புதிய மொழியைக் கற்றால் மூளை இளமையாகுமா? ஆய்வு சொல்வது என்ன?
புதிய மொழியைக் கற்றுக்கொள்வது வெறும் தொடர்பாடல் திறனை மட்டுமல்ல, மூளையின் செயல்திறனையும் மேம்படுத்தி, அதன் வயதான செயல்முறையை மந்தப்படுத்த உதவக்கூடும் என்று சமீபத்திய ஆய்வு ஒன்று சுட்டிக்காட்டியுள்ளது.
ஆய்வில், ஒன்றுக்கு மேற்பட்ட மொழிகளைப் பேசும் நபர்களின் மூளைச் செயல்பாடுகள் விரிவாக ஆய்வு செய்யப்பட்டன. அதில், பல மொழிகளைப் பேசுபவர்களின் மூளை, அவர்களின் உண்மையான வயதை விட இளமையாக செயல்படுவதாக ஆராய்ச்சியாளர்கள் கண்டறிந்துள்ளனர்.
ஆய்வின் முடிவுகளின்படி, இரண்டு மொழிகளைப் பேசும் நபர்களின் மூளை சராசரியாக 6 ஆண்டுகள் இளமையாகவும், நான்கு மொழிகளைப் பேசும் நபர்களின் மூளை சுமார் 13 ஆண்டுகள் இளமையாகவும் காணப்பட்டதாக தெரிவிக்கப்பட்டுள்ளது.
இந்த ஆய்வில் சுமார் 720 பேரின் மூளைச் செயல்பாடுகள் பகுப்பாய்வு செய்யப்பட்டதுடன், முடிவுகளைத் துல்லியமாக மதிப்பிடுவதற்காக செயற்கை நுண்ணறிவு (AI) தொழில்நுட்பமும் பயன்படுத்தப்பட்டது.
மேலும், சிறு வயதிலேயே புதிய மொழிகளைக் கற்றவர்கள் அதிகளவு நன்மைகளைப் பெற்றிருப்பதாகவும் ஆய்வில் தெரியவந்துள்ளது. இருப்பினும், ஒருவரின் வாழ்க்கைமுறை, கல்வி, உடற்பயிற்சி, உணவுப் பழக்கம் மற்றும் சமூகச் செயல்பாடுகள் போன்ற காரணிகளும் மூளையின் ஆரோக்கியத்தில் முக்கிய பங்கு வகிக்கக்கூடும் என ஆய்வாளர்கள் குறிப்பிட்டுள்ளனர்.
இதனால், இந்த ஆய்வின் முடிவுகளை முழுமையான காரண–விளைவு உறவாகக் கருதாமல், கவனத்துடன் அணுக வேண்டும் என்றும் நிபுணர்கள் வலியுறுத்தியுள்ளனர்.
அதேவேளை, எந்த வயதிலும் புதிய மொழியைக் கற்றுக்கொள்வது மூளைக்கு நல்ல பயிற்சியாக அமையும் என்பதிலும் அவர்கள் ஒருமித்த கருத்தை வெளியிட்டுள்ளனர்.
இந்த ஆய்வு, பல்வேறு வட்டாரங்கள் மற்றும் சமூகப் பின்னணிகளைச் சேர்ந்த மக்களின் மூளைச் செயல்பாடுகளை ஒப்பிட்டு மேற்கொள்ளப்பட்டதாகவும் தெரிவிக்கப்பட்டுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
