10 ஆண்டுகளுக்குப் பின் சீனா செல்லும் அமெரிக்க அதிபர்! ஈரான் போரால் டிரம்ப்பின் பயணம் ஒத்திவைப்பு: புதிய தேதி அறிவிப்பு!

அமெரிக்க அதிபர் டொனால்ட் டிரம்ப், வரும் மே 14 மற்றும் 15 ஆகிய தேதிகளில் சீனாவிற்குப் பயணம் மேற்கொண்டு அந்நாட்டு அதிபர் ஜி ஜின்பிங்கைச் சந்திக்க உள்ளார். கடந்த 10 ஆண்டுகளில் அமெரிக்க அதிபர் ஒருவர் சீனாவிற்குச் செல்வது இதுவே முதல் முறையாகும். 

உண்மையில் இந்தப் பயணம் மார்ச் மாத இறுதியில் நடைபெறவிருந்தது. ஆனால், பிப்ரவரி 28-ம் தேதி முதல் அமெரிக்கா மற்றும் இஸ்ரேல் கூட்டுப் படைகள் ஈரான் மீது தொடுத்துள்ள போர் காரணமாக, இந்தப் பயணம் தற்காலிகமாக ஒத்திவைக்கப்பட்டது. 

தனது நாட்டின் ராணுவ நடவடிக்கைகளை அருகிலிருந்து கண்காணிக்க வேண்டிய கட்டாயம் இருப்பதால், பயணத்தை ஒரு மாதம் தள்ளிவைக்க சீனாவிடம் டிரம்ப் கோரிக்கை விடுத்திருந்தார்.

அதிபர் டிரம்ப்பின் பயணத் தேதிகளை வெள்ளை மாளிகையின் ஊடகச் செயலாளர் கேரோலின் லீவிட் (Karoline Leavitt) நேற்று (மார்ச் 25, 2026) உறுதிப்படுத்தினார். "போர்ச் சூழலில் அதிபர் டிரம்ப் வாஷிங்டனில் இருக்க வேண்டியதன் அவசியத்தை சீன அதிபர் ஜி ஜின்பிங் உணர்ந்துள்ளார். எங்களின் கோரிக்கையை ஏற்றுப் பயணத்தை ஒத்திவைக்க அவர் சம்மதம் தெரிவித்தார்" என்று லீவிட் செய்தியாளர்களிடம் கூறினார்.

மேலும், இந்தப் போரானது அடுத்த 4 முதல் 6 வாரங்களுக்குள் முடிவுக்கு வரும் என்று வெள்ளை மாளிகை கணித்துள்ளதால், மே மாதத்தில் இந்தப் பயணம் சுமூகமாக நடைபெறும் என்று எதிர்பார்க்கப்படுகிறது.

தனது 'ட்ரூத் சோசியல்' (Truth Social) தளத்தில் இது குறித்து பதிவிட்டுள்ள டிரம்ப், "இந்த வரலாற்றுப் பயணத்திற்கான ஏற்பாடுகளை எங்கள் அதிகாரிகள் இறுதி செய்து வருகின்றனர். இது ஒரு பிரம்மாண்டமான நிகழ்வாக அமையும்" என்று குறிப்பிட்டுள்ளார். 

மேலும், இதே ஆண்டின் இறுதியில் சீன அதிபர் ஜி ஜின்பிங் அமெரிக்காவிற்கு வந்து வாஷிங்டனில் தங்கியிருக்கப் போவதையும் அவர் உறுதிப்படுத்தியுள்ளார். 

மேற்காசியப் போரினால் உலகப் பொருளாதாரமும், எரிசக்தி பாதுகாப்பும் பாதிக்கப்பட்டுள்ள நிலையில், உலகின் இரு பெரும் வல்லரசுத் தலைவர்கள் மே மாதம் சந்திக்கவிருப்பது மிகுந்த முக்கியத்துவம் வாய்ந்ததாகக் கருதப்படுகிறது. குறிப்பாக, ஈரான் விவகாரத்தில் சீனாவின் ஒத்துழைப்பை டிரம்ப் கோருவார் என்று அரசியல் விமர்சகர்கள் கருதுகின்றனர்.