சாய் சுதர்சனின் துரதிர்ஷ்ட சாதனை.. ஐபிஎல் வரலாற்றில் 2 முறை ஹிட் விக்கெட் ஆன முதல் வீரர்!
ஐபிஎல் 2026 குவாலிபையர்-1 போட்டியில் குஜராத் டைட்டன்ஸ் வீரர் சாய் சுதர்ஷன், ‘ஹிட் விக்கெட்’ முறையில் ஆட்டமிழந்து, ஐபிஎல் வரலாற்றில் இரண்டு முறை இவ்வாறு அவுட்டான முதல் வீரர் என்ற துரதிர்ஷ்ட சாதனையைப் படைத்தார்.
இமாசலப் பிரதேச மாநிலம் தரம்சாலாவில் நேற்று (மே 26) நடைபெற்ற ஐபிஎல் 2026 குவாலிபையர்-1 போட்டியில், குஜராத் டைட்டன்ஸ் அணியின் இளம் நட்சத்திர வீரர் சாய் சுதர்ஷன், ஐபிஎல் வரலாற்றில் மறக்க முடியாத துரதிர்ஷ்ட சாதனையைத் தனது பெயரில் பதிவு செய்தார்.
முதலில் பேட்டிங் செய்த ராயல் சேலஞ்சர்ஸ் பெங்களூரு (ஆர்சிபி) அணி, கேப்டன் ரஜத் படிதார் உள்ளிட்ட பேட்ஸ்மேன்களின் அதிரடியான ஆட்டத்தால் 20 ஓவர்களில் 254 ரன்கள் குவித்து, குஜராத்துக்கு 255 என்ற வெற்றி இலக்கை நிர்ணயித்தது. இந்த இமாலய இலக்கை நோக்கிக் களமிறங்கிய குஜராத் அணிக்கு முதல் ஓவரிலேயே அதிர்ச்சி காத்திருந்தது.
ஷாட் அடிக்க முயன்ற சாய் சுதர்ஷன், கட்டுப்பாட்டை இழந்ததால் அவரது சொந்த பேட் ஸ்டம்புகளில் பட்டதால் ‘ஹிட் விக்கெட்’ முறையில் ஆட்டமிழந்தார்.
இதன்மூலம், ஐபிஎல் வரலாற்றில் இரண்டு முறை ‘ஹிட் விக்கெட்’ முறையில் அவுட்டான முதல் வீரர் என்ற வரலாறு கெட்ட சாதனையை அவர் படைத்தார். இதற்கு முன்னதாக, 2022 ஆம் ஆண்டு மும்பை இந்தியன்ஸ் அணிக்கு எதிரான போட்டியிலும் அவர் இதே முறையில் விக்கெட்டை இழந்திருந்தார் என்பது குறிப்பிடத்தக்கது.
சாய் சுதர்ஷன் 14 ரன்களில் வெளியேற, கேப்டன் சுப்மன் கில் 2 ரன்கள், ஜோஷ் பட்லர் 29 ரன்கள், நிஷாந்த் சிந்து 5 ரன்கள் எடுத்து ஆட்டமிழந்து ஏமாற்றம் அளித்தனர். ஒருபுறம் நிலைத்து நின்ற ராகுல் திவேட்டியா மட்டும் அரைசதம் அடித்துப் போராடினார்.
இருப்பினும், ஆர்சிபி பந்துவீச்சைச் சமாளிக்க முடியாத குஜராத் டைட்டன்ஸ், 19.3 ஓவர்களில் 162 ரன்களுக்கு அனைத்து விக்கெட்டுகளையும் இழந்தது. இதனால் 92 ரன்கள் வித்தியாசத்தில் அபார வெற்றி பெற்ற ஆர்சிபி அணி நேரடியாக இறுதிப் போட்டிக்கு முன்னேறியது.
தோல்வியைத் தழுவிய குஜராத் டைட்டன்ஸ், வெளியேற்றுச் சுற்றில் (எலிமினேட்டர்) வெற்றி பெறும் அணியை எதிர்கொள்ள உள்ளது. பிளே-ஆப் போன்ற முக்கிய போட்டியில் இந்தத் துரதிர்ஷ்டம் நிகழ்ந்ததால், ரசிகர்கள் பெரும் ஏமாற்றத்திற்கு உள்ளாகியுள்ளனர்.
