கடவுச்சீட்டு பெறுவோருக்கு முக்கிய அறிவிப்பு! நாளை முதல் இணையவழி முன்பதிவு கட்டாயம்
இலங்கையில் கடவுச்சீட்டுக்கு விண்ணப்பிக்கவுள்ள பொதுமக்களுக்கு குடிவரவு மற்றும் குடியகல்வுத் திணைக்களம் முக்கிய அறிவிப்பொன்றை வெளியிட்டுள்ளது.
அதன்படி, குடிவரவு மற்றும் குடியகல்வுத் திணைக்களத்தின் பிராந்திய அலுவலகங்களில் ஒருநாள் சேவை மற்றும் சாதாரண சேவையின் கீழ் கடவுச்சீட்டுக்கு விண்ணப்பிப்பவர்கள், நாளை (29) முதல் இணையவழியில் திகதி மற்றும் நேரத்தை முன்பதிவு செய்வது கட்டாயமாக்கப்பட்டுள்ளது.
இந்தப் புதிய நடைமுறை ஒக்டோபர் 29ஆம் திகதி முதல் அமுலுக்கு வரவுள்ளதாகத் திணைக்களம் அறிவித்துள்ளது.
இதற்கமைய, கடவுச்சீட்டு விண்ணப்பங்களைச் சமர்ப்பிப்பதற்காக பிராந்திய அலுவலகங்களுக்குச் செல்லும் பொதுமக்கள், முன்கூட்டியே இணையவழியில் தங்களுக்கான திகதி மற்றும் நேரத்தை ஒதுக்கிக்கொள்ள வேண்டும்.
இதற்கான வசதி குடிவரவு மற்றும் குடியகல்வுத் திணைக்களத்தின் உத்தியோகபூர்வ இணையத்தளத்தில் ஏற்படுத்தப்பட்டுள்ளதாகத் தெரிவிக்கப்பட்டுள்ளது.
விண்ணப்பதாரர்கள் திணைக்களத்தின் இணையத்தளத்திற்குச் சென்று, ‘பிராந்திய அலுவலகங்கள் ஊடாக கடவுச்சீட்டுகளைப் பெற்றுக்கொள்வதற்காக திகதியையும் நேரத்தையும் ஒதுக்கிக் கொள்ளுதல்’ என்ற இணைப்பைத் தெரிவுசெய்வதன் மூலம் முன்பதிவை மேற்கொள்ள முடியும்.
ஒருநாள் சேவை மற்றும் சாதாரண சேவை ஆகிய இரண்டிற்கும் இந்த முன்பதிவு நடைமுறை பொருந்தும் என அறிவிக்கப்பட்டுள்ளது.
எனினும், பத்தரமுல்லையில் அமைந்துள்ள குடிவரவு மற்றும் குடியகல்வுத் திணைக்களத்தின் பிரதான அலுவலகத்தின் சேவைகளில் எவ்வித மாற்றமும் மேற்கொள்ளப்படவில்லை.
பிரதான அலுவலகத்தின் சேவைகள் வழமைபோன்று தொடரும் என திணைக்களத்தின் ஊடகப் பேச்சாளர் மஹேஷ் கருணாதாச தெரிவித்துள்ளார்.
எனவே, பிராந்திய அலுவலகங்களில் கடவுச்சீட்டுக்கு விண்ணப்பிக்கத் திட்டமிட்டுள்ள பொதுமக்கள், தேவையற்ற அசௌகரியங்களைத் தவிர்ப்பதற்காக அலுவலகத்திற்குச் செல்வதற்கு முன்னர் இணையவழி முன்பதிவை மேற்கொள்ளுமாறு அறிவுறுத்தப்படுகின்றனர்.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
