குளியலறையிலிருந்து நேரலை: நியூசிலாந்து பெண் கவுன்சிலரின் செயலால் இணையத்தில் பரபரப்பு!
நியூசிலாந்தைச் சேர்ந்த அரசியல்வாதி ஒருவர், தனது குளியலறையிலிருந்து உத்தியோகபூர்வ சபைக் கூட்டத்தில் வீடியோ அழைப்பு மூலம் கலந்துகொண்டது பெரும் விவாதத்தையும் சிரிப்பையும் ஏற்படுத்தியுள்ளது.
டுனெடின் சிட்டி கவுன்சில் (Dunedin City Council) கூட்டத்தில் கவுன்சிலர் ஜோ காலர் (Jo Galer) திங்கட்கிழமை அன்று இணைந்தபோது, அவருக்குப் பின்னால் துணிகள் தொங்கிக்கொண்டிருந்தன.
அவர் கூட்டத்தில் உள்நுழைந்ததும், அவரது சக ஊழியர்களிடையே அடக்கப்பட்ட சிரிப்பொலி கேட்டது. நிலைமையை உணர்ந்த மேயர் சோபி பார்கர் (Sophie Barker), "உங்கள் கேமராவை நீங்கள் நகர்த்த விரும்பலாம்" என்று எச்சரித்தார்.
அதற்குப் பதிலளித்த ஜோ காலர், "ஏன், கேமரா எங்கே இருக்கிறது?" என்று கேட்டுவிட்டு, பின்னர், "நீங்கள் எனது துணிகளைப் பார்க்கலாம், என்னையும் பார்க்கலாம் — அதில் எனக்குப் பிரச்சனை ஏதுமில்லை" என்று மிகவும் நம்பிக்கையுடன் கூறிவிட்டு, உள்ளூர் அரசாங்க சீர்திருத்தம் குறித்துப் பேசத் தொடங்கினார்.
இருப்பினும், அவர் பேசிய விடயத்தை விட, கேமராவில் தெரிந்த மற்றொரு காட்சி இணையவாசிகளைப் பெரிதும் கவர்ந்தது. குளியலறையின் கண்ணாடி கதவுக்குப் பின்னால் ஒரு மர்மமான நிழல் உருவம் அசைவது போன்ற காட்சி வீடியோவில் பதிவாகியிருந்தது.
சமூக ஊடகங்களில் இது குறித்துப் பதிவிட்ட பலரும், "குளியலறையில் இருந்தது யார்? அவர் ஏன் அங்கிருக்கிறார்?" என்று கேள்வி எழுப்பினர்.
"அவர் பேசுவதை நான் கவனிக்கவே இல்லை, யாராவது சோப்பு கேட்டு கத்துவார்களா என்றுதான் பார்த்துக் கொண்டிருந்தேன்" என்று ஒருவர் கிண்டலாகப் பதிவிட்டிருந்தார்.
இந்த வீடியோ அமெரிக்காவின் பல செய்தி நிறுவனங்களால் பகிரப்பட்டு, ஆயிரக்கணக்கான பார்வைகளைப் பெற்று வைரலாகி வருகிறது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
