லாத சமையலறைகளில் இந்த எரிபொருட்களிலிருந்து வெளியாகும் புகை வீட்டுக்குள்ளேயே தேங்கி, குடும்ப உறுப்பினர்கள் தொடர்ந்து அதனை சுவாசிக்க வேண்டிய நிலை ஏற்படுகிறது.
சுகாதார அமைச்சின் சுற்றாடல் மற்றும் தொழில்சார் சுகாதாரப் பிரிவு தெரிவித்துள்ளதன்படி, வீட்டுக்குள்ளான வளி மாசுபாடு வெளிப்புற வளி மாசுபாட்டை விட சுமார் 5 மடங்கு அதிகமாக இருக்கக்கூடும்.
எப்படி பாதுகாத்துக்கொள்வது?
சமையலறையில் போதுமான காற்றோட்டத்தை ஏற்படுத்துங்கள்.
புகை வெளியேறும் சிம்னி அல்லது எக்ஸாஸ்ட் விசிறியை பயன்படுத்துங்கள்.
இயன்றவரை எரிவாயு அல்லது மின்சார அடுப்புகளை பயன்படுத்துங்கள்.
வீட்டுக்குள் புகைப்பிடிப்பதை முற்றிலும் தவிர்க்குங்கள்.
குழந்தைகள் மற்றும் முதியவர்கள் புகை நிறைந்த இடங்களில் நீண்ட நேரம் இருப்பதைத் தவிர்க்குங்கள்.
வீடு பாதுகாப்பான இடம் என்றாலும், காற்றின் தரத்தை கவனிக்காவிட்டால் அதுவே உடல்நலத்துக்கு மிகப்பெரிய அச்சுறுத்தலாக மாறக்கூடும். வீட்டுக்குள்ளான வளி மாசுபாட்டைக் குறைப்பது ஒவ்வொரு குடும்பத்தின் பொறுப்பாகும்.
கூகுளில் நியூஸ்21ஐ பின்தொடரவும்
கூகுள் செய்திகளில் எங்களின் முக்கியச் செய்திகளை உடனுக்குடன் பெற கிளிக் செய்யவும்.
→
