இன்னும் நான்கு ஆண்டுகளுக்கு நாட்டில் தேர்தல்கள் இருக்காது

இன்னும் மூன்று அல்லது நான்கு ஆண்டுகளுக்கு நாட்டில் தேர்தல் நடத்தப்படாது என்று தேர்தல் ஆணையாளர் நாயகம் சமன் ஸ்ரீ ரத்நாயக்க தெரிவித்துள்ளார்.

நாட்டில் பதிவுசெய்யப்பட்ட வாக்காளர்கள் தேர்தலில் வாக்களிப்பதை கட்டாயமாக்குவதற்கும், வாக்களிக்காதவர்களுக்கு அபராதம் விதிக்கவும் திட்டங்கள் இருப்பதாகவும் அவர் குருநாகலில் கூறியுள்ளார்.

2026 - 2029 காலகட்டத்திற்கான தேர்தல் ஆணைக்குழுவின் மூலோபாயத் திட்டத்தைத் தயாரிப்பது குறித்து குருநாகல் மாவட்டத்தில் உள்ள கட்சிக் குழுக்களின் கருத்துக்களைப் பெறுவதற்காக மாவட்ட தேர்தல் அலுவலகத்தில் நடைபெற்ற கலந்துரையாடலின் போது அவர் இந்தக் கருத்தை வெளியிட்டார்.

நாட்டில் ஒவ்வொரு தேர்தலுக்கும் செலவிடப்படும் பெரும் தொகையைக் கருத்தில் கொண்டு, ஒரு தேர்தலில் அதிகபட்ச முடிவுகளை அடையும் நோக்கில் இதுபோன்ற ஒரு முடிவு செயல்படுத்தப்படும் என்று நம்புவதாக தேர்தல் ஆணையாளர் தெரிவித்தார். எதிர்கால தேர்தல்களுக்கான வைப்புத் தொகையை அதிகரிக்க நடவடிக்கை எடுப்பதாகவும் தேர்தல் ஆணையர் மேலும் தெரிவித்தார்

“நாட்டில் வரவிருக்கும் தேர்தல்களுக்கு நாம் புதிய விதிகளை அமைக்க வேண்டும். தேர்தல் ஆணைக்குழுவாக  இதற்காக நாங்கள் பெரும் சுமையைச் சுமக்கிறோம். அதன்படி, தேர்தல் சட்டங்களைத் தயாரித்து மாற்றுவதற்கு இதுவே சிறந்த நேரம். 

அரசாங்கத்திற்கு மூன்றில் இரண்டு பங்கு பெரும்பான்மை உள்ளது. எனவே, இந்த சட்டங்களை இயற்றுவது எளிது. தேர்தல் என்பது முற்றிலும் சட்டபூர்வமான ஒரு செயல்முறையாகும். 

எனவே, தேர்தல்களுக்கான சட்ட சீர்திருத்தங்கள் கொண்டுவரப்பட வேண்டும். சட்டம் இல்லாமல் தேர்தலை நடத்த முடியாது. நாங்கள் இதுவரை 42 திட்டங்களை அரசாங்கத்திடம் சமர்ப்பித்துள்ளோம்” என்று அவர் குறிப்பிட்டுள்ளார்.