2027 பட்ஜெட்டில் இளைஞர்களின் எதிர்காலத்துக்குத் தீர்வில்லை: வஜிர அபேவர்தன குற்றச்சாட்டு

இலங்கையின் 2027ஆம் ஆண்டுக்கான வரவு செலவுத் திட்டம், நாட்டின் பொருளாதாரச் சவால்களை எதிர்கொள்வதற்கும் இளைஞர்களுக்கான புதிய வாய்ப்புகளை உருவாக்குவதற்கும் போதுமான நடவடிக்கைகளை முன்வைக்கவில்லை என ஐக்கிய தேசியக் கட்சியின் தவிசாளரும் முன்னாள் அமைச்சருமான வஜிர அபேவர்தன தெரிவித்துள்ளார்.

கொழும்பு, மலர் வீதியிலுள்ள ஐக்கிய தேசியக் கட்சியின் அரசியல் அலுவலகத்தில் ஊடகங்களுக்குக் கருத்துத் தெரிவித்தபோதே அவர் இந்த விமர்சனங்களை முன்வைத்துள்ளார். 

உலக நாடுகள் நவீன தொழில்நுட்பத்தின் உதவியுடன் வேகமாக முன்னேறி வரும் நிலையில், இலங்கையில் இளைஞர்களுக்கான தொழில்நுட்ப அடிப்படையிலான வேலைவாய்ப்புகளை உருவாக்குவதற்குப் போதிய கவனம் செலுத்தப்படவில்லை என வஜிர அபேவர்தன குற்றஞ்சாட்டியுள்ளார். குறிப்பாக Millennials மற்றும் Generation Z எனப்படும் இளம் தலைமுறையினரின் எதிர்கால பொருளாதார வாய்ப்புகளை உறுதிப்படுத்துவதற்கான தெளிவான செயற்றிட்டங்கள் அவசியம் என அவர் வலியுறுத்தியுள்ளார்.

தொழில்நுட்ப வளர்ச்சிக்கேற்ப வேலைவாய்ப்புகளை உருவாக்குவதும், இளைஞர்களின் திறன்களை மேம்படுத்துவதும் நாட்டின் நீண்டகால பொருளாதார வளர்ச்சிக்கு முக்கியமானவை என்று தெரிவித்த அவர், இலங்கை எதிர்காலத்தில் எதிர்கொள்ளவுள்ள வெளிநாட்டுக் கடன் மீள்செலுத்தல் பொறுப்புகள் தொடர்பாகவும் கேள்வி எழுப்பியுள்ளார்.

2028ஆம் ஆண்டுக்குள் நாட்டின் வெளிநாட்டு கையிருப்பை 13 பில்லியன் அமெரிக்க டொலர்களாக அதிகரிக்க வேண்டியிருக்கும் என  குறிப்பிட்டதுடன், அதே ஆண்டில் சர்வதேச கடன் வழங்குநர்களுக்கு 3.5 பில்லியன் முதல் 4 பில்லியன் அமெரிக்க டொலர் வரையிலான கடன்களை மீள்செலுத்த வேண்டியிருக்கும் என்றும்  தெரிவித்துள்ளார்.

இந்தப் பொறுப்புகளை நிறைவேற்றுவதற்கான தெளிவான நிதித் திட்டம் வரவு செலவுத் திட்டத்தில் விளக்கப்படவில்லை என்றும் சர்வதேச நாணய நிதியத்துடனான இலங்கையின் பொருளாதார வேலைத்திட்டத்தை அரசாங்கம் கையாளும் விதம் குறித்தும் வஜிர அபேவர்தன விமர்சித்துள்ளார்.

IMF தொடர்பான விடயங்களை ஆராய்வதற்குப் புதிய குழுவொன்று நியமிக்கப்பட்டுள்ளமை, அரசாங்கத்திற்குள் கருத்து வேறுபாடுகள் இருக்கலாம் என்ற சந்தேகத்தை ஏற்படுத்துவதாக அவர் கூறியுள்ளார். 

இதேவேளை, அரச ஊழியர்கள் உள்ளிட்ட பல்வேறு தரப்பினரும் எதிர்கொள்ளும் பொருளாதாரச் சிரமங்கள் தொடர்பாகவும் முன்னாள் அமைச்சர் கவலை வெளியிட்டுள்ளார். சில அரச ஊழியர்கள் தங்களது மாதாந்த சம்பளத்தில் சுமார் 60 சதவீதத்தை கடன் தவணைகளைச் செலுத்துவதற்காகப் பயன்படுத்த வேண்டியுள்ளதாக அவர் கூறியுள்ளார்.இதனால் குடும்பச் செலவுகள், உணவு, போக்குவரத்து மற்றும் ஏனைய அத்தியாவசியத் தேவைகளைப் பூர்த்திசெய்வதில் சிரமங்கள் ஏற்படுவதாக அவர் சுட்டிக்காட்டியுள்ளார்.

அத்துடன், அன்றாட வாழ்க்கைச் செலவுகளைச் சமாளிப்பதற்காகச் சில குடும்பங்கள் தங்களது தங்க நகைகள் உள்ளிட்ட பெறுமதியான பொருட்களை அடகு வைக்க வேண்டிய நிலைக்குத் தள்ளப்பட்டுள்ளதாக வஜிர அபேவர்தன தெரிவித்துள்ளார். அடகு வைத்த பொருட்களுக்கான கடனை உரிய காலத்தில் மீள்செலுத்த முடியாததால் சிலர் அவற்றை இழந்துள்ளதாகவும் அவர் குறிப்பிட்டுள்ளார்.

இத்தகைய பொருளாதார நெருக்கடிகளை எதிர்கொள்ளும் குடும்பங்களை மீட்டெடுப்பதற்கான போதுமான நிவாரண நடவடிக்கைகள் புதிய வரவு செலவுத் திட்டத்தில் இல்லை என அவர் விமர்சித்துள்ளார்.

அத்துடன், முன்னாள் ஜனாதிபதி ரணில் விக்ரமசிங்கவின் ஆட்சிக்காலத்தில் நடைமுறைப்படுத்தப்பட்ட பொருளாதாரக் கொள்கைகளையும் வஜிர அபேவர்தன ஆதரித்துப் பேசியுள்ளார். பொருளாதார நெருக்கடிக்குப் பின்னர் நாட்டின் நிதி நிலைமையை ஸ்திரப்படுத்துவதற்கு அந்த நடவடிக்கைகள் உதவியதாக அவர் தெரிவித்துள்ளார்.

அந்த மீட்சியைத் தொடர்ந்து பேணுவதற்கும், எதிர்கால கடன் பொறுப்புகளைச் சமாளிப்பதற்கும் தற்போதைய அரசாங்கம் தெளிவான பொருளாதார உத்தியை முன்வைக்கவில்லை என அவர் சுட்டிக்காட்டியுள்ளார்.