பொருட்களை இறக்குமதி செய்யாமல் 24.8 பில்லியன் ரூபாயை வெளிநாடுகளுக்கு அனுப்பிய ஒருவர் FCIDயினரால் கைது
தந்தி வழிப் பணப் பரிமாற்றங்கள் (Telegraphic Transfers) ஊடாக வெளிநாட்டுக் கணக்குகளுக்கு சுமார் 24.8 பில்லியன் ரூபாய்க்கு இணையான வெளிநாட்டு நாணயங்களை முறைகேடாக அனுப்பிய குற்றச்சாட்டின் பேரில் கொட்டிக்காவத்தை பகுதியில் நபரொருவர் நிதிக் குற்றப் புலனாய்வுப் பிரிவினரால் (FCID) கைது செய்யப்பட்டுள்ளார்.
குறித்த நிதிப் பரிவர்த்தனைகள் அனைத்தும் 2024ஆம் ஆண்டு டிசெம்பர் மாதம் முதல் 2025ஆம் ஆண்டு நவம்பர் மாதம் வரையான காலப்பகுதியில் முன்னெடுக்கப்பட்டுள்ளதாக பொலிஸார் தெரிவித்துள்ளனர்.
இலங்கைக்கு எவ்விதப் பொருட்களையும் இறக்குமதி செய்யாத நிலையிலேயே, இந்தப் பாரிய தொகை வெளிநாட்டுக் கணக்குகளுக்கு பரிமாற்றம் செய்யப்பட்டுள்ளதாக ஆரம்பக்கட்ட விசாரணைகளில் தெரியவந்துள்ளது.
சந்தேகநபரால் முன்னெடுக்கப்பட்ட இந்த நிதிப் பரிமாற்றங்கள் மற்றும் அதற்குப் பின்னணியில் உள்ள காரணிகள் தொடர்பில் நிதிக் குற்றப் புலனாய்வுப் பிரிவினர் தீவிர மேலதிக விசாரணைகளை முன்னெடுத்து வருகின்றனர்.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
