2027 பட்ஜெட்டில் மக்களுக்கு நிவாரணம் இல்லை: சஜித் பிரேமதாச கடும் விமர்சனம்

இலங்கையின் 2027ஆம் ஆண்டுக்கான வரவு செலவுத் திட்டம், அதிகரித்து வரும் வாழ்க்கைச் செலவு, வறுமை மற்றும் வேலையின்மை போன்ற மக்களின் முக்கிய பிரச்சினைகளுக்குப் போதுமான தீர்வுகளை வழங்கவில்லை என எதிர்க்கட்சித் தலைவர் சஜித் பிரேமதாச குற்றஞ்சாட்டியுள்ளார். ஜனாதிபதி அநுர குமார திசாநாயக்க நவம்பர் 12ஆம் திகதி நாடாளுமன்றத்தில் வரவு செலவுத் திட்டத்தைச் சமர்ப்பித்த பின்னர் ஊடகங்களுக்குக் கருத்துத் தெரிவித்தபோதே அவர் இவ்வாறு குறிப்பிட்டுள்ளார். 

நாட்டின் சுமார் 2.2 கோடி மக்களும் அன்றாட வாழ்க்கைச் செலவுகளைச் சமாளிப்பதில் பல்வேறு சிரமங்களை எதிர்கொள்வதாக சஜித் பிரேமதாச தெரிவித்துள்ளார்.அத்தியாவசியப் பொருட்களின் விலை உயர்வு, பணவீக்கம் மற்றும் குடும்பங்களின் பொருளாதாரச் சுமையைக் குறைப்பதற்கான நடைமுறைச் சாத்தியமான நடவடிக்கைகள் வரவு செலவுத் திட்டத்தில் போதுமான அளவில் இடம்பெறவில்லை என அவர் சுட்டிக்காட்டியுள்ளார்.

இதேவேளை, பொருளாதார வளர்ச்சி தொடர்பான புள்ளிவிவரங்களை வெளியிடுவதுடன், அந்த வளர்ச்சியின் பயன்கள் சாதாரண மக்களைச் சென்றடைவதையும் அரசாங்கம் உறுதிப்படுத்த வேண்டும் என அவர் வலியுறுத்தியுள்ளார். கல்வித் தகைமைகளைக் கொண்ட இளைஞர்கள் வேலைவாய்ப்புகளைப் பெறுவதில் எதிர்கொள்ளும் சிரமங்கள் குறித்தும் எதிர்க்கட்சித் தலைவர் கவலை வெளியிட்டுள்ளார்.

அத்துடன், சர்வதேச நாணய நிதியத்தின் தரவுகளின்படி இளைஞர்களின் வேலையின்மை 43 சதவீதமாக இருப்பதாக அவர் குறிப்பிட்டுள்ளார். இளைஞர்களுக்கான புதிய தொழில் வாய்ப்புகளை உருவாக்கவும், தொழில்முனைவோரை ஊக்குவிக்கவும் தெளிவான திட்டங்கள் அவசியம் என அவர் தெரிவித்துள்ளார்.

மேலும், இலங்கையில் வறுமை நிலை தொடர்பாகவும் சஜித் பிரேமதாச அரசாங்கத்திடம் கேள்வி எழுப்பியுள்ளார்.உலக வங்கியின் தரவுகளின்படி நாட்டின் வறுமை நிலை 60 சதவீதத்தைத் தாண்டுவதாக அவர் கூறியுள்ளார். 

இலங்கையின் நுண், சிறு மற்றும் நடுத்தர தொழில் நிறுவனங்கள் (MSMEs) பொருளாதாரத்தில் முக்கிய பங்களிப்பை வழங்குவதாக எதிர்க்கட்சித் தலைவர் தெரிவித்துள்ளார். சுமார் 40 இலட்சம் பேருக்கு இத்துறை வேலைவாய்ப்புகளை வழங்குவதுடன், நாட்டின் மொத்த உள்நாட்டு உற்பத்தியில் 52 சதவீதப் பங்களிப்பை வழங்குவதாகவும் அவர் குறிப்பிட்டுள்ளார்.

இத்தகைய நிறுவனங்கள் கடந்த பொருளாதார நெருக்கடியால் பாதிக்கப்பட்டுள்ள நிலையில், அவற்றை மீண்டும் வலுப்படுத்துவதற்கான போதிய நடவடிக்கைகள் வரவு செலவுத் திட்டத்தில் இல்லை என அவர் விமர்சித்துள்ளார்.

அரசாங்கம் முன்மொழிந்துள்ள வட்டியில்லாக் கடன் திட்டங்களின் நடைமுறைச் சாத்தியத்தன்மை குறித்தும் சஜித் பிரேமதாச கேள்வி எழுப்பியுள்ளார். தற்போதைய வங்கிக் கட்டமைப்பின் ஊடாகக் கடன்களை வழங்கும்போது, ஏற்கெனவே வங்கிகளுடன் சிறந்த நிதித் தொடர்புகளைக் கொண்டவர்களே அதிக பயனடையக்கூடும் என அவர் சுட்டிக்காட்டியுள்ளார்.

பொருளாதார நெருக்கடியின்போது கடன்களைத் திருப்பிச் செலுத்த முடியாமல் பாதிக்கப்பட்ட தொழில்முனைவோர், புதிய கடன்களைப் பெறுவதிலும் தடைகளை எதிர்கொள்ள நேரிடலாம் என்றும், கடன் வழங்கும் நடைமுறைகளில் மாற்றங்களை ஏற்படுத்தாமல் வட்டியில்லாக் கடன்களை அறிவிப்பது மட்டும் போதுமானதாக இருக்காது என அவர் தெரிவித்துள்ளார்.

புதிய தொழில்களை ஆரம்பிக்க விரும்பும் இளைஞர்களுக்கு ஆரம்ப மூலதனமும், தொழில்களைத் தொடர்ந்து நடத்துவதற்கான செயற்பாட்டு மூலதனமும் அவசியம் என எதிர்க்கட்சித் தலைவர் குறிப்பிட்டுள்ளார். ஆனால், இந்த நிதித் தேவைகளைப் பூர்த்திசெய்வதற்கான போதிய நடைமுறைகள் அரசாங்கத்தின் முன்மொழிவுகளில் தெளிவாக இல்லை என அவர் விமர்சித்துள்ளார்.

இளைஞர்களைத் தொழில்முனைவோராக மாற்றுவதற்கான திட்டங்கள் வெற்றிபெற வேண்டுமெனில் நிதி அணுகல், தொழில்நுட்ப உதவி மற்றும் சந்தை வாய்ப்புகளும் வழங்கப்பட வேண்டும் என அவர் வலியுறுத்தியுள்ளார்.

ஜனாதிபதி வெளியிட்ட பொருளாதாரத் தரவுகள், நாட்டின் வளர்ச்சி வேகம் குறைவதையும் பணவீக்கம் அதிகரிப்பதையும் காட்டுவதாக சஜித் பிரேமதாச கூறியுள்ளார்.மக்களின் அடிப்படைத் தேவைகளைப் பூர்த்திசெய்வதில் ஏற்படும் சிரமங்கள் தொடர்ந்தால் சமூக அதிருப்தி அதிகரிக்கக்கூடும் என்றும் அவர் எச்சரித்துள்ளார்.