நீதிபதிகளின் ஓய்வு பெறும் வயதை அதிகரிக்கும் முன்மொழிவின் அடிப்படை குறித்து சஜித் கேள்வி
இந்த விவகாரம் தேசிய முக்கியத்துவம் வாய்ந்தது என்றும், இது நீதித்துறையின் சுதந்திரம் மற்றும் பொதுமக்களின் நம்பிக்கையை நேரடியாகப் பாதிக்கும் என்றும் அவர் எச்சரித்துள்ளார்.
உச்சநீதிமன்றம் மற்றும் மேன்முறையீட்டு நீதிமன்ற நீதிபதிகளின் ஓய்வு பெறும் வயதை அதிகரிக்கும் அரசாங்கத்தின் முன்மொழிவு குறித்து தெளிவான விளக்கத்தை வழங்குமாறு எதிர்க்கட்சித் தலைவர் சஜித் பிரேமதாச கோரிக்கை விடுத்துள்ளார்.
இந்த விவகாரம் தேசிய முக்கியத்துவம் வாய்ந்தது என்றும், இது நீதித்துறையின் சுதந்திரம் மற்றும் பொதுமக்களின் நம்பிக்கையை நேரடியாகப் பாதிக்கும் என்றும் அவர் எச்சரித்துள்ளார்.
நாடாளுமன்றத்தில் இன்று (11) உரையாற்றிய அவர், இந்தத் தீர்மானத்தை மேற்கொள்வதற்கு அடிப்படையாக அமைந்த உத்தியோகபூர்வ மதிப்பீடுகள், கொள்கை அறிக்கைகள் அல்லது தரவு அடிப்படையிலான ஆய்வுகளை அரசாங்கம் சமர்ப்பிக்க வேண்டும் என்று வலியுறுத்தினார்.
20ஆவது அரசியலமைப்புத் திருத்தத்தின் மூலம் உயர் நீதிமன்ற நீதிபதிகளின் எண்ணிக்கை ஏற்கெனவே அதிகரிக்கப்பட்டுள்ள நிலையில், ஓய்வு பெறும் வயதை மேலும் நீடிப்பதற்கான தேவையையும் நியாயத்தையும் அவர் கேள்விக்குட்படுத்தினார்.
நாடாளுமன்றத்தில் மேலும் உரையாற்றிய எதிர்க்கட்சித் தலைவர், “தற்போது உச்சநீதிமன்றத்தில் நான்கு மற்றும் மேன்முறையீட்டு நீதிமன்றத்தில் நான்கு என மொத்தம் எட்டு நீதிபதி பணியிடங்கள் காலியாக உள்ளன. இந்தப் பணியிடங்களை நிரப்புவதற்குப் பதிலாக, ஓய்வு பெறும் வயதை அதிகரிப்பதற்கு அரசாங்கம் ஏன் முன்னுரிமை அளிக்கிறது” என்று அவர் கேள்வி எழுப்பினார்.
முறையான திட்டமிடல் இன்றி சேவைக் காலத்தை நீடிப்பது நீதிபதிகளின் கண்ணியத்தைக் குறைப்பதோடு, நீதித்துறையின் சுதந்திரம் மீதான பொதுமக்களின் நம்பிக்கையையும் சீர்குலைக்கும் என இலங்கை சட்டத்தரணிகள் சங்கம் ஏற்கெனவே கவலை தெரிவித்துள்ளதாகவும் அவர் சுட்டிக்காட்டினார்.
இத்தகைய முன்மொழிவுகள் எதிர்கால அரசாங்கங்கள் தங்களது அரசியல் தேவைகளுக்கு ஏற்ப நீதித்துறையின் கட்டமைப்பை மாற்றுவதற்கு ஒரு ஆபத்தான முன்னுதாரணத்தை ஏற்படுத்தக்கூடும் என்று சஜித் பிரேமதாச எச்சரித்தார்.
நீண்டகாலமாக பணியிடங்கள் நிரப்பப்படாததால், பல தகுதியுள்ள நீதிபதிகள் ஏற்கெனவே ஓய்வு பெற்றுள்ளதாக அவர் சுட்டிக்காட்டினார்.
மேலும், வழக்குத் தாமதங்கள் மற்றும் நீதிபதிகள் பற்றாக்குறை நிலவும் இக்கட்டான சூழலில், நீதித்துறையின் சுதந்திரத்தைப் பாதுகாக்கவும், பொதுமக்களின் அவநம்பிக்கையைப் போக்கவும் அரசாங்கம் உறுதியான நடவடிக்கைகளை எடுக்க வேண்டும் என்று அவர் வலியுறுத்தினார்.
