மஹர சிறைக்கலவரத்தின் பின்னணியில் திட்டமிட்ட சதி? நீதியமைச்சர் ஹர்ஷன நாணயக்கார சந்தேகம்

மஹர சிறைச்சாலையில் ஏற்பட்ட அமைதியற்ற நிலைமைக்கு சிறைச்சாலைகளில் காணப்படும் அளவுக்கு அதிகமான நெரிசல் ஒரு காரணமாக இருக்கலாம் என நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார தெரிவித்தார். 

எனினும், இந்தச் சம்பவத்தின் பின்னணியில் ஏதேனும் திட்டமிடப்பட்ட சதி முயற்சிகள் உள்ளனவா என்பது குறித்து அதிகாரிகள் தீவிரமாக விசாரணை நடத்தி வருவதாகவும் அவர் தெரிவித்தார். 

இந்த மோதல்கள் பிரதானமாக கைதிகளுக்கும் சிறை நிர்வாகத்துக்கும் இடையிலேயே இடம்பெற்றுள்ளதாக அமைச்சர் குறிப்பிட்டார். இருப்பினும், வன்முறையைத் தூண்டுவதில் வெளித்தரப்பினருக்கு ஏதேனும் தொடர்பு இருக்கிறதா என்பது குறித்தும் அரசாங்கம் ஆராய்ந்து வருகிறது.

அரசாங்கம் முன்னெடுத்து வரும் போதைப்பொருள் ஒழிப்பு நடவடிக்கையால் சிறைச்சாலைகளுக்குள் போதைப்பொருள் விநியோகம் கணிசமாகக் குறைந்துள்ளதாகவும், இதுவும் இந்த கலவரத்துக்கு ஒரு காரணமாக இருக்கலாம் என்றும் அமைச்சர் சுட்டிக்காட்டினார்.

சிறைச்சாலை நெரிசல் ஒரு பாரிய பிரச்சினையாக இருப்பதை ஏற்றுக்கொண்ட அவர், இவ்வாறான சம்பவங்களுக்கு அது மட்டுமே ஒரே காரணம் அல்ல என்றார். இந்த நெரிசலைக் குறைக்க சிறைச்சாலைகளின் கொள்ளளவை அதிகரிப்பதுடன், சில போதைப்பொருள் தொடர்பான குற்றங்களுக்குப் பிணை வழங்கும் நடைமுறைகளை விரைவுபடுத்துவது மற்றும் அரசாங்க பகுப்பாய்வு அறிக்கைகள் கிடைப்பதில் ஏற்படும் தாமதங்களைத் தவிர்ப்பது போன்ற சட்ட சீர்திருத்தங்களை அரசாங்கம் மேற்கொண்டு வருவதாக அவர் தெரிவித்தார்.

தற்போது சுமார் 23,000 கைதிகள், போதைப்பொருள் தொடர்பான குற்றங்களுக்காக சிறையில் உள்ளதாகத் தெரிவித்த அமைச்சர், இந்தப் பிரச்சினையை சட்ட அமலாக்கத்தின் மூலம் மட்டும் தீர்க்க முடியாது என்றார். "சட்டத்தின் மூலம் போதைப்பொருள் விநியோகத்தைத் தடுக்க முடியும். ஆனால், அதன் தேவையைக் குறைக்க சமூக ரீதியான மாற்றங்கள் அவசியம்" என்றும் அவர் குறிப்பிட்டார்.

மஹர சிறைக்கலவரத்தில் தொடர்புடையதாகக் கருதப்படும் 14 கைதிகள் ஏற்கெனவே ஏனைய சிறைகளுக்கு மாற்றப்பட்டுள்ளனர். இச்சம்பவத்துக்கு காரணமானவர்கள் ஒழுங்கு நடவடிக்கை எதிர்கொள்வார்கள் எனத் தெரிவித்த அமைச்சர், நீண்ட காலமாக காரணங்கள் ஏதுமின்றி இவ்வாறான சம்பவங்கள் நடைபெறுவதில்லை என்பதால், இதில் ஏதேனும் திட்டமிடப்பட்ட வெளிப்புறத் தலையீடு உள்ளதா என்பதை விசாரிக்குமாறு சம்பந்தப்பட்ட அதிகாரிகளுக்கு அறிவுறுத்தப்பட்டுள்ளதாகத் தெரிவித்தார்.