எல் நினோ அச்சுறுத்தல்: உச்ச கட்ட வானிலை மாற்றத்திற்குத் தயாராகுமாறு ஐ.நா. எச்சரிக்கை
உலக நாடுகள் வரும் வாரங்கள் மற்றும் மாதங்களில் உச்ச கட்ட வானிலை மாற்றங்களுக்குத் தயாராக வேண்டும் என ஐக்கிய நாடுகளின் வானிலை அமைப்பு எச்சரித்துள்ளது. வளர்ந்து வரும் எல் நினோ வானிலை முறை காரணமாகவே இந்த அபாயம் அதிகரித்திருப்பதாக அது தெரிவித்துள்ளது.
உலக வானிலை அமைப்பு (WMO) செவ்வாய்க்கிழமை ஒரு செய்திக் குறிப்பில், மத்திய மற்றும் கிழக்கு பசிபிக் பெருங்கடலில் வழக்கத்திற்கு மாறாக வெப்பமான கடல் மேற்பரப்பு வெப்பநிலையால் வகைப்படுத்தப்படும் எல் நினோ நிகழ்வு உருவாக, ஜூன் மற்றும் ஆகஸ்டுக்கு இடையில் 80 சதவீத வாய்ப்பும், நவம்பருக்குள் 90 சதவீத வாய்ப்பும் இருப்பதாகத் தெரிவித்துள்ளது.
"அறிவியல் தெளிவாக உள்ளது: எல் நினோ 90 சதவீத உறுதியுடன் வரும் மாதங்களில் நம் வாசற்படியை அடையப் போகிறது" என்று ஐக்கிய நாடுகளின் பொதுச் செயலாளர் அன்டனியோ குட்ரோஸ் கூறுகின்றார். "உலகம் இதை அவசர கால காலநிலை எச்சரிக்கையாகக் கருத வேண்டும்." காற்று, அழுத்தம் மற்றும் மழைப்பொழிவு முறைகளில் உலகளாவிய மாற்றங்களைக் கொண்டுவரும் எல் நினோ, ஒவ்வொரு இரண்டு முதல் ஏழு ஆண்டுகளுக்கும் பொதுவாக நிகழும் இயற்கையான ஒரு நிகழ்வாகும். இது சுமார் ஒன்பது முதல் 12 மாதங்கள் வரை நீடிக்கும்.
எல் நினோ, தென் அமெரிக்கா மற்றும் அமெரிக்காவின் தெற்குப் பகுதிகள், ஆப்பிரிக்காவின் ஹார்ன் பகுதிகள் மற்றும் மத்திய ஆசியாவின் சில பகுதிகளில் அதிக மழையைத் தூண்டும். அதே சமயம் ஆஸ்திரேலியா, மத்திய அமெரிக்கா, இந்தோனேசியா மற்றும் தெற்காசியாவின் சில பகுதிகளில் வறட்சியை ஏற்படுத்தும். மேலும், மத்திய மற்றும் கிழக்கு பசிபிக் பெருங்கடலில் சூறாவளி உருவாக்கத்தையும் தூண்டும் என்று உலக வானிலை அமைப்பு தெரிவித்துள்ளது.
இந்த ஆண்டின் எல் நினோ நிகழ்வு 'குறைந்தபட்சம் மிதமானதாகவும், சாத்தியமான வலுவானதாகவும்' இருக்கும் என்று அந்த அமைப்பு கணித்துள்ளது. "இதன் தாக்கங்கள் மிகவும் வேதனையானதாகவும், தொலைவுக்குப் பயணிப்பதாகவும், பேரழிவு வேகத்தில் எல்லைகளைக் கடப்பதாகவும் இருக்கும்" என்று குட்ரோஸ் எச்சரித்துள்ளார்.
இம்பீரியல் கல்லூரி லண்டன் மற்றும் வேர்ல்டு வெதர் அட்ட்ரிபியூஷன் நெட்வொர்க்கின் ஆராய்ச்சியாளர்களின்படி, இந்தப் போக்கு இந்த ஆண்டு குறிப்பாகக் கொடூரமான காட்டுத் தீக்கு வழிவகுக்கும். அதன் எதிர்பார்ப்பில், ஐரோப்பிய ஒன்றியம், சைப்பிரஸ், கிரீஸ், இத்தாலி, பிரான்ஸ், ஸ்பெயின் மற்றும் போர்த்துக்கல் உள்ளிட்ட அதிக ஆபத்துள்ள பகுதிகளில் முன்னெப்போதும் இல்லாத எண்ணிக்கையிலான தீயணைப்பு வீரர்களையும் விமானங்களையும் பயன்படுத்தத் திட்டமிட்டுள்ளது.
2023 முதல் 2024 வரையிலான கடைசி எல் நினோ, வலுவானதாக இருந்ததோடு, 2024ஐ பதிவான வெப்பமான ஆண்டாக மாற்றுவதற்குப் பங்களித்தது என்று உலக வானிலை அமைப்பின் பொதுச் செயலாளர் செலஸ்ட் சாவுலோ கூறினார். உச்ச வெப்பத்துடன் தொடர்புடைய பிற அபாயங்களில், கொசு மற்றும் உண்ணி போன்ற நோய்த்தொடுக்கிகளால் பரவும் நோய்கள் பரவுதல், உணவு மற்றும் நீர் விநியோகம் குறைதல் ஆகியவை அடங்கும் என்று சாவுலோ சுட்டிக்காட்டினார். "ஏற்கெனவே சிரமப்பட்டு வரும் சமூகங்கள் தங்கள் வரம்புகளுக்கு அப்பால் தள்ளப்படும்" என்று அவர் கூறினார்.
அமெரிக்கா-இஸ்ரேல் ஈரான் போர் காரணமாகப் பணவீக்கத்தை எதிர்கொள்ளும் நுகர்வோருக்கு, எல் நினோ காரணமாக உணவுப் பொருட்களின் விலைகள் மேலும் உயரக்கூடும். உலகின் மிகப்பெரிய கொக்கோ பதப்படுத்தும் நிறுவனங்களில் ஒன்றான பாரி கலேபாட்டின் தலைமை நிர்வாக அதிகாரி ஹெய்ன் ஷூமேக்கர், உலகளாவிய உற்பத்தியில் 60 சதவீதத்தைக் கொண்ட ஈக்வடார் மற்றும் மேற்கு ஆபிரிக்காவின் வளரும் பகுதிகளில் பயிர்கள் குறைக்கப்படலாம் என்று எச்சரித்தார். "இது நாம் மிகவும் எச்சரிக்கையுடன் கண்காணிக்கும் ஒன்று. எல் நினோ ஒரு தொன்னுக்கு ஆயிரக்கணக்கான டொலர்கள் வரை பாதிப்பை ஏற்படுத்தக்கூடும்" என்று அவர் கூறினார்.
புதைபடிவ எரிபொருட்களிலிருந்து புதுப்பிக்கத்தக்க எரிசக்திக்கு மாற வேண்டியதன் அவசியத்தை எல் நினோ நினைவூட்டுவதாக குத்தேரஸ் கூறினார். "எல் நினோ நிலைமைகள் ஒரு வெப்பமடையும் உலகின் நெருப்பில் எரிபொருளை ஊற்றும்" என்று அவர் எச்சரித்தார்.
இந்த செய்தி உங்களுக்கு பிடித்திருந்ததா?
News21-ஐ கூகுள் நியூஸில் (Google News) பின்தொடர (Follow) செய்து, உடனுக்குடன் உண்மையான செய்திகளைப் பெறுங்கள்.
