உலகக் கோப்பை கால்பந்து நடுவர் ஓமர் ஆர்ட்டான் அமெரிக்காவுக்கு நுழைய அனுமதி மறுப்பு

சோமாலியாவின் சிறந்த கால்பந்து நடுவரான ஓமர் அப்துல்காதிர் ஆர்ட்டான் (Omar Abdulkadir Artan), 2026 ஆம் ஆண்டுக்கான உலகக் கோப்பை கால்பந்து தொடரில் நடுவராகப் பங்கேற்பதற்கு அமெரிக்கா அனுமதி மறுத்ததை அடுத்து, வெளியேற்றப்பட்டுள்ளார். 

கடந்த சனிக்கிழமை இஸ்தான்புல்லில் இருந்து மியாமி சர்வதேச விமான நிலையத்திற்கு வந்திறங்கிய அவர், சோதனைக்குப் பின்னர் நாடு திரும்பும்படி அமெரிக்க சுங்கம் மற்றும் எல்லைப் பாதுகாப்புத் துறையினரால் (CBP) அறிவுறுத்தப்பட்டார். உலகக் கோப்பை தொடரின் தொடக்கத்திற்கு சில நாட்களுக்கு முன்பு நடைபெற்ற இந்தச் சம்பவம், விளையாட்டுத் துறையில் பரபரப்பை ஏற்படுத்தியுள்ளது.

சர்வதேச கால்பந்து சம்மேளனமான பிபா (FIFA) வெளியிட்ட அறிக்கையில், ஓமர் ஆர்ட்டான் உலகக் கோப்பையில் நடுவராகப் பணியாற்ற முடியாது என்பதை உறுதிப்படுத்தியது. 2025 ஆம் ஆண்டு ஆப்பிரிக்க கால்பந்து கூட்டமைப்பின் (CAF) சிறந்த நடுவராகத் தேர்ந்தெடுக்கப்பட்ட இவர், ஒரு சோமாலியர் உலகக் கோப்பை கால்பந்து போட்டியில் நடுவராகப் பங்கேற்பது இதுவே முதல் முறையாகும் எனும் வரலாற்றுச் சிறப்புமிக்க சாதனையைப் படைத்திருந்தார். துரதிர்ஷ்டவசமாக, இந்தச் சாதனை இப்போது அவரால் நிகழ்த்த முடியாமல் போய்விட்டது.

FIFA வெளியிட்டுள்ள மேலதிக விளக்கத்தில், "ஓமர் ஆர்ட்டான் நடுவர் பணியில் இருந்து தகுதி நீக்கம் செய்யப்பட்டுள்ளார். நாட்டின் குடிவரவு நடைமுறைகளில் FIFA எந்த வகையிலும் தலையிட முடியாது. அமெரிக்க அதிகாரிகளின் முடிவே இறுதியானது. முந்தைய FIFA நிகழ்வுகளைப் போலவே, யாருக்கு நுழைய அனுமதி வழங்குவது என்பதைப் புரவலன் நாடே தீர்மானிக்கும்" என்று தெரிவிக்கப்பட்டுள்ளது.

அமெரிக்க சுங்கம் மற்றும் எல்லைப் பாதுகாப்புத் துறையினரின் விளக்கத்தில், ஓமர் ஆர்ட்டான் சரிபார்ப்புக்காகக் கூடுதல் சோதனைக்கு உட்படுத்தப்பட்டதாகவும், அந்த சோதனையின் முடிவில் 'சரிபார்ப்பில் ஏற்பட்ட கவலைகள்' காரணமாக நுழையத் தடை விதிக்கப்பட்டதாகவும் கூறப்பட்டுள்ளது. 

ஆனால், அந்தக் 'கவலைகள்' குறித்து அவர்கள் எதுவும் வெளிப்படையாகத் தெரிவிக்கவில்லை. எனினும், சோமாலியா அமெரிக்க அதிபர் டொனால்ட் டிரம்ப் (Donald Trump) நிர்வாகம் மீண்டும் அறிமுகப்படுத்திய பயணத் தடை பட்டியலில் இடம்பெற்றுள்ள நாடுகளில் ஒன்றாகும் என்பது குறிப்பிடத்தக்கது. 'சோமாலியா உலகின் மோசமான நாடு' என்று அதிபர் டிரம்ப் விமர்சித்துள்ளார்.

இந்தத் தடைக்கு எதிர்ப்புத் தெரிவித்து, சோமாலிய விளையாட்டுத் துறை அமைச்சின் மூத்த ஆலோசகரும் முன்னாள் தேசிய அணித் தலைவருமான சிஸ் அடன் அப்ஷிர், "ஆப்பிரிக்காவின் மிகவும் மதிப்புமிக்க நடுவர்களில் ஒருவரான ஓமர் ஆர்ட்டானுக்கு முழு கால்பந்து சமூகத்தின் ஆதரவும் தேவை. அவருக்குள் நுழைய அமெரிக்கா அனுமதி மறுத்ததும், திட்டமிடப்பட்ட போட்டிகளில் நடுவராகப் பணியாற்றுவதைத் தடுப்பதும், அவருக்கு மட்டுமல்ல, நேர்மை, தகுதி மற்றும் விளையாட்டு உணர்வுக்கான கால்பந்தின் உறுதிப்பாட்டையும் குறைமதிப்பிற்கு உட்படுத்துகிறது" என்று கூறியுள்ளார். 

மேலும், நடுவரான ஓமர் ஆர்ட்டானுக்கு செல்லுபடியாகும் அமெரிக்க விசா இருந்ததாகவும் அப்ஷிர் தெரிவித்தார். தூதரக உதவியுடன் அவர் பெற்றிருந்த இராஜதந்திர பாஸ்போர்ட் மற்றும் செல்லுபடியாகும் விசா ஆகியவை அவருக்கு அமெரிக்காவில் நுழைவதற்குப் போதுமானதாக இல்லை என்பது கவனத்திற்குரியது.

கடந்த ஏப்ரல் மாதம், உலகக் கோப்பை தொடருக்கான நடுவர்கள் பட்டியலில் தனது பெயர் இடம்பெற்றதை அடுத்து, ஓமர் ஆர்ட்டானை சோமாலிய அதிபர் ஹசன் ஷேக் மொஹமுத் பாராட்டினார். "நடுவர் ஓமரின் முயற்சி, தொழில்முறை மற்றும் நேர்மையை நான் பாராட்டுகிறேன், ஏனெனில் அவர் புதிய சோமாலிய தலைமுறைக்கு ஒரு உத்வேக சின்னமாக மாறியுள்ளார்" என அதிபர் கூறியிருந்தார்.