இலங்கை – நியூசிலாந்து தொடருக்கான போட்டி அட்டவணை வெளியீடு
இலங்கை கிரிக்கெட் அணி அடுத்த ஆண்டு ஆரம்பத்தில் நியூசிலாந்துக்குச் சுற்றுப்பயணம் மேற்கொண்டு ஒருநாள், இருபது20 (T20I) மற்றும் டெஸ்ட் போட்டிகள் கொண்ட தொடரில் விளையாடவுள்ளது.
மூன்று ஒருநாள் போட்டிகளுடன் ஜனவரி 16 ஆம் திகதி தொடங்கும் இந்தத் தொடரில், மூன்று இருபது20 போட்டிகள் மற்றும் ஐசிசி டெஸ்ட் சாம்பியன்ஷிப்பின் ஒரு பகுதியாக இரண்டு டெஸ்ட் போட்டிகளும் நடைபெறவுள்ளன.
ஒருநாள் போட்டிகள் ஜனவரி 16, 19 மற்றும் 22 ஆம் திகதிகளில் நடைபெறவுள்ளன. இதற்கான முதல் ஒருநாள் போட்டி நெபீரிலும், இரண்டாவது போட்டி வெலிங்டனிலும், மூன்றாவது போட்டி டுனேடினிலும் நடைபெறும்.
இதனைத் தொடர்ந்து, இருபது20 போட்டிகள் ஜனவரி 26, 29 மற்றும் 31 ஆம் திகதிகளில் நடைபெறுகின்றன. முதல் இருபது20 போட்டி கிரிஸ்ட்சேர்ச்சிலும், இரண்டாவது மற்றும் மூன்றாவது போட்டிகள் நெல்சனிலும் நடைபெறும். பின்னர், டெஸ்ட் போட்டிகள் பெப்ரவரி மாதத்தில் தொடங்குகின்றன.
முதல் டெஸ்ட் போட்டி பெப்ரவரி 4 முதல் 8 வரை டவுரங்காவிலும், இரண்டாவது டெஸ்ட் போட்டி பெப்ரவரி 12 முதல் 16 வரை ஹெமில்டனிலும் நடைபெறும் என்பது குறிப்பிடத்தக்கது. இந்த அட்டவணையின்படி, இலங்கை அணி நியூசிலாந்தில் மூன்று வடிவிலான கிரிக்கெட்டிலும் கலந்துகொள்ளவுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
