இலங்கையின் 6 மாவட்டங்களுக்கு இரண்டாம் நிலை மண்சரிவு எச்சரிக்கை: நாளை மாலை 4 மணி வரை அமுல்!

நாட்டில் நிலவும் மழையுடனான காலநிலையைக் கருத்திற்கொண்டு, இலங்கையின் ஆறு மாவட்டங்களிலுள்ள பல பிரதேசங்களுக்கு இரண்டாம் நிலை மண்சரிவு அபாய எச்சரிக்கை விடுக்கப்பட்டுள்ளது. தேசிய கட்டிட ஆராய்ச்சி நிறுவனம் (NBRI) இன்று செவ்வாய்க்கிழமை (10.11.2026) இந்த எச்சரிக்கையை வெளியிட்டுள்ளது.

இதன்படி, இன்று மாலை 4 மணி முதல் நாளை புதன்கிழமை (11.11.2026) மாலை 4 மணி வரையான 24 மணித்தியாலங்களுக்கு இந்த எச்சரிக்கை அமுலில் இருக்கும்.

இரண்டாம் நிலை என வகைப்படுத்தப்படும் செம்மஞ்சள் நிற (Amber – Level 2) மண்சரிவு எச்சரிக்கை பதுளை, காலி, கண்டி, கேகாலை, நுவரெலியா மற்றும் இரத்தினபுரி ஆகிய ஆறு மாவட்டங்களின் குறிப்பிட்ட பிரதேச செயலகப் பிரிவுகளுக்கு விடுக்கப்பட்டுள்ளது.

குறித்த பிரதேசங்களில் மண்சரிவு ஏற்படக்கூடிய இடங்களில் வசிக்கும் மக்கள் கூடுதல் அவதானத்துடன் செயற்படுமாறு அறிவுறுத்தப்பட்டுள்ளனர்.

எச்சரிக்கை விடுக்கப்பட்டுள்ள பிரதேசங்கள்

• பதுளை மாவட்டம்: பசறை

• காலி மாவட்டம்: நாகொட

• கண்டி மாவட்டம்: உடுதும்பர

• கேகாலை மாவட்டம்: தெஹியோவிட்ட, தெரணியகல

• நுவரெலியா மாவட்டம்: வலப்பனை, நில்தண்டாஹின்ன, அம்பகமுவ கோரளை

• இரத்தினபுரி மாவட்டம்: வெலிகேபொல, அயகம, எஹெலியகொட, எலபாத்த

இதேவேளை, நாட்டின் மேலும் பல பிரதேசங்களுக்கு முதலாம் நிலை மஞ்சள் நிற (Yellow – Level 1) மண்சரிவு எச்சரிக்கையும் நீடிக்கப்பட்டுள்ளது.

இதன்படி, பதுளை, கொழும்பு, காலி, களுத்துறை, கண்டி, கேகாலை, மொனராகலை, நுவரெலியா மற்றும் இரத்தினபுரி ஆகிய ஒன்பது மாவட்டங்களின் குறிப்பிட்ட பிரதேச செயலகப் பிரிவுகள் இந்த எச்சரிக்கையின் கீழ் வருகின்றன.

முதலாம் நிலை எச்சரிக்கை விடுக்கப்பட்டுள்ள பகுதிகளில் வசிப்போரும் நிலவும் மழையுடனான காலநிலை குறித்து அவதானமாக இருக்குமாறு அறிவுறுத்தப்பட்டுள்ளனர்.

மண்சரிவு அபாயம் உள்ள பகுதிகளில் வசிப்போர் சுற்றுப்புறச் சூழலில் ஏற்படும் மாற்றங்களைத் தொடர்ந்து அவதானிக்குமாறு தேசிய கட்டிட ஆராய்ச்சி நிறுவனம் அறிவுறுத்தியுள்ளது.

நிலத்தில் புதிதாக வெடிப்புகள் அல்லது விரிசல்கள் ஏற்படுதல், மரங்கள் அல்லது மின்கம்பங்கள் வழக்கத்திற்கு மாறாகச் சாய்தல், மலைச்சரிவுகளில் மண் மற்றும் சேறு திடீரெனக் கீழ்நோக்கிப் பாய்தல், நிலத்தின் மேற்பரப்பில் வழக்கத்திற்கு மாறான மாற்றங்கள் தென்படுதல். இவ்வாறான அறிகுறிகள் காணப்பட்டால் அவற்றை அலட்சியப்படுத்தாமல், பாதுகாப்பான இடத்திற்குச் செல்லத் தயாராக இருக்குமாறு அறிவுறுத்தப்பட்டுள்ளது.

மண்சரிவு அபாயம் அதிகமுள்ள பகுதிகளில் தொடர்ச்சியாகக் கடும் மழை பெய்யும் சந்தர்ப்பங்களில் மக்கள் தங்களது பாதுகாப்பிற்கு முன்னுரிமை வழங்க வேண்டும். குறிப்பாக மலைச்சரிவுகள், செங்குத்தான நிலப்பகுதிகள் மற்றும் ஏற்கெனவே மண்சரிவு அபாயம் அடையாளம் காணப்பட்டுள்ள இடங்களில் வசிப்போர் அதிகாரிகளின் அறிவுறுத்தல்களைப் பின்பற்றுவது அவசியமாகும்.

தேவை ஏற்படும் பட்சத்தில் பாதுகாப்பான இடங்களுக்கு வெளியேறுவதற்கான முன்னேற்பாடுகளை மேற்கொள்ளுமாறும் அறிவுறுத்தப்பட்டுள்ளது.மேலும், உள்ளூர் அனர்த்த முகாமைத்துவ அதிகாரிகள் மற்றும் பொலிஸாரால் வழங்கப்படும் அறிவிப்புகளைத் தொடர்ந்து கவனிக்குமாறு பொதுமக்கள் கேட்டுக்கொள்ளப்பட்டுள்ளனர்.