வங்கக்கடலில் ஆழ்ந்த காற்றழுத்த தாழ்வு மண்டலம்: இலங்கையின் பல பகுதிகளில் பலத்த மழைக்கு வாய்ப்பு!
கொழும்பு, ஒக்டோபர் 26: வங்காள விரிகுடாவின் கிழக்கு மத்திய மற்றும் அதனை அண்மித்த தென்கிழக்குக் கடற்பகுதிகளில் நிலைகொண்டிருந்த காற்றழுத்த தாழ்வு மண்டலம், தற்போது ஆழ்ந்த காற்றழுத்த தாழ்வு மண்டலமாக வலுப்பெற்றுள்ளதாக இலங்கை வளிமண்டலவியல் திணைக்களம் அறிவித்துள்ளது.
குறித்த வானிலைத் தொகுதி இன்று (26) புயலாகவும், நாளை (27) தீவிர புயலாகவும் மேலும் வலுப்பெறுவதற்கான அதிக சாத்தியம் காணப்படுவதாகத் தெரிவிக்கப்பட்டுள்ளது.
இந்த வானிலைத் தொகுதியால் இலங்கைக்கு நேரடிப் பாதிப்பு ஏற்படும் என எதிர்பார்க்கப்படாத போதிலும், அதனுடன் தொடர்புடைய காற்றோட்டம் நாட்டின் குறுக்காகப் பரவுவதால் அடுத்த சில நாட்களில் பல பகுதிகளில் மழைவீழ்ச்சி அதிகரிக்கக்கூடும் என எச்சரிக்கப்பட்டுள்ளது.
வளிமண்டலவியல் திணைக்களத்தின் தகவல்களின்படி, ஆழ்ந்த காற்றழுத்த தாழ்வு மண்டலம் மேற்கு நோக்கி நகர்ந்து வட அகலாங்கு 15.3 பாகை மற்றும் கிழக்கு நெட்டாங்கு 89.7 பாகைக்கு அருகில் மையம் கொண்டுள்ளது.
இந்தத் தொகுதி தொடர்ந்து மேற்கு திசையில் நகர்ந்து, இன்று (26) கிழக்கு மத்திய மற்றும் அதனை அண்மித்த தென்கிழக்கு வங்காள விரிகுடாவில் புயலாக வலுப்பெறக்கூடும் என எதிர்பார்க்கப்படுகிறது.
அதனைத் தொடர்ந்து மேற்கு மற்றும் வடமேற்கு திசையில் நகர்ந்து, நாளை (27) மேற்கு மத்திய வங்காள விரிகுடாவில் தீவிர புயலாக மேலும் வலுப்பெறுவதற்கான அதிக வாய்ப்புள்ளதாக முன்னறிவிக்கப்பட்டுள்ளது.
இந்நிலையில், இலங்கையின் தென்மேற்குப் பகுதிகளில் அடுத்த சில நாட்களில் மழையுடனான வானிலை மேலும் அதிகரிக்கக்கூடும் என வளிமண்டலவியல் திணைக்களம் தெரிவித்துள்ளது.
வடக்கு, மேல், சப்ரகமுவ, தென், வடமேல், மத்திய மற்றும் வடமத்திய மாகாணங்களிலும், திருகோணமலை மாவட்டத்திலும் அவ்வப்போது மழை அல்லது இடியுடன் கூடிய மழை பெய்யக்கூடும்.
குறிப்பாக இந்தப் பகுதிகளின் சில இடங்களில் 100 மில்லிமீற்றருக்கும் அதிகமான பலத்த மழைவீழ்ச்சி பதிவாகக்கூடும் என எச்சரிக்கப்பட்டுள்ளது.
மேலும், ஊவா மாகாணத்திலும் அம்பாறை மற்றும் மட்டக்களப்பு மாவட்டங்களிலும் பிற்பகல் 1.00 மணிக்குப் பின்னர் பல இடங்களில் மழை அல்லது இடியுடன் கூடிய மழை பெய்யக்கூடும் என எதிர்பார்க்கப்படுகிறது.
இதற்கிடையில், மத்திய மலைநாட்டின் மேற்கு சரிவுப் பகுதிகள், வடக்கு, வடமத்திய மற்றும் வடமேல் மாகாணங்களிலும், திருகோணமலை மற்றும் அம்பாந்தோட்டை மாவட்டங்களிலும் அவ்வப்போது பலத்த காற்று வீசக்கூடும்.
குறித்த பகுதிகளில் காற்றின் வேகம் மணித்தியாலத்திற்கு 40 முதல் 50 கிலோமீற்றர் வரை அதிகரிக்கக்கூடும் என வளிமண்டலவியல் திணைக்களம் தெரிவித்துள்ளது.
இடியுடன் கூடிய மழை பெய்யும் சந்தர்ப்பங்களில் தற்காலிகமாக வீசும் பலத்த காற்று மற்றும் மின்னல் தாக்கங்களால் விபத்துகள் ஏற்படக்கூடும் என்பதால், பொதுமக்கள் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளனர்.
குறிப்பாக இடியுடன் கூடிய மழை நிலவும் போது திறந்தவெளிப் பகுதிகளில் நிற்பதையும், மரங்களின் கீழ் தஞ்சமடைவதையும் தவிர்ப்பது அவசியமாகும்.
அத்துடன் பலத்த காற்று வீசும் சந்தர்ப்பங்களில் பாதுகாப்பற்ற மரங்கள், மின்கம்பிகள் மற்றும் தற்காலிக கட்டமைப்புகளுக்கு அருகில் செல்வதைத் தவிர்க்குமாறும் பொதுமக்களுக்கு அறிவுறுத்தப்படுகிறது.
வங்காள விரிகுடாவில் உருவாகியுள்ள ஆழ்ந்த காற்றழுத்த தாழ்வு மண்டலம் தீவிர புயலாக வலுப்பெறக்கூடிய நிலையில், இலங்கைக்கு நேரடித் தாக்கம் எதிர்பார்க்கப்படாவிட்டாலும், பலத்த மழை மற்றும் காற்று தொடர்பில் பொதுமக்கள் அவதானத்துடன் செயற்பட வேண்டுமென வளிமண்டலவியல் திணைக்களம் வலியுறுத்தியுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
