இந்தோனேசியாவில் 7.7 ரிச்டர் நிலநடுக்கம்: 14 பேர் பலி; சுனாமி எச்சரிக்கை!

இந்தோனேசியாவின் புளோரஸ் தீவுப் பகுதியை (Flores Island) மையமாகக் கொண்டு சனிக்கிழமை அதிகாலை 7.7 ரிச்டர் அளவில் மிக சக்திவாய்ந்த நிலநடுக்கம் ஏற்பட்டுள்ளது.

இந்த இயற்கை அனர்த்தத்தில் சிக்கி குறைந்தது 14 பேர் உயிரிழந்துள்ளதாகவும், பலர் காயமடைந்துள்ளதாகவும் இந்தோனேசிய பேரிடர் முகாமைத்துவ முகவரகம் (BPBD) அதிகாரப்பூர்வமாகத் தெரிவித்துள்ளது. தேடுதல் மற்றும் மீட்புப் பணிகள் தீவிரமாக முன்னெடுக்கப்பட்டு வருவதால் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.

சனிக்கிழமை அதிகாலை 5:00 மணிக்கு முன்னதாக புளோரஸ் தீவில் 15 கிலோமீட்டர் ஆழத்தில் இந்த நிலநடுக்கம் உருவானதாக வானிலை மற்றும் புவிப்பௌதிகவியல் முகவரகம் உறுதிப்படுத்தியுள்ளது. நிலநடுக்கத்தின் ஆழம் குறைவாக இருந்த காரணத்தினால் தரைப்பகுதியில் அதன் தாக்கம் பேரழிவாக அமைந்தது. கிழக்கு நுசா தெங்காரா (East Nusa Tenggara) மாகாண ஆளுநர் இமானுவேல் மெல்கியாட்ஸ் லாகா லீனா (Emanuel Melkiades Laka Lena) கருத்துத் தெரிவிக்கையில், வீடுகளின் இடிபாடுகள் இடிந்து விழுந்ததில் பலர் தூக்கத்திலேயே உயிரிழந்ததாகக் குறிப்பிட்டுள்ளார்.

மௌமேரே (Maumere) துறைமுகத்தில் பயணிகள் படகில் ஏறக் காத்திருந்தபோது, முனையக் கட்டடத்தின் கொன்கிரீட் பாளங்கள் உடைந்து விழுந்தன. கப்பல் பாலப்பாதை இடிந்து விழுந்ததில் சிலர் கடலில் தூக்கி வீசப்பட்டனர். பிரதான நிலநடுக்கத்தைத் தொடர்ந்து 6.1 ரிச்டர் உள்ளிட்ட பல சக்திவாய்ந்த தொடர் நில அதிர்வுகள் (Aftershocks) அப்பகுதியை உலுக்கின.

நிலநடுக்கத்தைத் தொடர்ந்து கடல் நீர் பின்வாங்கியதைக் கண்ட மக்கள் பெரும் அச்சமடைந்து மலைப்பகுதிகளை நோக்கித் தப்பியோடினர். அதிகாரிகள் சுனாமி எச்சரிக்கை விடுத்ததைத் தொடர்ந்து சுமார் 2,000 இற்கும் மேற்பட்ட மக்கள் மோட்டார் சைக்கிள்கள் மற்றும் வாகனங்கள் மூலம் உடனடியாகப் பாதுகாப்பான இடங்களுக்கு இடம்பெயர்ந்தனர். கடலில் குறிப்பிடத்தக்க நீர்மட்ட உயர்வு பதிவாகாத காரணத்தால், சுமார் மூன்று மணி நேரத்திற்குப் பின்னர் சுனாமி எச்சரிக்கை மீளப் பெறப்பட்டது.

பாதிக்கப்பட்ட பிராந்தியங்களில் அவசரகால உதவிகள் மற்றும் மீட்புப் பணிகள் முழுவீச்சில் முடுக்கிவிடப்பட்டுள்ளன. கட்டட இடிபாடுகளில் மேலும் எவரேனும் சிக்கியுள்ளனரா என்பதைத் துல்லியமாக அறியும் வகையில் தேடுதல் நடவடிக்கைகள் தொடர்ந்து வருகின்றன.