இரத்தப் பரிசோதனைக்கு கூடுதல் கட்டணம் வசூலித்த யாழ். தனியார் வைத்தியசாலைக்கு ரூ.30 இலட்சம் அபராதம்
யாழ்ப்பாணத்தில் உள்ள தனியார் வைத்தியசாலை ஒன்று, இரத்தப் பரிசோதனைக்காக அரசு நிர்ணயித்த விலையை விட அதிக கட்டணம் வசூலித்ததை ஒப்புக்கொண்டதை அடுத்து, அதற்கு 30 இலட்சம் ரூபாய் அபராதம் விதிக்கப்பட்டுள்ளது.
யாழ்ப்பாணம், பலாலி வீதியில் கந்தர்மடம் பகுதியில் அமைந்துள்ள குறித்த தனியார் வைத்தியசாலை முழுமையான இரத்தப் பரிசோதனைக்காக (FBC) அரசால் நிர்ணயிக்கப்பட்ட அதிகபட்ச விலையான 400 ரூபாய்க்குப் பதிலாக, 550 ரூபாய் வசூலித்துள்ளது.
கடந்த 13ஆம் திகதியன்று, நுகர்வோர் விவகார அதிகார சபை (CAA) அதிகாரிகள் மேற்கொண்ட விசேட சோதனையின் போது, இந்த விதிமீறல் கண்டறியப்பட்டது.
இது தொடர்பாக யாழ்ப்பாணம் நீதவான் நீதிமன்றத்தில் நுகர்வோர் விவகார அதிகார சபையால் வழக்குத் தொடரப்பட்டது. ஜூலை 21ஆம் திகதியன்று இந்த வழக்கு விசாரணைக்கு எடுத்துக்கொள்ளப்பட்டபோது, வைத்தியசாலை நிர்வாகம் தனது குற்றத்தை ஒப்புக்கொண்டது.
இதனைத் தொடர்ந்து, வைத்தியசாலைக்கு 30 இலட்சம் ரூபாய் அபராத உத்தரவு நீதிமன்றத்தால் பிறப்பிக்கப்பட்டது.
அத்துடன், இந்த விதிமீறல் தொடர்பான செய்தியைத் தேசிய பத்திரிகைகளில் வைத்தியசாலையின் சொந்தச் செலவில் விளம்பரமாக வெளியிட வேண்டும் என்றும் உத்தரவிடப்பட்டுள்ளது.
தனியார் வைத்தியசாலைகள் மற்றும் ஆய்வகங்களில் சேவைகளைப் பெறும்போது, அரசு நிர்ணயித்த கட்டுப்பாட்டு விலைகளைச் சரிபார்க்குமாறு நுகர்வோர் விவகார அதிகார சபை, பொதுமக்களைக் கேட்டுக்கொண்டுள்ளது.
மேலும், சேவைகளுக்கான உத்தியோகபூர்வ பற்றுச்சீட்டை (Receipt) எப்போதும் கேட்டுப் பெறுமாறும், கூடுதல் கட்டணம் வசூலிக்கப்பட்டால் 1977 என்ற அவசர அழைப்பு இலக்கத்துக்குப் முறைப்பாடு அளிக்குமாறும் அறிவுறுத்தப்பட்டுள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
