க.பொ.த சாதாரண தரப் பரீட்சை இன்று நிறைவு – வன்முறைத் தடுப்புக்கு பொலிஸார் விசேட பாதுகாப்பு!

இலங்கையில் கடந்த 17ஆம் திகதி ஆரம்பித்த க.பொ.த சாதாரண தரப் பரீட்சை இன்று (பிப்ரவரி 26) நிறைவடைகிறது. நாடு முழுவதும் ஆயிரக்கணக்கான மாணவர்கள் இந்த முக்கிய தேர்வில் பங்கேற்று, தங்கள் கல்வி எதிர்காலத்தைத் தீர்மானிக்கும் இந்தப் பரீட்சையை வெற்றிகரமாக எதிர்கொண்டுள்ளனர்.

பரீட்சை நிறைவடையும் இந்த தருணத்தில், மாணவர்களிடையே ஏற்படக்கூடிய வன்முறைச் சம்பவங்களைத் தடுப்பதற்காக இலங்கை பொலிஸார் விசேட பாதுகாப்பு வேலைத்திட்டமொன்றை முன்னெடுத்துள்ளனர். 

கடந்த காலங்களில் சாதாரண தரப் பரீட்சைக்குத் தோற்றிய மாணவர்கள் சிலர், பரீட்சை முடிந்த பின்னர் கொண்டாட்டம் என்ற பெயரில் வன்முறைச் சம்பவங்களில் ஈடுபடும் போக்கு காணப்பட்டதால், இத்தகைய முன்னெச்சரிக்கை நடவடிக்கை அவசியமாகியுள்ளது என்று பொலிஸ் தலைமையகம் விடுத்துள்ள அறிக்கையில் தெரிவிக்கப்பட்டுள்ளது.

இதன்படி, நாடு முழுவதும் உள்ள பரீட்சை மையங்களைச் சுற்றியும், மாணவர்கள் கூடக்கூடிய இடங்களிலும் பொலிஸ் பாதுகாப்பு பலப்படுத்தப்பட்டுள்ளது. சந்தேகத்திற்கிடமான செயற்பாடுகளில் ஈடுபடுபவர்களைக் கண்காணித்தல், தேவையற்ற கூட்டங்களைக் கலைத்தல் மற்றும் அவசர நிலைமைகளை உடனடியாகக் கையாளுதல் உள்ளிட்ட நடவடிக்கைகள் முன்னெடுக்கப்பட்டுள்ளன.

மேலும், பெற்றோர்களும் தமது பிள்ளைகள் பரீட்சை முடிந்த பின்னர் பாதுகாப்பாக வீடு திரும்புவதை உறுதி செய்யுமாறும், அவர்கள் எவ்வித வன்முறை அல்லது அசாம்பாவிதச் செயற்பாடுகளிலும் ஈடுபடாமல் இருக்க அவதானம் செலுத்துமாறும் பொலிஸார் கேட்டுக்கொண்டுள்ளனர். 

மாணவர்களின் வெற்றியைக் கொண்டாடுவது முக்கியம் என்றாலும், அது சட்டத்திற்கு உட்பட்டும், சமூக அமைதிக்கு பாதிப்பு ஏற்படாத வகையிலும் அமைய வேண்டும் என்பதே இந்த அறிவுறுத்தலின் நோக்கமாகும்.

இந்த ஆண்டு க.பொ.த சாதாரண தரப் பரீட்சை அமைதியான மற்றும் பாதுகாப்பான சூழலில் நடைபெற்றதாக அதிகாரப்பூர்வ வட்டாரங்கள் தெரிவித்துள்ளன. 

பரீட்சை முடிவுகள் வெளியிடப்படும் திகதி பின்னர் அறிவிக்கப்படும் என பரீட்சைகள் திணைக்களம் தெரிவித்துள்ளது. 

நாட்டு நடப்புகளை உங்கள் கைபேசியில் பெற்றுக்கொள்ள நியூஸ்21 WHATSAPP CHANNEL இல் இணையுங்கள் JOIN NOW

GROUP 1 GROUP 2

Listen Live on Aha FM Your Favorite Online Tamil Radio!

Listen Live Visit Aha FM