மாணவர்களுக்கு கல்விக்கான விசா வழங்குவதை நிறுத்த இங்கிலாந்து அதிரடி தீர்மானம்
பிரிட்டன் அரசு, தஞ்சம் கோரும் விண்ணப்பங்கள் அதிகரித்துள்ளதை காரணமாகக் காட்டி, ஆப்கானிஸ்தான், கேமரூன், மியான்மர் மற்றும் சூடான் ஆகிய நாடுகளைச் சேர்ந்தவர்களுக்கு கல்வி விசா வழங்குவதை நிறுத்துவதாக மார்ச் 3 அன்று அறிவித்துள்ளது. இதனுடன், ஆப்கானிஸ்தான் நாட்டவர்களுக்கு வேலை விசா வழங்குவதும் இடைநிறுத்தப்பட்டுள்ளது. இது தஞ்சம் கோருபவர்களை கட்டுப்படுத்தும் விரிவான நடவடிக்கைகளின் ஒரு பகுதியாகும்.
Home Office வெளியிட்ட தகவலின்படி, 2021ஆம் ஆண்டிலிருந்து சட்டப்பூர்வமான வழிகளின் மூலம் சுமார் 1,35,000 பேர் தஞ்சம் கோருவதற்காக பிரிட்டனில் நுழைந்துள்ளனர். குறிப்பாக, மேற்கண்ட நான்கு நாடுகளைச் சேர்ந்த மாணவர்களின் தஞ்சம் கோரிக்கை 2021 முதல் 2025 வரை 470 சதவீதத்திற்கும் அதிகமாக உயர்ந்துள்ளதாக தெரிவிக்கப்பட்டுள்ளது.
உள்துறை செயலாளர் Shabana Mahmood வெளியிட்ட அறிக்கையில், “போர் மற்றும் துன்புறுத்தலிலிருந்து தப்பியோடும் மக்களுக்கு பிரிட்டன் எப்போதும் பாதுகாப்பளிக்கும். ஆனால் எங்கள் விசா முறை தவறாக பயன்படுத்தப்படக்கூடாது. அதனால் தான் எங்கள் நல்லெண்ணத்தை பயன்படுத்த முயல்பவர்களுக்கு விசா மறுக்கும் முன்னெப்போதும் இல்லாத தீர்மானத்தை எடுக்கிறேன்” என்று கூறினார்.
பிரிட்டன் அரசியலில் குடியேற்றம் முக்கிய பிரச்சினையாக மாறியுள்ள நிலையில், குடியேற்ற எதிர்ப்பு நிலைப்பாட்டுடன் Reform UK கட்சி கருத்துக்கணிப்புகளில் முன்னேற்றம் கண்டுவருகிறது. மேலும், English Channel வழியாக பிரான்ஸிலிருந்து சிறிய படகுகள் மூலம் சட்டவிரோத குடியேற்றம் தொடர்ந்தும் அதிகரித்து வருவது அரசுக்கு சவாலாக உள்ளது.
2025ஆம் ஆண்டில் மாணவர் விசா மூலம் வந்தவர்களின் தஞ்சம் கோரிக்கைகளை அரசு 20 சதவீதம் குறைத்துள்ளதாக உள்துறை அமைச்சகம் தெரிவித்தாலும், கல்வி விசா மூலம் வருவோர் இன்னும் மொத்த விண்ணப்பங்களில் 13 சதவீதம் உள்ளதாகவும், கூடுதல் நடவடிக்கைகள் அவசியம் எனவும் கூறப்பட்டுள்ளது.
