இலங்கையின் கடன் மற்றும் மொத்த உள்நாட்டு உற்பத்தி விகிதம் 88.8 சதவீதமாக வீழ்ச்சி: பிரதி நிதியமைச்சர் கலாநிதி அனில் ஜயந்த பெர்னாண்டோ

இலங்கையின் மொத்த உள்நாட்டு உற்பத்தியுடன் (GDP) ஒப்பிடுகையில் நாட்டின் மொத்தக் கடன் விகிதமானது 2026 ஆம் ஆண்டு ஜூன் மாதமளவில் 88.8 சதவீதமாகக் குறைவடைந்துள்ளதாக நிதி பிரதி அமைச்சர் கலாநிதி அனில் ஜயந்த பெர்னாண்டோ தெரிவித்துள்ளார். நாட்டின் கடன் சுமை அதிகரித்துள்ளதாக எதிர்க்கட்சிகள் முன்வைக்கும் குற்றச்சாட்டுகளை நிராகரித்த அவர், 2025 ஆம் ஆண்டின் இறுதியில் 95 சதவீதமாகக் காணப்பட்ட கடன் விகிதம் ஆண்டின் முதல் பாதியில் மேலும் வீழ்ச்சியடைந்துள்ளது என்றும் சுட்டிக்காட்டினார்.

நிதி அமைச்சு வெளியிட்டுள்ள உத்தியோகபூர்வ அறிக்கையின்படி, 2032 ஆம் ஆண்டளவில் அடைய இலக்கு வைக்கப்பட்டிருந்த 95 சதவீத கடன் விகிதமானது 2025 டிசம்பரிலேயே எட்டப்பட்டுவிட்டதாகவும், தற்போதைய தரவுகளின்படி 2026 ஜூன் மாதத்தில் அது 88.8 சதவீதமாக மேலும் முன்னேற்றம் கண்டுள்ளதாகவும் அவர் குறிப்பிட்டுள்ளார். நாட்டின் கடன் மீள்கட்டமைப்பு மற்றும் இறையாண்மை கடன் செலுத்த முடியாமைக்குப் பிந்தைய சூழ்நிலையில், அரசாங்கம் புதிய கடன்களை பெருமளவில் பெற்று வருவதாகவும் இதனால் கடன் நிலைத்தன்மை பாதிக்கப்படுவதாகவும் எதிர்க்கட்சிகள் குற்றஞ்சாட்டியிருந்த நிலையிலேயே பிரதி நிதியமைச்சர் இந்த விளக்கத்தை அளித்துள்ளார்.

பெறப்படும் கடனின் பெயரளவுத் தொகையில் (Nominal value) ஏற்படும் அதிகரிப்பை மட்டும் வைத்து நாட்டின் கடன் சுமை கூடிவிட்டதாகக் கருத முடியாது என்று கலாநிதி அனில் ஜயந்த பெர்னாண்டோ வாதிட்டார். ஒரு நாட்டின் கடன் நிலைத்தன்மை என்பது கடனைத் திருப்பிச் செலுத்தும் அரசாங்கத்தின் நிதி மேலாண்மைத் திறன் மற்றும் பொருளாதாரக் கொள்ளளவின் அடிப்படையிலேயே மதிப்பீடு செய்யப்பட வேண்டும். கடனின் தொகை மற்றும் கடன் பெறுவதற்கான நாட்டின் திறன் ஆகியவை இரு வேறுபட்ட பொருளாதாரக் காரணிகள் என்பதால், கடன் தொடர்பான விமர்சனங்கள் புள்ளிவிவர ஆதாரங்களுடன் முன்வைக்கப்பட வேண்டும் என்றும் அவர் வலியுறுத்தினார்.

இதையும் படியுங்கள்

இலங்கையின் சில வர்த்தக வங்கிகளில் அமெரிக்க டொலருக்கு எதிரான ரூபாயின் பெறுமதி மேலும் வீழ்ச்சி

தற்போதைய சூழ்நிலையில் பொருளாதாரத்தின் அளவோடு ஒப்பிடும்போதும் எண்கணித ரீதியிலும் இலங்கையின் கடன் சுமை குறைவடைந்துள்ளதாகத் தெரிவித்த பிரதி அமைச்சர், புதிய கடன் திரட்டல்கள் கடன் நிலைத்தன்மை, பொருளாதார வளர்ச்சி மற்றும் திருப்பிச் செலுத்தும் திறன் ஆகியவற்றின் பரந்த சூழலிலேயே அணுகப்பட வேண்டும் என்று சுட்டிக்காட்டியுள்ளார்.