பேஸ்புக் ஊடாக வாகனங்களை விற்பனை செய்வதாகக் கூறி பண மோசடி: 21 வயது இளைஞன் கைது
பேஸ்புக் வர்த்தகக் கணக்கொன்றின் ஊடாக வாகனங்களை விற்பனை செய்வதற்கு விளம்பரம் செய்து தருவதாகக் கூறி, பொதுமக்களிடம் பணம் பெற்று மோசடியில் ஈடுபட்ட குற்றச்சாட்டில் 21 வயது இளைஞன் ஒருவர், ஹோமாகம பகுதியில் வைத்துக் கைது செய்யப்பட்டுள்ளார்.
ஹோமாகம, மாவத்தகம பகுதியில் வைத்து நேற்றிரவு மத்திய குற்றப் புலனாய்வுப் பணியக அதிகாரிகளால் குறித்த சந்தேகநபர் கைது செய்யப்பட்டார் என பொலிஸார் தெரிவித்தனர்.
சந்தேகநபர் தொலைபேசி வாயிலாக வாகன உரிமையாளர்களைத் தொடர்புகொண்டு, அவர்களின் வாகனங்களை தனது பேஸ்புக் வர்த்தகப் பக்கத்தில் விளம்பரப்படுத்தி விற்பனை செய்ய உதவுவதாகக் கூறி, ஆசைவார்த்தை காட்டியுள்ளமை விசாரணைகளில் தெரியவந்துள்ளது.
இதற்காக ஒரு வார விளம்பரத்துக்கு 5,000 ரூபாயும், இரண்டு வாரங்களுக்கு 10,000 ரூபாயும், ஒரு மாத கால விளம்பரத்துக்கு 15,000 ரூபாயும் என அவர் கட்டணம் வசூலித்துள்ளார்.
எனினும், வாக்குறுதியளித்தவாறு சமூக வலைத்தளத்தில் விளம்பரங்களை வெளியிடாமல் பணத்தை மட்டும் பெற்றுக்கொண்டு மக்களை அவர் மோசடி செய்துள்ளார் என பொலிஸார் குறிப்பிட்டுள்ளனர்.
சந்தேகநபருக்கு எதிராக குற்றவியல் நம்பிக்கை துரோகம், ஆள்மாறாட்டம் செய்து ஏமாற்றுதல் மற்றும் குற்றவியல் ரீதியான பண மோசடி ஆகிய குற்றச்சாட்டுகள் முன்வைக்கப்பட்டுள்ளன.
மாவத்தகம, ஹோமாகம பிரதேசத்தைச் சேர்ந்த குறித்த இளைஞனிடம் மத்திய குற்றப் புலனாய்வுப் பணியக அதிகாரிகள் மேலதிக விசாரணைகளை முன்னெடுத்து வருகின்றனர்.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
