ஹார்மூஸ் பதற்றத்திலும் இந்தியா வந்தடைந்த ‘நந்தாதேவி’ கப்பல்
மேற்காசியாவில் நிலவும் பதற்றமான சூழ்நிலையில், திரவ நிலையிலான பெட்ரோலியம் கியாஸ் (LPG) ஏற்றிய ‘நந்தாதேவி’ என்ற இந்திய கொடியுடன் கூடிய சரக்கு கப்பல் இந்தியாவை பாதுகாப்பாக வந்தடைந்துள்ளது. இந்த கப்பலில் மொத்தம் 92,700 டன் எடை கொண்ட LPG சரக்கு இருப்பதாக தகவல்கள் தெரிவிக்கின்றன. உலகளாவிய எரிசக்தி விநியோகத்திற்கு முக்கியமான ஹார்மூஸ் ஜலசந்தி வழியாக இந்த கப்பல் பயணம் செய்தது குறிப்பிடத்தக்கது.
மேற்காசிய பகுதியில் அமெரிக்கா மற்றும் இஸ்ரேல் இணைந்து நடத்திய தாக்குதல்களுக்கு பதிலடியாக ஈரான் மேற்கொண்ட நடவடிக்கைகள் காரணமாக அந்த பிராந்தியத்தில் பதற்றம் அதிகரித்துள்ளது. இதன் ஒரு பகுதியாக, உலக நாடுகளின் சரக்கு கப்பல்கள் செல்லும் முக்கிய பாதையான ஹார்மூஸ் ஜலசந்தி சில காலத்திற்கு மூடப்பட்டதாக கூறப்பட்டது. அந்த வழியாக செல்லும் கப்பல்களுக்கு தாக்குதல் ஏற்படும் அபாயமும் இருந்ததாக தகவல்கள் வெளியானது.
இந்த சூழ்நிலையில் இந்திய கொடியுடன் கூடிய ‘ஷிவாலிக்’ மற்றும் ‘நந்தாதேவி’ என்ற இரண்டு கப்பல்களுக்கு மட்டும் ஈரான் சிறப்பு அனுமதி வழங்கியதாக கூறப்படுகிறது. இந்தியாவுடன் உள்ள நட்புறவை கருத்தில் கொண்டு இந்த அனுமதி வழங்கப்பட்டதாக தகவல்கள் தெரிவிக்கின்றன. அதன் பின்னர் இரு கப்பல்களும் பாதுகாப்பாக இந்தியாவை நோக்கி பயணம் தொடங்கின. அவை முறையே முந்த்ரா மற்றும் கண்ட்லா துறைமுகங்களை வந்தடையும் என முன்பே தெரிவிக்கப்பட்டிருந்தது.
அந்த கணிப்புப்படி ‘நந்தாதேவி’ கப்பல் தற்போது குஜராத் மாநிலத்தில் உள்ள கண்ட்லா துறைமுகத்தை வந்தடைந்துள்ளது. உலகளவில் எரிபொருள் விலைகள் உயர்ந்து, விநியோகத்தில் சிக்கல்கள் உருவாகும் சூழ்நிலையில் LPG சரக்கு இந்தியாவை வந்தடைந்தது முக்கியமானதாக பார்க்கப்படுகிறது. இதற்கிடையில் பெர்சிய வளைகுடா பகுதியில் இந்திய கொடியுடன் இயங்கும் 22 கப்பல்கள் உள்ளன என்றும், அவற்றில் பணியாற்றும் 611 இந்திய கப்பல் பணியாளர்களும் பாதுகாப்பாக உள்ளனர் என்றும் மத்திய அரசு உறுதியளித்துள்ளது.
இந்த செய்தி உங்களுக்கு பிடித்திருந்ததா?
News21-ஐ கூகுள் நியூஸில் (Google News) பின்தொடர (Follow) செய்து, உடனுக்குடன் உண்மையான செய்திகளைப் பெறுங்கள்.
