இலங்கை கடற்பரப்பில் உயிரிழந்த 84 ஈரான் கடற்படையினரின் உடல்கள் தாய்நாட்டிற்கு அனுப்ப ஏற்பாடு
இலங்கை தெற்குக் கடற்பரப்பில் இடம்பெற்ற கடற்படை சம்பவத்தில் உயிரிழந்த 84 ஈரான் கடற்படையினரின் உடல்கள் இன்று (13) ஈரானுக்கு அனுப்புவதற்கான ஏற்பாடுகள் செய்யப்பட்டுள்ளதாக பாதுகாப்பு அமைச்சு அறிவித்துள்ளது. இந்த உடல்கள் மத்தல சர்வதேச விமான நிலையத்திலிருந்து விசேட விமானம் மூலம் ஈரானுக்கு அனுப்பப்பட உள்ளதாகவும், இந்த நடவடிக்கை இலங்கையில் உள்ள ஈரான் தூதரகத்துடன் இணைந்து ஒருங்கிணைக்கப்படுவதாகவும் தெரிவிக்கப்பட்டுள்ளது.
உயிரிழந்த கடற்படையினரின் உடல்கள் இதுவரை காலி தேசிய வைத்தியசாலையில் அமைக்கப்பட்டிருந்த இரண்டு மொபைல் குளிர்சாதன சேமிப்பு பிரிவுகளில் பாதுகாப்பாக வைக்கப்பட்டிருந்தன. நீதிமன்ற உத்தரவின் அடிப்படையில் இன்று அவை லொறிகளில் மத்தல விமான நிலையத்துக்கு கொண்டு செல்லப்பட்டன. இன்று அதிகாலை 45 உடல்கள் முதலில் மாற்றப்பட்ட நிலையில், பிற்பகலில் மீதமுள்ள 39 உடல்களும் மாற்றப்பட்டதாக அதிகாரிகள் தெரிவித்துள்ளனர்.
இந்த மாதத்தின் தொடக்கத்தில், சுமார் 180 பேர் இருந்ததாகக் கூறப்படும் ஈரான் கடற்படைக்குச் சேர்ந்த IRIS Dena கப்பல் காலி துறைமுகத்திலிருந்து சுமார் 40 கடல் மைல் தொலைவில் விபத்துக்குள்ளானதாக தகவல்கள் வெளியாகின. அந்தச் சம்பவத்தில் இருந்து மீட்கப்பட்ட 35 கடற்படையினர் கராப்பிட்டிய வைத்தியசாலையில் சிகிச்சைக்காக அனுமதிக்கப்பட்டனர். அதே நேரத்தில் 84 பேரின் உடல்கள் மீட்கப்பட்டதாகவும் உறுதிப்படுத்தப்பட்டது.
இந்த சம்பவத்துக்கு பின்னர் அமெரிக்க பாதுகாப்பு செயலாளர் பீட்டர் ஹெக்செத் வெளியிட்ட தகவலில், அந்த ஈரான் கப்பல் சர்வதேச கடற்பரப்பில் அமெரிக்க நீர்மூழ்கிக் கப்பலில் இருந்து ஏவப்பட்ட டார்பிடோ தாக்குதலால் மூழ்கடிக்கப்பட்டதாக கூறப்பட்டுள்ளது. இந்த சம்பவம் சர்வதேச அரசியல் மற்றும் பாதுகாப்பு வட்டாரங்களில் பரபரப்பை ஏற்படுத்தியுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
