நாட்டில் பலத்த மழை: 30,000க்கும் மேற்பட்ட இடங்கள் மண்சரிவு அபாயத்தில்! தாழ்நிலப் பகுதிகளுக்கு வெள்ள எச்சரிக்கை

தற்போது நாடளாவிய ரீதியில் பெய்து வரும் பலத்த மழையினால் 30,000க்கும் மேற்பட்ட இடங்கள் மண்சரிவு அதி-அபாயப் பகுதிகளாக அடையாளம் காணப்பட்டுள்ளதாக தேசிய கட்டிட ஆராய்ச்சி நிறுவனத்தின் சிரேஷ்ட புவியியலாளர் கலாநிதி வசந்த சேனாதீர தெரிவித்தார். 

அரசாங்கத் தகவல் திணைக்களத்தில் இன்று வியாழக்கிழமை (22) நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவித்த அவர், இந்த மாதம் 3ஆம் திகதி முதல் இதுவரையான காலப்பகுதியில் 25 மண்சரிவு முன்னெச்சரிக்கை அறிவித்தல்கள் புதுப்பிக்கப்பட்டு வெளியிடப்பட்டுள்ளதாகக் குறிப்பிட்டார். முன்னைய 'டித்வா' புயல் தாக்கத்தால் பல பகுதிகளில் மண்சரிவுக்கான ஆரம்ப அறிகுறிகள் தென்பட்டுள்ள நிலையில், தற்போதைய மழையினால் பாறைகளும் மண் அடுக்குகளும் அடித்துச் செல்லப்படும் கடும் அபாயம் ஏற்பட்டுள்ளதாகவும் அவர் சுட்டிக்காட்டினார்.

ஒரு குறிப்பிட்ட பகுதிக்கு குறைந்தளவு மழைவீழ்ச்சி பதிவான போதிலும், கடந்த சில நாட்களில் பெய்த தொடர் மழையைக் கருத்தில்கொண்டு இந்த எச்சரிக்கைகள் செல்லுபடியாகும் என அறிவிக்கப்பட்டுள்ளது. 

நேற்று பெய்த மழைவீழ்ச்சியைத் தொடர்ந்து கண்டி மாவட்டத்தின் உடபலாத்த, மெததும்பர, குண்டசாலை ஆகிய பகுதிகளுக்கும், நுவரெலியா மாவட்டத்தின் அம்பகமுவ, நோர்வுட் ஆகிய பகுதிகளுக்கும், இரத்தினபுரி மாவட்டத்தின் இரத்தினபுரி, எலபாத, குருவிட்ட ஆகிய பகுதிகளுக்கும் இரண்டாம் நிலை மண்சரிவு அபாய எச்சரிக்கை விடுக்கப்பட்டுள்ளதுடன், அபாயகரமான பகுதிகளில் வாழும் மக்கள் மிகுந்த அவதானத்துடன் இருக்குமாறு அறிவுறுத்தப்பட்டுள்ளனர்.

இதேவேளை, தெதுரு ஓயா ஆற்றுப்படுகையின் மேல் மற்றும் மத்திய பகுதிகளில் பெய்த கணிசமான மழைவீழ்ச்சி காரணமாக ஆற்றின் நீர்மட்டம் வெள்ளப் பெருக்கின் மட்டத்தை நெருங்கியுள்ளதாக நீர்ப்பாசனத் திணைக்களம் எச்சரித்துள்ளது. 

இதன் காரணமாக தெதுரு ஓயா நீர்த்தேக்கத்தின் வான் கதவுகள் திறக்கப்பட்டு, வினாடிக்கு 16,500 கன அடி என்ற வேகத்தில் நீர் ஆற்றுக்குள் திறந்து விடப்பட்டு வருகிறது. இதனால் வாரியப்பொல, நிகவெரட்டிய, மஹோ, கொபேகனே, பிங்கிரிய, பள்ளம, சிலாபம், ஆரச்சிகட்டுவ, ரஸ்நாயக்கபுர ஆகிய தாழ்நிலப் பகுதிகளில் வாழும் மக்கள் வெள்ளப் பெருக்கு குறித்து மிகுந்த எச்சரிக்கையுடன் இருக்குமாறு அறிவுறுத்தப்பட்டுள்ளதுடன், நீரின் வரத்தைப் பொறுத்து நீர் வெளியேற்றப்படும் அளவு மேலும் அதிகரிக்கப்படலாம் எனவும் தெரிவிக்கப்பட்டுள்ளது.

மழையுடனான வானிலை எதிர்வரும் நாட்களில் மேலும் வலுவடையும்

நாட்டில் நிலவும் மழையுடனான வானிலை எதிர்வரும் நாட்களில் மேலும் வலுவடையும் என வளிமண்டலவியல் திணைக்களத்தின் எதிர்வுகூறல் பிரிவின் பணிப்பாளர் மெரில் மெண்டிஸ் தெரிவித்துள்ளார். நாட்டுக்கு அருகில் காணப்பட்ட குறைந்த அழுத்தப் பிரதேசம் படிப்படியாக மேற்கு நோக்கி நகர்ந்து வருவதாலும், இலங்கையை சூழ இடை அயன மண்டல ஒன்றிணைவு வலயம் காணப்படுவதாலும் நாட்டின் பல பகுதிகளில் நாள் முழுவதும் மழை பெய்து வருகிறது. சில பகுதிகளில் 100 மில்லிமீட்டருக்கும் அதிகமான பலத்த மழை பெய்து வருவதுடன், நாளைய தினமும் நாட்டின் அனைத்துப் பகுதிகளிலும் நாள் முழுவதும் மழை நிலைமை தொடரும் என கணிக்கப்பட்டுள்ளது.

ஒக்டோபர் 23 ஆம் திகதியளவில் அந்தமான் தீவுகளைச் சூழ உருவாகக்கூடிய குறைந்த அழுத்தப் பிரதேசம் மேலும் தீவிரமடைந்து காற்றழுத்த தாழ்வு மண்டலமாக மாறக்கூடும் எனத் தெரிவிக்கப்பட்டுள்ளது. இதனால் இலங்கைக்கு நேரடித் தாக்கம் ஏற்படாது எனினும், காற்று வீசும் திசை காரணமாக நாட்டின் தென்மேற்குப் பகுதியில் காணப்படும் மழை நிலைமை ஒக்டோபர் 27 ஆம் திகதி வரை நீடிக்கும் என அறிவிக்கப்பட்டுள்ளது. அத்துடன் வங்காள விரிகுடாவின் ஆழ்கடல் பகுதியில் மீன்பிடி நடவடிக்கைகளில் ஈடுபடும் பலநாள் படகுகளின் மீனவர்கள், வானிலை திணைக்களத்தின் அடுத்தடுத்த அறிவித்தல்கள் குறித்து மிகுந்த அவதானத்துடன் செயற்படுமாறு கேட்டுக்கொள்ளப்பட்டுள்ளனர்.