நாடளாவிய ரீதியில் சாரதிகள் மற்றும் நடத்துநர்களுக்கு திடீர் போதைப்பொருள் சோதனை!

பொதுப் போக்குவரத்துப் பாதுகாப்பை பலப்படுத்தும் நோக்கில், சாரதிகள் மற்றும் நடத்துநர்களுக்கான நடமாடும் போதைப்பொருள் சோதனைத் திட்டத்தை நாடளாவிய ரீதியில் விரிவுபடுத்த போக்குவரத்து மற்றும் நெடுஞ்சாலைகள் அமைச்சு தீர்மானித்துள்ளது.

கடந்த ஆண்டு நவம்பர் மாதம் ஆரம்பிக்கப்பட்ட இந்தத் திட்டத்தின் கீழ், மேல் மாகாணத்தில் இதுவரை 5,242 சாரதிகள் மற்றும் நடத்துநர்கள் சோதனைக்கு உட்படுத்தப்பட்டதாக தேசிய போக்குவரத்து மருத்துவ நிறுவனத்தின் தலைவர் பேராசிரியர் கிளிஃபோர்ட் பெரேரா தெரிவித்தார். அவர்களில் 239 பேர் போதைப்பொருள் பயன்படுத்தியமை உறுதி செய்யப்பட்டு, அவர்களுக்கு எதிராக சட்ட நடவடிக்கை எடுக்கப்பட்டுள்ளதாகவும் அவர் தெரிவித்தார். 

இந்தத் திட்டத்தை இவ்வருட இறுதிக்குள் இரண்டு மடங்காக விரிவுபடுத்தவும், மேல் மாகாணத்துக்கு அப்பால் ஏனைய பகுதிகளுக்கும் கொண்டு செல்லவும் திட்டமிடப்பட்டுள்ளது. 

மேல் மாகாணத்தில் சுமார் 11,000 சாரதிகள் மற்றும் நடத்துநர்கள் சேவையில் ஈடுபட்டுள்ள போதிலும், அனைவரும் போதைப்பொருள் பயன்படுத்துபவர்கள் அல்ல என்றும், குற்றவாளிகளை அடையாளம் காண்பதே இத்திட்டத்தின் நோக்கம் என்றும் மேல் மாகாண வீதி பயணிகள் போக்குவரத்து அதிகார சபையின் தலைவர் காமினி ஜாசிங்க தெரிவித்தார். 

வீதி விபத்துகள், உயிரிழப்புகள் மற்றும் ஊனமடைவதைக் குறைப்பதற்கு போதைப்பொருள் அற்ற வாகனம் ஓட்டுதல் மிகவும் அவசியமானது என பேராசிரியர் பெரேரா வலியுறுத்தினார். தண்டனை வழங்குவதை விட, சமூகத்துக்கு ஒரு முக்கியமான செய்தியைக் கொண்டு சேர்ப்பதே இந்தத் திட்டத்தின் முக்கிய நோக்கமாகும் என்றும் பேராசிரியர் குறிப்பிட்டார். 

தேசிய வீதி பாதுகாப்பு சபையின் தலைவர் மஞ்சுள குலரத்ன கருத்துத் தெரிவிக்கையில், தேசிய வீதி பாதுகாப்புத் திட்டத்தில் இந்த நடமாடும் சோதனைப் பிரிவு ஒரு நிலையான நடவடிக்கையாக அறிமுகப்படுத்தப்பட்டுள்ளதாகத் தெரிவித்தார். இதுவரை 15,000க்கும் மேற்பட்ட சோதனைகள் நடத்தப்பட்டுள்ளதாகவும், பொதுமக்களின் உயிர் மற்றும் உடைமைகளைப் பாதுகாப்பதற்காக இத்திட்டம் மேலும் பலப்படுத்தப்படும் என்றும் அவர் மேலும் கூறினார்.