சுவிட்சர்லாந்தில் நர்சரி பள்ளிச் சிறுவர்களைக் கத்தியால் குத்திய சீன நாட்டவருக்கு 15 ஆண்டுகள் சிறை
சுவிட்சர்லாந்தின் சூரிக் நகரில் நர்சரி பள்ளிச் சிறுவர்கள் மீது கொடூரக் கத்திக்குத்துத் தாக்குதல் நடத்திய 25 வயது சீன நாட்டவருக்கு சூரிக் நீதிமன்றம் 15 ஆண்டுகள் சிறைத்தண்டனை விதித்துத் தீர்ப்பளித்துள்ளது.
கடந்த 2024ஆம் ஆண்டு அக்டோபர் 1ஆம் திகதி நிகழ்ந்த இந்தச் சம்பவத்தில், ஐந்து வயதுடைய மூன்று சிறுவர்கள் படுகாயமடைந்தனர். இவர்களில் சிலருக்கு ஆபத்தான வெட்டுக் காயங்கள் ஏற்பட்டதால், அவர்கள் தீவிர சிகிச்சைக்குப் பின்னரே உயிர் பிழைத்ததாகத் தெரிவிக்கப்பட்டது.
குழந்தைகள் மீது தாக்குதல் நடத்தப்பட்டதைக் கண்ட நர்சரி பள்ளியின் பராமரிப்பு ஊழியர் ஒருவர், உடனடியாகச் செயல்பட்டுத் தாக்குதல் நடத்திய நபரைத் தடுத்து நிறுத்தினார்.
இந்த வழக்கை விசாரித்த சூரிக் நீதிமன்றம், குற்றவாளிக்கு 15 ஆண்டுகள் சிறைத்தண்டனையுடன் கட்டாய மனநல சிகிச்சையும் அளிக்கப்பட வேண்டும் என்று உத்தரவிட்டுள்ளது. மேலும், தனது தண்டனைக் காலத்தை நிறைவு செய்த பின்னர், அவர் சுவிட்சர்லாந்து நாட்டிற்குள் மீண்டும் நுழைவதற்கு 15 ஆண்டுகள் தடையும் விதித்துள்ளது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
