‘கஜ்ஜா’ மற்றும் இரு பிள்ளைகள் படுகொலை: டுபாயிலிருந்து நாடுகடத்தப்பட்ட பெண்ணுக்கு நவம்பர் 4 வரை விளக்கமறியல்!
‘கஜ்ஜா’ என அழைக்கப்படும் அருண விதானகே மற்றும் அவரது இரண்டு பிள்ளைகள் சுட்டுப் படுகொலை செய்யப்பட்ட சம்பவம் தொடர்பில் கைது செய்யப்பட்ட பெண் ஒருவரை எதிர்வரும் நவம்பர் மாதம் 4ஆம் திகதி வரை விளக்கமறியலில் வைக்குமாறு வலஸ்முல்ல நீதவான் நீதிமன்றம் உத்தரவிட்டுள்ளது.
அனுஷா லக்மாலி என அடையாளம் காணப்பட்டுள்ள குறித்த பெண், ‘அச்சினி’ என்ற பெயராலும் அறியப்படுவதாகத் தெரிவிக்கப்படுகிறது.
டுபாயிலிருந்து இலங்கைக்கு நாடுகடத்தப்பட்ட நிலையில், அவர் நேற்று (27) கட்டுநாயக்க பண்டாரநாயக்க சர்வதேச விமான நிலையத்தில் வைத்து குற்றப் புலனாய்வுத் திணைக்கள அதிகாரிகளால் கைது செய்யப்பட்டுள்ளார்.
கைது செய்யப்பட்ட பெண் வலஸ்முல்ல நீதவான் நீதிமன்றத்தில் முன்னிலைப்படுத்தப்பட்டதைத் தொடர்ந்து, அவரை நவம்பர் 4ஆம் திகதி வரை விளக்கமறியலில் வைக்குமாறு உத்தரவு பிறப்பிக்கப்பட்டுள்ளது.
‘கஜ்ஜா’ என அழைக்கப்படும் அருண விதானகே மற்றும் அவரது இரண்டு பிள்ளைகள் கடந்த 2025ஆம் ஆண்டு பெப்ரவரி மாதம் 18ஆம் திகதி துப்பாக்கிச் சூட்டில் உயிரிழந்திருந்தனர்.
இந்த மூவர் படுகொலைச் சம்பவம் தொடர்பான விசாரணைகளுடன் தொடர்புடையதாகக் கருதப்படும் நிலையிலேயே குறித்த பெண் கைது செய்யப்பட்டுள்ளதாகத் தெரிவிக்கப்படுகிறது.
சம்பவம் தொடர்பான மேலதிக விசாரணைகள் முன்னெடுக்கப்பட்டு வருகின்றன.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
