வான்கடேவில் ரன் மழை: மும்பை இந்தியன்ஸை 18 ரன்கள் வித்தியாசத்தில் வீழ்த்திய ஆர்சிபி
ஐபிஎல் 2026 லீக் போட்டியில் வான்கடே மைதானத்தில் நடைபெற்ற அதிரடி ஆட்டத்தில் ராயல் சேலஞ்சர்ஸ் பெங்களூரு அணி 18 ரன்கள் வித்தியாசத்தில் மும்பை இந்தியன்ஸை வீழ்த்தி அபார வெற்றி பெற்றது.
மும்பை வான்கடே மைதானத்தில் நடைபெற்ற ஐபிஎல் 2026-ன் 20-வது லீக் போட்டியில், ராயல் சேலஞ்சர்ஸ் பெங்களூரு (RCB) அணி 18 ரன்கள் வித்தியாசத்தில் மும்பை இந்தியன்ஸ் (MI) அணியை வீழ்த்தி அபார வெற்றி பெற்றது.
டாஸ் வென்ற மும்பை இந்தியன்ஸ் முதலில் பந்துவீச்சைத் தேர்வு செய்தது. ஆனால் தொடக்கம் முதலே ஆர்சிபி அதிரடியான ஆட்டத்தை வெளிப்படுத்தியது. தொடக்க வீரர் பிலிப் சால்ட் 36 பந்துகளில் 78 ரன்கள் குவித்து மிரட்டினார். அவருக்கு இணையாக விராட் கோலி பொறுப்பான ஆட்டத்தை வெளிப்படுத்தி 50 ரன்கள் சேர்த்தார்.
முதல் விக்கெட்டுக்கு இந்த ஜோடி 120 ரன்கள் குவித்து வலுவான அடித்தளத்தை அமைத்தது. பின்னர் வந்த கேப்டன் ரஜத் பாட்டிதார் வெறும் 20 பந்துகளில் 53 ரன்கள் விளாசி ஸ்கோரை வேகமாக உயர்த்தினார்.
இறுதியில் டிம் டேவிட் அதிரடியால் ஆர்சிபி அணி 20 ஓவர்கள் முடிவில் 4 விக்கெட் இழப்பிற்கு 240 ரன்கள் என்ற பெரிய இலக்கை நிர்ணயித்தது. மும்பை தரப்பில் ஹர்திக் பாண்டியா மற்றும் மிச்செல் சாண்ட்னர் தலா ஒரு விக்கெட்டை பெற்றனர்.
241 ரன்கள் என்ற கடின இலக்கை நோக்கி விளையாடிய மும்பை இந்தியன்ஸ் அணிக்கு தொடக்கம் நம்பிக்கை அளித்தது. ரையான் ரிக்கெல்டன் 37 ரன்கள் எடுத்தார். ஆனால் ரோகித் சர்மா 19 ரன்களில் காயம் காரணமாக வெளியேறியது அணிக்கு பெரிய பின்னடைவை ஏற்படுத்தியது.
சூர்யகுமார் யாதவ் 33 ரன்களும், ஹர்திக் பாண்டியா 40 ரன்களும் எடுத்து போராடினர். திலக் வர்மா 1 ரன்னில் ஆட்டமிழந்து ஏமாற்றமளித்தார். இறுதியில் ஷெர்ஃபேன் ரூதர்ஃபோர்ட் வெறும் 31 பந்துகளில் 71 ரன்கள் குவித்து கடைசி வரை போராடினார்.
ஆனால் மும்பை இந்தியன்ஸ் அணி 20 ஓவர்கள் முடிவில் 5 விக்கெட் இழப்பிற்கு 222 ரன்கள் மட்டுமே எடுத்துத் தோல்வியைத் தழுவியது. ஆர்சிபி தரப்பில் சுயாஷ் சர்மா 2 விக்கெட்டுகள் கைப்பற்றினார். குர்ணால் பாண்டியா மற்றும் ஜேக்கப் டஃபி தலா ஒரு விக்கெட்டை பெற்றனர்.
சொந்த மைதானமான வான்கடேவில் போராடி தோல்வி அடைந்த மும்பை இந்தியன்ஸ் ரசிகர்களுக்கு இந்த முடிவு ஏமாற்றத்தை ஏற்படுத்தியுள்ளது.
