கொழும்பு அடுக்குமாடி குடியிருப்புகளின் விலை 18.5% உயர்வு; விற்பனை நடவடிக்கைகளில் வீழ்ச்சி!

கொழும்பு மாவட்டத்தின் புதிய அடுக்குமாடி குடியிருப்புகளின் சந்தை நிலவரம் குறித்த புதிய தரவுகள் வெளியாகியுள்ளன. 

2026ஆம் ஆண்டின் முதலாம் காலாண்டை அடிப்படையாகக் கொண்டு, விலை ஏற்றம் மற்றும் விற்பனை மந்தநிலை குறித்த இப்புதிய புள்ளிவிவரங்கள் வெளியாகியுள்ளன. 

கொழும்பு மாவட்டத்தில் புதிய அடுக்குமாடி குடியிருப்புகளின் விலைச் சுட்டெண் 284.4 புள்ளிகளை எட்டியுள்ளது. இது கடந்த ஆண்டின் இதே காலப்பகுதியுடன் ஒப்பிடுகையில் 18.5% வளர்ச்சியாகும். 

விலைகள் இவ்வாறு அதிகரித்த போதிலும், விற்பனை செய்யப்படும் அடுக்குமாடி குடியிருப்புகளின் அளவு 15.2% வீழ்ச்சியடைந்துள்ளது. இது கொழும்பு மற்றும் ஏனைய நகர்ப்புறங்களில் சந்தை ஓரளவு மந்தமடைந்துள்ளதைக் காட்டுகிறது.

ஒட்டுமொத்த விற்பனை நடவடிக்கைகளில் 65% பங்கைக் கொண்டு, கொழும்பு மாவட்டம் சந்தையின் மையப்புள்ளியாகத் தொடர்கிறது. இதில் கொழும்பு மாவட்டத்துக்குள் உள்ள தனிப்பட்ட அடுக்குமாடி குடியிருப்புத் திட்டங்கள் 59% விற்பனையையும், கம்பஹா மற்றும் களுத்துறை மாவட்டத் திட்டங்கள் 32% விற்பனையையும் கொண்டுள்ளன.

2026 இன் முதலாம் காலாண்டில் விலை கட்டமைப்பில் குறிப்பிடத்தக்க மாற்றங்கள் ஏற்பட்டுள்ளன.

75 மில்லியன் ரூபாய்க்கும் அதிகமான விலை கொண்ட குடியிருப்புகளின் சந்தைப் பங்கு கடந்த ஆண்டு 11% ஆக இருந்த நிலையில், தற்போது 29% ஆக உயர்ந்துள்ளது.

25 மில்லியன் முதல் 50 மில்லியன் ரூபாய் வரையிலான நடுத்தர வகை குடியிருப்புகளின் விற்பனை 49% இலிருந்து 29% ஆக பாரிய வீழ்ச்சியைக் கண்டுள்ளது.

25 மில்லியன் ரூபாய்க்கும் குறைவான குடியிருப்புகள் 19% சந்தைப் பங்கைத் தக்கவைத்துள்ளன.

முடிக்கப்பட்ட கட்டுமானத் திட்டங்களில் 98% குடியிருப்புகள் ஏற்கெனவே விற்பனை செய்யப்பட்டுவிட்டன. தற்போது 2% மாத்திரமே சந்தையில் எஞ்சியுள்ளது. கட்டுமானத்திலுள்ள புதிய திட்டங்களில் 51% குடியிருப்புகள் ஏற்கெனவே முன்பதிவு செய்யப்பட்டுள்ளன.

கொள்வனவாளர்களில் பெரும்பான்மையானோர் இலங்கையர்களாக இருப்பதுடன், அவர்கள் உடனடியாகக் குடியேறும் நோக்கிலேயே இவற்றை வாங்குகின்றனர். இதில் 80% கொள்வனவாளர்கள் வங்கிக் கடன்களைப் பெறாமல் தங்களது சொந்த நிதியைப் பயன்படுத்தி குடியிருப்புகளை வாங்கியுள்ளதுடன், கட்டுமான நிறுவனங்களுக்குத் தேவையான மூலதனத்தில் 48% முன்பதிவு வைப்புப் பணத்தின் மூலமே கிடைக்கிறது.

ஏனைய நிலச்சொத்துச் சந்தை அடுக்குமாடி குடியிருப்புகள் மட்டுமன்றி, ஒட்டுமொத்த நிலச்சொத்துச் சந்தையிலும் விலை அதிகரிப்பு ஏற்பட்டுள்ளது. 
கொழும்பு மாவட்டத்தில் காணிகளின் விலை 31.9% உயர்ந்துள்ளதுடன், வீடுகளின் விலை 6.4% மற்றும் பொதுவான அடுக்குமாடி குடியிருப்புகளின் விலை 11% அதிகரித்துள்ளன.