சாதனையை தகர்த்த 'கோலி, ரோஹித் ஜோடி.. இந்தியா அபார வெற்றி!

உலகக் கோப்பை இன்றைய லீக் ஆட்டத்தில் இந்தியா, பங்களாதேஷ் ஆகிய அணிகள் மோதின. பேட்டர்களுக்கு சாதகமான இந்த பிட்சில் அதிக ஸ்கோர் அடிக்கும் முனைப்பில் பங்களாதேஷ் அணி முதலில் பேட்டிங்கை தெரிவு செய்தது.

பேட்டர்களுக்கு சாதகமான இந்த பிட்சில், ஸ்விங் இருக்காது என்பதால், பங்களாதேஷ் ஓபனர்கள் தொடர்ந்து, இறங்கி இறங்கி அடித்து அசத்தினார்கள். குறிப்பாக, பும்ராவுக்கு எதிராக தன்ஷித் ஹாசன் சிக்ஸர் அடித்ததன் மூலமே, பிட்ச் பேட்டர்களுக்கு சாதகம் என்பது தெரிய வந்தது. 

ஓபனர்கள் இருவரும் பொறுப்புடன் விளையாடி தன்ஷித் ஹாசன் 51 (43), லிடன் தாஸ் 66 (82) இருவரும் சிறப்பாக விளையாடி அசத்தினார்கள். இப்படி இருவரும் நல்ல துவக்கம் தந்தப் பிறகு, மற்ற பங்களாதேஷ் பேட்டர்கள், இந்த ஸ்கோரை அப்படியே முன்னெடுத்து செல்ல தவறினார்கள்.

ஓபனர்கள் இரண்டு பேரும் அதிரடியாக செயல்பட்டப் பிறகு பங்களாதேஷ் கேப்டன் ஷான்டோ 8 (17), மெஹிடி ஹாசன் 3 (13) ஆகிய முக்கிய பேட்டர்கள் அடுத்தடுத்து ஆட்டமிழந்து ஷாக் கொடுத்தனர்.

இந்திய அணியின் வெற்றிக்கு காரணமாக ரோஹித் ட்ரிக்.. பயத்தில் இருந்து மீண்ட இந்திய வீரர்கள்!

இருவரும் சொற்ப ரன்களுக்கு ஆட்டமிழந்ததுதான், இப்போட்டியில் பெரிய திருப்புமுனையாக அமைந்தது. அடுத்து, தௌகித் க்ரிடோய் 16 (35) சொதப்பியதும் பெரும் பின்னடைவாக அமைந்தது. இதனால், பங்களாதேஷ் ஓபனர்கள் கட்டமைத்த இன்னிங்ஸ், அப்படியே பெரும் சரிவை கண்டது.

இதனைத் தொடர்ந்து, இறுதிக் கட்டத்தில், முஷ்பிகுர் ரஹீம் 34 பந்துகளில் தலா 3 பவுண்டரி, சிக்ஸர்களை விளாசி 46 ரன்களை எடுத்து அசத்தினார். இதனால், பங்களாதேஷ் அணி 250 ரன்களை தொட்டுவிடும் என்ற நம்பிக்கை பிறந்தது. 

முஷ்பிகுர் ஆட்டமிழந்தப் பிறகு, இவர் விட்ட இடத்தில் இருந்து முகமதுல்லா 46 (36) சிறப்பாக விளையாடினார். இதனால், பங்களாதேஷ் அணி 50 ஓவர்கள் முடிவில் 256/8 ரன்களை மட்டுமே சேர்த்தது.

புனே மைதானம் பேட்டர்களுக்கு சாதகமாக இருக்கும் எனக் கணிக்கப்பட்டதால், இந்திய அணி சுலபமாக இந்த ஸ்கோரை சேஸ் செய்துவிடும் எனக் கருதப்பட்டது. அதேபோல், இந்திய அணி ஓபனர்கள் ரோஹித் ஷர்மா 48 (40), ஷுப்மன் கில் 53 (55) இருவரும் அதிரடியாக விளையாடி அசத்தினார்கள். 

இறுதிக் கட்டத்தில் விராட் கோலி 103 (97), கே.எல்.ராகுல் 34 (34) இருவரும் சிறப்பாக விளையாடியதால், இந்திய அணி 41.3 ஓவர்கள் முடிவில் 261/3 ரன்களை குவித்து, 7 விக்கெட்கள் வித்தியாசத்தில் அபார வெற்றியைப் பெற்றது.

இப்போட்டியில் கோலி, ரோஹித் ஆகியோர் அபாரமாக செயல்பட்டதன் மூலம், உலகக் கோப்பையில் கோலி 1248* ரன்களுடனும், ரோஹித் 1243 ரன்களுடனும் பிரையன் லாரா (1225), டிவிலியர்ஸ் (1207) ஆகியோரது சாதனைகளை தகர்த்து, உலகக் கோப்பையில் அதிக ரன்கள் அடித்தோர் பட்டியலில் 4, 5 ஆகிய இடங்களில் இருக்கிறார்கள். 

சச்சின் (2278), ரிக்கி பாண்டிங் (1743), சங்ககாரா (1532) ஆகியோர் முதல் மூன்று இடங்களில் இருக்கிறார்கள்.