கொழும்பில் காணி விலை மீண்டும் உயர்வு! 2026 முதல் பாதியில் 5.9% வளர்ச்சி!
கொழும்பு மாவட்டத்தின் ஒட்டுமொத்த காணி மதிப்பு குறியீடு (LVI) 2026ஆம் ஆண்டின் முதல் பாதியில் (ஜனவரி-ஜூன்) 5.9 சதவீதம் அதிகரித்து 271.6ஆக பதிவாகியுள்ளது.
இந்த வளர்ச்சி விகிதமானது, கடந்த 2025ஆம் ஆண்டின் முதல் பாதியில் பதிவான 11.4 சதவீத வளர்ச்சியுடன் ஒப்பிடுகையில் கணிசமாகக் குறைந்துள்ளது என்று இலங்கை மத்திய வங்கியின் தரவுகள் தெரிவிக்கின்றன.
இருப்பினும், 2025ஆம் ஆண்டின் இரண்டாம் பாதியுடன் ஒப்பிடுகையில், இந்த குறியீடு 3.7 சதவீதம் உயர்ந்து, சொத்துச் சந்தையின் வளர்ச்சி வேகம் அதிகரித்துள்ளது. இது அதற்கு முந்தைய அரையாண்டு காலத்தில் பதிவான 2.1 சதவீத வளர்ச்சியை விட அதிகமாகும்.
மத்திய வங்கியின் தரவுகளின்படி, குடியிருப்பு, வர்த்தகம் மற்றும் கைத்தொழில் ஆகிய மூன்று பிரிவுகளிலும் காணிகளின் மதிப்புகள் மிதமான வளர்ச்சியையே பதிவு செய்துள்ளன.
இத்துறையிலேயே மிக அதிகமான வருடாந்திர வளர்ச்சி பதிவாகியுள்ளது. குடியிருப்புக் காணிகளின் மதிப்பு வருடாந்திர அடிப்படையில் 6.7 சதவீதம் அதிகரித்து, அதன் குறியீட்டு மதிப்பு 284.9ஆக உயர்ந்துள்ளது. முந்தைய ஆறு மாதங்களுடன் ஒப்பிடுகையில் இது 4.3 சதவீதம் அதிகரித்துள்ளது (2025 இன் இரண்டாம் பாதியில் இதன் அரையாண்டு வளர்ச்சி 2.3 சதவீதமாக இருந்தது).
வர்த்தக காணிகளின் மதிப்பு வருடாந்திர அடிப்படையில் 5.7 சதவீதமும், அரையாண்டு அடிப்படையில் 3.2 சதவீதமும் அதிகரித்து, அதன் குறியீட்டு மதிப்பு 268.9ஆக உயர்ந்துள்ளது.
கைத்தொழில் காணிகளின் மதிப்பு கடந்தாண்டுடன் ஒப்பிடுகையில் 5.2 சதவீதமும், முந்தைய ஆறு மாதங்களுடன் ஒப்பிடுகையில் 3.6 சதவீதமும் அதிகரித்து, 261.0 என்ற குறியீட்டு அளவை எட்டியுள்ளது. கடந்த ஆண்டின் இரண்டாம் பாதியில் இதன் அரையாண்டு வளர்ச்சி 1.6 சதவீதமாக மட்டுமே இருந்தது குறிப்பிடத்தக்கது.
குடியிருப்பு மற்றும் கைத்தொழில் காணிகளின் மதிப்புகள், 2025ஆம் ஆண்டின் இரண்டாம் பாதியில் இருந்ததை விட வேகமான வளர்ச்சியைப் பதிவு செய்துள்ளன. இது இந்த பிரிவுகளில் நிலவும் வலுவான சொத்து மதிப்பு உயர்வைக் காட்டுகிறது.
இந்த நில மதிப்பு குறியீடானது (LVI), அரசாங்க மதிப்பீட்டு திணைக்களத்திடமிருந்து பெறப்பட்ட ஒரு பேர்ச் (Per-perch) வெற்று நிலத்தின் விலைகளின் அடிப்படையில் மத்திய வங்கியால் கணக்கிடப்படுகிறது. இது கொழும்பு மாவட்டத்திலுள்ள அனைத்து 13 பிரதேச செயலகப் பிரிவுகளையும் உள்ளடக்கியது.
குடியிருப்பு, வர்த்தகம் மற்றும் கைத்தொழில் ஆகிய மூன்று பிரிவுகளுக்கான தனித்தனி குறியீடுகளின் எளிய சராசரியைக் கொண்டு ஒட்டுமொத்த குறியீடு கணக்கிடப்படுகிறது. இக்குறியீட்டுக்கு 2017ஆம் ஆண்டின் முதல் பாதியே அடிப்படை காலப்பகுதியாகப் பயன்படுத்தப்படுகிறது.
ஒட்டுமொத்தமாக, கொழும்பின் சொத்துச் சந்தையில் தொடர்ந்து வளர்ச்சி காணப்பட்டாலும், அதன் வளர்ச்சி வேகத்தை மத்திய வங்கி "மிதமானது" என்றே விவரித்துள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
